[1] Vi shay sinn dei fees mitt shoo oh, du dochtah funn en kaynich! Dei rundi hifta sinn vi keshtlichi shtay, es gmacht sinn bei en shaff-meishtah.
[2] Dei navvel is vi en vei-glaws, es immah goodah vei drinn hott. Dei bauch is vi en haufa vaytza, es lilya-blumma drumm rumm hott.
[3] Dei zvay brisht sinn vi zvilling hashlen.
[4] Dei hals is vi en rundah tavvah gmacht funn ivory. Dei awwa sinn vi di vassah-lechah funn Hesbon am Bathrabbim doah. Dei naws is vi da rund tavvah funn Lebanon es geyyich Damascus gukt.
[5] Dei kobb uf diah is vi da Berg Karmel. Dei sheinichi hoah henka nunnah, un sinn so shay es es en kaynich fanga dayt.
[6] Du bisht so shay un so leeblich, mei leeblichi, mitt dei blesiah!
[7] Du shtaysht grawt uf vi en palma-bohm; dei brisht sinn vi en hengel drauva.
[8] Ich habb ksawt, “Ich zayl nuff gradla uf da palma-bohm, un zayl hohld nemma funn sei nesht.” Loss dei brisht sei vi drauva am vei-shtokk, da kshmakk funn deim ohften vi ebbel
[9] un di kussa funn dei maul vi da besht vei. es blesiahlich nunnah gayt ivvah di leftz un zay.
[10] Ich heah zu meim beleebdah, un sei falanga is fa mich.
[11] Kumm, mei beleebdah, vella naus in di feldah gay, un ivvah-nacht in di shtedlen bleiva.
[12] Vella free meiyets naus an di vei-goahra gay, fa sayna eb di vei-shtekk gebleet henn. Vann iahra blumma uf sinn, un di grannat-ebbel am bleeya sinn— datt gebb ich diah mei leevi.
[13] Di leeb-ebbel blumma shikka iahra goodah kshmakk naus, un alli sadda goodi frucht is um uns rumm. Fa dich habb ich awl dee alda un neiyi blesiahra ufkshtoaht, mei beleebdah.