[1] Denk an uns, oh Hah, denk vass es gevva hott zu uns; gukk un sayn unsah shohm.
[2] Unsah eahbshaft is ivvah-gedrayt vadda zu fremdi, un unsah heisah zu auslendah.
[3] Miah sinn kinnah unni eldra, unni en daett, unsah maemma sinn vi vitt-veivah.
[4] Miah missa's vassah kawfa es miah drinka, un missa betzawla fa unsah hols.
[5] Mitt en yoch um unsah hals sinn miah gedrivva, miah sinn meet un finna kenn roo.
[6] Miah henn missa di hand naus hayva zu Egypta un Assur, so es miah genunk broht henn.
[7] Unsah feddah henn ksindicht un layva nimmi, un miah missa iahra shtrohf nemma.
[8] Gnechta roola ivvah uns, nimmand kann uns frei macha funn iahra hend.
[9] Im kfoah funn unsah layva, greeya miah unsah broht, veil di shvatt draus in di vildahnis is.
[10] Unsah haut is fabrend es vi in en offa, funn demm shreklicha hungah.
[11] Veibsleit sinn fashohmd vadda in Zion, un leddichi mayt in di shtett funn Juda.
[12] Di evvahshti sinn kanka vadda, un di eldishti greeya kenn eah.
[13] Di yunga mennah missa mawla an di meel-shtay, un di boova shtolbahra unnich di gvicht funn feiyah-hols.
[14] Di alda mennah hokka nimmi am shtatt-doah, un di yungi leit henn ufkeaht iahra harfa shpeela.
[15] Di frayt in unsah hatza is fatt; unsah danses is zu dreebsawl gedrayt.
[16] Da krohn is funn unsah kobb kfalla; vay zu uns, veil miah ksindicht henn.
[17] Deich dess is unsah hatz shvach, deich dee sacha sinn unsah awwa dunkel.
[18] Veil da Berg Zion so en veeshtah, leahrah blatz is, dann doon di faxa drivvah shpringa.
[19] Du, oh Hah, roolsht fa'immah, un dei kaynich-shtool bleibt funn kshlecht zu kshlecht.
[20] Favass dusht du uns immah fagessa? Favass dusht du uns so lang hokka lossa?
[21] Bring uns zu diah, oh Hah, so es miah zrikk gay kenna; Mach unsah dawwa nei vi als difoah.
[22] Adda hosht du uns gans falossa? Zayld dei haysah zann geyyich uns nee nett shtobba!