[1] En goodah nohma is bessah es goot-shmakkichi shmiah, un da dawk fumm doht is bessah es da dawk es ma geboahra voah.
[2] Es is bessah fa in en haus gay vo leit am veina sinn, es in en haus vo si am en grohs essa havva sinn, fa alli-ebbah muss shtauva, un di levendicha sedda dess zu hatz nemma.
[3] Dreebsawl is bessah es lacha, fa dreebsawl is goot fa's hatz.
[4] Es hatz funn sellah mitt veisheit is im haus vo veines is, avvah's hatz fumm dumma is im haus vo blesiah is.
[5] Es is bessah fa da zank ohnemma funn ebbah mitt veisheit, es vi fa abheicha zumm leet funn ebbah es kenn veisheit hott.
[6] Vi di yacht funn danna am brenna unnich en kessel, so is es laches funn di unksheida. Dess is aw unni mayning in demm layva.
[7] En mann mitt veisheit es fashvetzt vatt, faliaht sei veisheit, un en kshenk es gevva vatt hinna rumm, fadeahbt's hatz.
[8] Es end funn ebbes is bessah es da ohfang, un en geduldichah geisht is bessah es en hohchmeedichah.
[9] Loss dich nett kshvind zannich vadda im geisht, fa yusht selli unni veisheit halda da zann.
[10] Frohk nett, “Favass voahra di alda dawwa bessah es dee?” Fa du frohksht sell nett mitt veisheit.
[11] Veisheit, so vi eahbshaft, is en goot ding, un helft selli es di sunn sayna.
[12] Veisheit gebt acht uf dich so vi geld acht gebt uf dich, avvah's goot ding veyyich veisheit is es es layva gebt zu sellah es es hott.
[13] Denk droh vass Gott gedu hott: Veah kann grawt macha vass eah grumm gmacht hott?
[14] Vann di zeida goot sinn, seind fraylich, avvah vann si shlecht sinn, denk an dess: Gott hott ayns gmacht grawt vi eah's anra gmacht hott. Fasell, kann da mensh nett vissa vass kumd noch eem.
[15] Deich mei layva unni mayning, havvich dee awl zvay ksenna: En gerechtah mann shtaubt in sei gerechtichkeit, un en evilah mann laybt lang in ungettlichkeit.
[16] Sei nett zu gerecht in dei aykni awwa, un zayl dich nett mitt zu feel veisheit. Favass vetsht du dich doht macha?
[17] Sei nett ivvahrich gottlohs, un loss dich nett unksheit vadda, so es du nett shtaubsht eb dei zeit.
[18] Es is goot fa ayns fashtay, un nett gay lossa fumm anra. Sellah es Gott fircht dutt nix ivvah di maws.
[19] Veisheit macht en mann es veisheit hott, may greftich es zeyya roolahs in en shtatt.
[20] Es is kenn gerechtah mann uf di eaht es immah goot dutt un nee nett sindicha dutt.
[21] Nemm nett zu hatz alles es du leit heahsht sawwa, adda du mechsht dei gnecht heahra dich faflucha—
[22] fa du vaysht in deim hatz es du en mannich mohl anri faflucht hosht.
[23] Ich habb awl dess ausbroviaht mitt veisheit un habb ksawt, “Ich zayl veisheit havva,” avvah's voah veit vekk funn miah.
[24] Vass-evvah es veisheit is, is oahrich deef un veit ab, veah kann's finna un's fashtay?
[25] So havvich mei meind uf gmacht fa vissa, fa dess unnah-sucha un veisheit fashtay, un favass es sacha sinn vi si sinn; un aw fa fashtay vi dumm es ungerechtichkeit is, un vi unksheit dumheit is.
[26] Ich habb dess auskfunna: May biddah es da doht, is es veibsmensh es en hatz hott vi en fall un fang-nets, un hend hott vi kedda. Veah Gott kfellich is kumd vekk funn iahra, avvah da sindah vatt kfanga bei iahra.
[27] “Nau gukk,” sawkt da Breddichah, “dess is vass ich auskfunna habb: bei ay ding zumm anra du fa sach unnah-sucha,
[28] mei sayl is alsnoch am sucha un hott's noch nett kfunna. Avvah ich habb ay ufrichtichah mann in en dausend kfunna, un kenn ufrichtich veibsmensh kfunna unnich eena awl.
[29] Doch habb ich dess kfunna: Gott hott mensha ufrichtich gmacht, avvah si sucha fa iahra ayknah vayk ausshaffa.”