[1] Da Dawfit hott di vadda funn demm leet zumm Hah ksawt vo da Hah eem di ivvah-hand gevva hott ivvah awl sei feinda, un een frei gmacht hott fumm Saul.
[2] Eah hott ksawt, “Da Hah is mei Felsa, mei sayfah Roo-Blatz, un eah macht mich frei.
[3] Mei Gott is mei Felsa, vo ich mich fashtekla kann, mei Shield, un's Hann funn mei Saylichkeit. Eah is mei shteikah Roo-Blatz, un mei Fashtekkel-Blatz, mei Heiland es mich vekk hald funn fechtichi mennah.
[4] Ich roof zumm Hah, eah is hohch globt, un heet mich funn mei feinda.
[5] Di vassah-vella fumm doht voahra um mich rumm, un's vassah funn fadauves hott mich shiah zu gedekt.
[6] Di shtrikk fumm grawb voahra um mich rumm, di shtrikk-nets fumm doht voahra fannich miah.
[7] In meim angsht havvich da Hah ohgroofa; ich habb naus groofa zu meim Gott. Funn sei tempel hott eah mei shtimm keaht, un mei roof is zu sei oahra kumma.
[8] Di eaht hott kshiddeld un gvakkeld, di mavvahra unnich di himla henn kshiddeld, si henn kshiddeld veil eah bays voah.
[9] Shmohk is aus sei naws kumma, feiyah es ufbrend is aus sei maul kumma, kohla am brenna, sinn raus kumma.
[10] Eah hott di himla funn-nannah fadayld un is runnah kumma, di dunkla volka voahra unnich sei fees.
[11] Eah is kflowwa uf en cherub, un is ganga uf di flikkel fumm vind.
[12] Eah hott's dunkla sei dach gmacht um sich rumm, in di dunkla reyyah volka fumm himmel.
[13] Funn di helling fannich eem is es gviddah raus kumma.
[14] Da Hah hott gedimmeld fumm himmel, di shtimm fumm Alli-Haychshta is raus kumma.
[15] Eah hott arrows kshossa, un sei feinda ausnannah gedrivva, gviddah hott si shpringa gmacht.
[16] Da bodda fumm say voah abgedekt, di foundations funn di eaht voahra ksenna deich da zank fumm Hah, un bei em haysa ohften funn sei naws.
[17] Funn ovva-heah hott eah runnah glangd un mich ohgraykt, eah hott mich aus em deef vassah gezowwa.
[18] Eah hott mich frei gmacht funn mei shteiki feinda, funn selli es mich kast henn un zu shteik voahra fa mich.
[19] Si sinn uf mich kumma im dawk funn meim druvvel, avvah da Hah hott mich ufkohva.
[20] Eah hott mich raus in en grohsah blatz gebrocht; eah hott mich frei gmacht veil eah mich leeb hott.
[21] Grawt vi gerecht es ich voah, so oahrich hott da Hah kshaft mitt miah, vi sauvah es mei hand voah, so oahrich hott eah mich zrikk betzawld.
[22] Ich habb em Hah sei vayk kalda. Ich habb mich nett ungettlich ohkshikt geyyich mei Gott.
[23] Awl sei ksetza voahra fannich miah, ich habb mich nett vekk gedrayt funn sei gebodda.
[24] Ich voah unshuldich fannich eem, un habb mich kalda funn sindicha.
[25] Da Hah hott mich betzawld fa vi gerecht es ich voah, fa vi sauvah es ich voah fannich eem.
[26] Zu di shtandhafticha, veisht du dich shtandhaftich, zu di unshuldicha, veisht du dich unshuldich.
[27] Zu selli es rein sinn, veisht du dich rein, zu selli es falsh sinn, veisht du dich unni falshheit.
[28] Du helfsht selli es aylendich sinn, avvah dei awwa sinn uf di shtolsa fa si niddah bringa.
[29] Du bisht mei licht, oh Hah; da Hah drayt mei dunkelheit zu helling.
[30] Mitt dei hilf kann ich fassich gay geyyich greeks-leit, un mitt mei Gott kann ich ivvah en vand tshumba.
[31] Un veyyich Gott, sei vayya sinn gans folkumma; 's vatt fumm Hah is gans voah. Eah is en shield zu selli es sich falossa uf een.
[32] Fa veah is Gott, unni yusht da Hah? Veah is da Felsa, unni yusht unsah Gott?
[33] Gott macht mich shteik mitt graft, un veist miah da recht vayk.
[34] Eah macht mei fees vi di fees funn en hash, eah setzt mich uf hohchi bletz.
[35] Eah land mei hend fa fechta im greek, un mei eahm fa en eisichah bow zeeya.
[36] Du gebsht miah da shield funn dei saylichkeit, dei hilf macht mich grohs ohksenna sei.
[37] Du hosht en braydi pawt gmacht unnich miah; mei fees henn nee nett kshlibt.
[38] Ich binn mei feinda nohch ganga un binn si ivvah-kumma; ich binn nett zrikk gedrayt biss si umgebrocht voahra.
[39] Ich habb si nunnah kshlauwa, un si henn nett uf shtay kenna; si sinn unnich mei fees kfalla.
[40] Du hosht miah graft gevva fa fechta im greek; du hosht selli es geyyich mich sinn, unnich mei fees gedu.
[41] Du hosht mei feinda gmacht iahra bikkel drayya zu miah, un ich habb selli umgebrocht es mich kast henn.
[42] Si henn gegrisha fa hilf, avvah's voah nimmand fa helfa; si henn zumm Hah groofa, avvah eah hott kenn andvat gevva.
[43] Ich habb si famawla vi feinah shtawb uf di eaht; ich habb si fashtambt vi drekk in di shtrohs.
[44] Du hosht mich fumm shtreit funn mei leit kalda, un hosht mich kalda fa ivvah di heida sei; unbekandi leit sinn mei gnechta vadda.
[45] Fremdi leit bikka sich nunnah zu miah, so kshvind es si mich heahra, doon si vass ich sawk.
[46] Si faliahra moot, un kumma am ziddahra aus iahra greeks-heisah.
[47] Da Hah laybt! Ksaykend is mei Felsa! Gott is hohch ufkohva, da Felsa funn mei saylichkeit.
[48] Eah is da Gott es zrikk betzawld fa mich; eah dutt di heida unnich mich;
[49] un eah setzt mich frei funn mei feinda. Du haybsht mich ovvich selli es ufshtayn geyyich mich, un helfsht miah vekk funn fechtichi mennah.
[50] Fasell vill ich dich danka, oh Hah, unnich di heida; un dei nohma lohva mitt singes.
[51] Du gebsht dei kaynich grohsi ivvah-hand, un veisht shtandhaftichi-leevi zu deim ksalbda, zumm Dawfit un sei nohch-kummashaft fa'immah.”