1 ทิโมธี 3
[1] กำอู้นี้เจื้อถือได้ คือว่าเมื่อใผใค่เป๋นผู้ปกครองผ่อกอยคริสตจักร เขาก็ใค่เยียะก๋านตี้มีเกียรติ
[2] ผู้ปกครองนั้นจะต้องเป๋นคนบ่มีตี้ติ มีเมียคนเดียว ใจ๊จีวิตอย่างปอดี มีสติบังคับตั๋วได้ดี เป๋นคนตี้น่านับถือ มีน้ำใจ๋ฮับแขก กับสอนคนอื่นได้
[3] บ่เป๋นขี้เหล้า บ่เป๋นคนซอบความรุนแรง แต่เป๋นคนสุภาพอ่อนน้อม บ่ซอบผิดเถียงใผ กับบ่เป๋นคนขี้โลภเงินคำ
[4] เขาต้องผ่อกอยครอบครัวของตั๋วได้ดี กับอบรมหื้อลูกเต้าเจื้อฟังกับนับถือเขา
[5] ย้อนว่าคนใดบ่สามารถผ่อกอยครอบครัวของตั๋วได้ คนนั้นก็จะผ่อกอยคริสตจักรของพระเจ้าตึงบ่ได้
[6] คนนั้นบ่ควรเป๋นคนฮับเจื้อใหม่ กั๋วว่าเขาจะหยิ่ง แล้วจะถูกลงโต้ษแบบเดียวกับมาร
[7] เขาต้องเป๋นคนตี้มีจื้อเสียงดี เป๋นตี้นับถือของคนตังหลายตี้อยู่นอกคริสตจักรตวย เปื้อเขาจะบ่ถูกว่าได้ กับจะบ่ถูกแฮ้วของมารตี้ดักไว้
[8] สำหรับมัคนายกก็เหมือนกั๋น ต้องเป๋นคนตี้มีจื้อเสียงดี เป๋นคนอู้ซื่อจริงใจ๋ บ่เมาเหล้า บ่เป๋นคนขี้โลภ
[9] ส่วนหลักความเจื้อตี้พระเจ้าเปิดเผยหื้อฮู้ จะต้องยึดมั่นด้วยจิตสำนึกตี้บริสุทธิ์
[10] หื้อเอาคนหมู่นี้มาลองเยียะก๋านผ่อก่อน ถ้าหันว่าเขาบ่มีข้อต๋ำหนิ ก็หื้อเขาฮับใจ๊ได้
[11] มัคนายกตี้เป๋นแม่ญิงก็เหมือนกั๋น ต้องเป๋นคนมีจื้อเสียงดี บ่ว่าฮ้ายใส่ความคนอื่น มีความปอดีในก๋านใจ๊จีวิต เป๋นคนซื่อสัตย์ในเรื่องต่างๆ
[12] มัคนายกต้องมีเมียคนเดียว ต้องผ่อกอยครอบครัวของตั๋วได้ดี
[13] ย้อนว่ามัคนายกตี้ฮับใจ๊ได้ดี คนตังหลายจะนับถือเขา เขาก็จะแบ่งปั๋นความเจื้อของเขาเกี่ยวกับพระเยซูคริสต์หื้อคนอื่นฟังได้อย่างบ่กั๋วใผ
[14] เถิงแม้ว่าข้าพเจ้าหวังจะมาแอ่วหาต้านเวยๆ นี้ก็ต๋าม ข้าพเจ้าก็ยังเขียนจดหมายนี้หื้อต้านอยู่
[15] ก็เปื้อว่าถ้าข้าพเจ้ามาจ๊า ต้านจะฮู้ว่าจะใจ๊จีวิตจาใดในครอบครัวของพระเจ้า คือคริสตจักรของพระองค์ผู้มีจีวิตอยู่ เซิ่งก๊ำหลักกำสอนตี้เป๋นความจริงแต๊ เหมือนฐานกับเสาตี้เยียะหื้อบ้านตั้งมั่นคง
[16] แม่นแล้ว ข้อล้ำเลิ็กแห่งศาสนาของเฮายิ่งใหญ่ คือว่า พระเยซูคริสต์มาป๋ากฏเป๋นคน แล้วพระวิญญาณบริสุทธิ์แสดงหื้อหันว่าพระองค์เป๋นตี้ปอใจ๋ของพระเจ้า กับหมู่ทูตสวรรค์ได้หันพระองค์ แล้วคนตังหลายได้บอกเรื่องพระองค์หื้อแก่คนกู้จ้าดฮู้ แล้วคนในโลกก็เจื้อพระองค์ กับพระเจ้าก็ฮับพระองค์ไปสวรรค์