[1] E bulan settong e dhalem taon se kapeng dhuwa' saellana bangsa Isra'il nyengla dhari Messer, PANGERAN adhabu ka Mosa e Sagara Beddhi Sinay.
[2] Dhabuna, “E tanggal pa' bellas bulan reya, molae bakto para' compet are, oreng Isra'il kodu araya'agi Paska menorot atoran se la eteptebbagi.”
[4] Daddi Mosa makon bangsa Isra'il araya'agi Paska.
[5] Reng-oreng jareya araya'agi Paska buru e Sagara Beddhi Sinay e bakto para' compet are e tanggal pa' bellas bulan settong. Reng-oreng Isra'il jareya mabadha paraya'an jareya menorot se edhabuwagi PANGERAN ka Mosa.
[6] Tape e antarana reng-oreng Isra'il jareya badha se najjis lantaran nyedding mayyit, daddi ta' olle araya'agi Paska e are jareya. Daddi reng-oreng jareya ngadhep ka Mosa ban Harun,
[7] laju mator, “Kaula paneka najjis polana nyedding mayyit. Namong aponapa kaula me' ebida'agi kantos ta' kengeng ngatorragi kurban ka PANGERAN akadi tan-taretan laenna?”
[8] Dhabuna Mosa, “Nante' gallu sampe' sengko' narema petodu dhari PANGERAN.”
[9] Dhabuna PANGERAN ka Mosa,
[10] “Kabala ka bangsa Isra'il: Mon e antarana ba'na otaba na' potona badha se najjis polana nyedding mayyit, otabana teppa'na ajalanan jau, oreng jareya wajib keya araya'agi Paska.
[11] Tape paraya'an jareya kodu ebadha'agi saellana Paska jareya lebat sabulan, iya areya e malem tanggal pa' bellas bulan dhuwa'. Raya'agi are jareya kalaban ngakan dumba Paska ban roti se ta' eragi'i ban ngan-gangan se pae'.
[12] Kakanan jareya ja' pabadha karena sampe' kalagguwanna, ban tolangnga keban se eatorragi ka Sengko' ja' sampe' badha se potong. Raya'agi Paska jareya menorot sakabbinna atoran se la eteptebbagi.
[13] Sabaligga oreng se ta' najjis, ban ta' teppa'na badha e dhalem parjalanan, tape ta' ajalannagi kawajiban araya'agi Paska jareya, bi' Sengko' la ta' eanggep Tang ommat pole, sabab ta' ngatorragi kurban ka Sengko' e bakto se la etantowagi. Oreng jareya kodu nanggung okomanna dusana.
[14] Mon e antarana ba'na badha oreng manca se la neptep ako-bengko e jadhiya noro'a araya'agi Paska, oreng jareya kodu araya'agi menorot atoran se la eteptebbagi. Hokom jareya kodu etoro' bi' saneyap oreng, ta' parduli oreng jareya tamaso' oreng Isra'il otabana oreng manca.”
[15] E bakto Kemah Socce epaddek, badha ondhem se notobi Kemah jareya. E baja malem ondhem jareya katon akantha apoy.
[17] Mon ondhem jareya ongga, oreng Isra'il abungkar kemahna se ekennengnge, pas mangkat dhari jadhiya. Mon ondhem jareya toron e settong kennengngan, oreng Isra'il pas ambu, laju maddek kemah e jadhiya.
[18] Oreng Isra'il abungkar ban maddek kemah menorot dhabuna PANGERAN. Saabidda ondhem gella' gi' badha e attasanna Kemah Socce, oreng Isra'il paggun neng e parkemahanna jareya.
[19] Mon ondhem jareya sampe' abit badha e attasanna Kemah, oreng Isra'il atoro' ka atoranna PANGERAN, ta' aginjeggan dhari kennengngan jareya.
[20] Tape dhang-kadhang ondhem jareya badha e attasanna Kemah jareya coma barampanan are. Pandha'na, oreng Isra'il paggun neng e parkemahanna otaba ngalle ka parkemahan laen baramma ca'na dhabuna PANGERAN.
[21] Dhang-kadhang ondhem jareya badha e attasanna Kemah pera' molae sar-asar sampe' kalagguwanna gu-laggu, ban e bakto ondhem jareya ongga, seyang otaba malem, oreng Isra'il pas mangkat pole.
[22] Saabidda ondhem jareya gi' badha e attasanna Kemah gella', apa dhu are, sabulan, sataon otaba lebbi, saabidda jareya keya oreng Isra'il ta' aguliyan dhari kennengnganna. Mon ondhemma ongga, buru mangkat pole.
[23] Oreng Isra'il akemah e settong kennengngan ban mangkat ka kennengngan laen menorot dhabuna PANGERAN se epanapa' kalaban parantara'anna Mosa.