[1] E bulan petto' oreng Isra'il la padha neptep e kotthana bang-sebang. E tanggal settong bulan jareya reng-oreng Isra'il jareya padha akompol e Yerusalim, e palataran e adha'na Labang Saketheng Aeng. Reng-oreng jareya menta sopaja Ketab Hokom epakalowar bi' Imam Ezra, ahli e dhalem parkara Hokom se eparengngagi PANGERAN ka Isra'il kalaban parantara'anna Mosa.
[2] Ezra abakta ketab jareya ka adha'na kompolanna reng-oreng se bannya' jareya; se noro' akompol badha lalake'an, babine'an, na'-kana' se la cokop omorra ban la ngarte ka cacana oreng.
[3] Dhari gi' laggu sampe' ban-aban Ezra maossagi Hokom jareya e adha'na reng-oreng jareya; reng-oreng se badha e jadhiya padha ngedhingngagi ce' tarongguna.
[4] Ezra ngadek e membar kaju se ekagabay kaangguy kaparlowanna kompolan jareya. Matica, Semaya, Anaya, Uriya, Hilkiya ban Ma'aseya manjeng e kanganna; dineng Pedaya, Misa'el, Malkiya, Hasum, Hasbadana, Zakhariya ban Mesulam manjeng e kacerra.
[5] Panggung kennengnganna Ezra ngadek jareya atenggiyan dhari reng-oreng jareya, daddi reng-oreng jareya bisa nangale'e ka Ezra. E bakto Ezra buru maos ketab jareya, reng-oreng jareya manjeng kabbi.
[6] Dhabuna Ezra, “Poji PANGERAN, Allah se agung!” Ra'yat padha ngangka' tanangnga epatenggi sambi nyaot, “Amin! Amin!” Samarena laju padha asojud abakte ka Allah.
[7] Saellana jareya reng-oreng jareya padha jaga, pas manjeng e kennengnganna bang-sebang, sabatara reng-oreng Lewi nerrangngagi Hokom jareya ka reng-oreng se bannya' jareya. Reng-oreng Lewi gella' iya areya: Yesuwa, Bani, Serebiya, Yamin, Akub, Sabetai, Hodiya, Ma'aseya, Kelita, Azarya, Yozabad, Hanan ban Pelaya.
[8] Bi' reng-oreng jareya Hokomma Allah jareya gan sabagiyan esalen artena ban eterrangngagi maksodda, daddi ra'yat ngarte apa maksodda se ebaca'agi jareya.
[9] E bakto ngedhing Hokom se ebaca'agi jareya, ra'yat ce' ngennessa, laju nanges. Daddi gubennor Nehemiya ban Imam Ezra ahli Hokom jareya, sarta reng-oreng Lewi se nerrangngagi Hokom jareya, adhabu kantha reya ka ra'yat jareya, “Are teya are se esocceyagi ka GUSTE Allah, daddi ba'na ja' sossa ban ja' nanges.
[10] Sateya mara mole kabbi, pas ngakan ban ngenom paperak. Sabagiyan dhari kakanan ban anggurra ba'na bagi ka reng-oreng se kakorangan. Are teya are se esocceyagi ka PANGERAN, daddi ja' sossa. Kasennengnganna ate se eparengngagi PANGERAN ka ba'na bakal makowada ba'na.”
[11] Bariya keya reng-oreng Lewi masabbar atena ra'yat, ban li-baliyan ebalai kantha reya, “Ja' sossa e are se esocceyagi ka Allah reya.”
[12] Daddi ra'yat jareya laju mole kabbi, ngakana ban nom-ngenoman sarta gi-magiya kakanan ka reng-oreng laen. Kabbi padha neng-sennengngan polana la padha ngarte artena baca'an se ekaedhing e are jareya.
[13] Kalagguwanna sakabbinna kapalana kaom, mam-imam ban reng-oreng Lewi padha akompol, laju nyabis ka Ezra ajara parkara Hokomma PANGERAN.
[14] Reng-oreng jareya pas tao ja' e dhalem Hokom se eparengngagi PANGERAN kalaban parantara'anna Mosa, PANGERAN makon oreng Isra'il enneng e ko-bengkowan darurat saabidda paraya'an Ranggun Dhaun.
[15] Daddi e saantero Yerusalim, e tha-kottha ban e sa-disa, eomommagi parenta kantha reya, “Kassa' padha entar ka nong-gunong, ngala' ca'-ranca'na comara, jaitun, bungkana mennya', palma ban ka'-bungka'an laen, kagabay ko-bengkowan menorot atoran se esebbuttagi e dhalem Ketab Hokom.”
[16] Ra'yat laju mangkat entar ngala' ca'-ranca' jareya. Kabbi padha agabay ko-bengkowan e attassa ata' se rata e bengkona bang-sebang, e palataranna bengkona, e taneyanna Padalemman Socce, e lon-alon, e seddi'na Labang Saketheng Aeng sarta e seddi'na Labang Saketheng Efraim.
[17] Reng-oreng se abali dhari pambuwangan padha agabay ko-bengkowan kantha jareya kabbi, pas padha enneng e ko-bengkowan jareya. Buru sakaleyan jareya ebadha'agi paraya'an kantha jareya sajjegga jamanna Yusak pottrana Nun, daddi reng-oreng jareya padha senneng sarta bunga atena.
[18] Men-rammen jareya pettong are abidda. Sabban are Ezra maossagi essena ketab Hokomma Allah jareya gan sabagiyan. E are se kapeng ballu' ebadha'agi opacara panotoban, menorot atoran se esebbuttagi e dhalem Hokom jareya.