[1] Dhabuna PANGERAN ka Mosa,
[2] kabala ka reng-oreng Isra'il ja' sapa'a bai se ta' etengnget agabay dusa polana ta' atoro' ka sala settonga Tang papakon, kodu neggu'i atoran reya.
[3] Mon se agabay dusa jareya Imam Agung, sampe' bangsa Isra'il noro' sala keya, imam jareya kodu ngurbannagi sape lake' se gi' ngodha se tadha' calena ka PANGERAN sopaja dusana esapora'a.
[4] Imam Agung jareya kodu ngeba sapena ka Kemah Socce, sarta nompangngagi tanangnga e attassa cethagga sape jareya, se pas kodu esambelli e adha'na Kemah Socce.
[5] Sabagiyan dhari dharana kodu egiba maso' ka dhalem Kemah Socce.
[6] Saellana jareya imam agung jareya kodu nyabbur garigi'na ka dhalem dhara jareya, pas ngettessagi dhara e garigi'na jareya pettong kale e adha'anna bir-tabir se egabay batessa Rowangan Se Socce.
[7] Sabagiyan dhari dhara jareya kodu ebuliddagi ka dhu'-tandhu' e du-padduna mezba se egabay kennengnganna dupa ro'om e dhalem Kemah Socce, ban salebbina kodu serammagi ka dhasarra mezbana kurban obbaran se badha e adha'anna labangnga Kemah Socce.
[8] Imam kodu ngala' sakabbinna gajina sape lake' jareya, iya areya gaji se notobi essena tabu'na,
[9] bingselanna ban gajina, ban bagiyanna atena se paleng bagus.
[10] Jareya kabbi kodu eobbar e attassa mezba obbaran akantha se ngobbar kurban salameddan.
[11] Tape dagingnga sape jareya, kole'na, cethagga, bettes ban pokangnga, salebbina essena tabu'na, tamaso' calatthongnga,
[12] kodu egiba kabbi ka lowarra parkemahan. E jadhiya bagiyanna sape se esebbuttagi buru kodu eobbar e attassa kaju e kennengnganna pambuwanganna abu, iya areya kennengngan se pera' ekagabay kaparlowan jareya malolo.
[13] Mon se agabay dusa jareya sakabbinna ommat Isra'il, se ta' etengnget ngalakone sala settong dhari laranganna PANGERAN,
[14] saellana dusa jareya ekataowe, ommat Isra'il jareya kodu ngatorragi sape lake' se gi' ngodha se kodu egiba ka adha'anna Kemah Socce. Sape jareya kodu eatorragi menangka kurban kaangguy pangamponanna dusa.
[15] Para pamimpinna bangsa Isra'il kodu nompangngagi tanangnga e attassa cethagga sape jareya, se pas kodu esambelli e kennengngan jareya.
[16] Imam Agung kodu ngeba sabagiyan dhari dharana sape jareya ka dhalem Kemah Socce.
[17] E jadhiya Imam Agung jareya kodu nyabbur garigi'na ka dharana sape jareya, pas ngettessagi dhara e garigi'na jareya pettong kale e adha'anna bir-tabir se egabay batessa Rowangan Se Socce.
[18] Sabagiyan dhari dhara jareya kodu ebuliddagi ka dhu'-tandhu' e du-padduna mezba kennengnganna dupa e dhalem Kemah Socce, ban karena kodu serammagi ka dhasarra mezba kennengnganna kurban obbaran se badha e adha'anna labangnga Kemah Socce jareya.
[19] Gajina sape jareya kodu ekala' kabbi laju obbar e attassa mezba.
[20] Carana padha ban tor-ator sape lake' kaangguy kurban palebbaranna dusa. Kantha jareya carana Imam Agung ngatorragi kurban kaangguy sa-dusana ommadda, ban sa-dusana reng-oreng jareya bakal esapora'a.
[21] Saellana jareya sape lake' jareya kodu egiba ka lowaranna parkemahan, pas obbar akantha se ngobbar tor-ator sape lake' kaangguy kurban pangamponanna dusana Imam Agung jareya dibi'. Kantha jareya carana ngatorragi kurban pangamponanna dusana ommat.
[22] Mon se agabay dusa jareya oreng se neggu' kakobasa'an, se ta' etengnget ngalakone sala settong dhari laranganna PANGERAN,
[23] saellana apangrasa ja' aba'na agabay dusa, pas kodu ngurbannagi embi' lake' se tadha' calena kaangguy pangamponanna dusana.
[24] Oreng se neggu' kakobasa'an jareya kodu nompangngagi tanangnga e attassa cethagga embi' gella', se pas kodu esambelli e dhaja'anna mezba, kennengnganna panyambelliyanna keban kaangguy kurban obbaran. Jareya tor-ator kaangguy kurban pangamponanna dusa.
[25] Imam jareya kodu mamaso' garigi'na ka dhalem dharana embi' jareya, ban dhara e garigi'na jareya kodu buliddagi ka dhu'-tandhu' e saneyap padduna mezba ban karena kodu eserammagi ka dhasarra mezba.
[26] Saellana jareya gajina embi' jareya kabbi kodu eobbar e attassa mezba, akantha carana kurban salameddan. Kantha jareya carana imam ngatorragi kurban kaangguy dusana oreng se neggu' kakobasa'an, sopaja dusana jareya esapora'a bi' PANGERAN.
[27] Mon se agabay dusa jareya sala settong dhari ra'yat biyasa se ta' etengnget ngalakone sala settonga laranganna PANGERAN,
[28] saellana oreng jareya tao ja' aba'na dusa, oreng jareya kodu duliyan ngurbannagi embi' bine' se tadha' calena.
[29] Oreng jareya kodu nompangngagi tanangnga e attassa cethagga embi' jareya, se pas kodu esambelli e dhaja'anna mezba, kennengnganna panyambelliyanna keban kaangguy kurban obbaran.
[30] Imam kodu nyabbur garigi'na ka dhalem dharana embi' jareya, pas abuliddagi dhara e garigi'na jareya ka dhu'-tandhu' e saneyap padduna mezba, ban nyerammagi karena dharana ka dhasarra mezba.
[31] Gajina embi' jareya kodu ekala' kabbi akantha gajina keban se ekagabay kurban kasalameddan. Gaji jareya kodu eobbar bi' imam e attassa mezba, sopaja bauna masennengnga panggaliyanna PANGERAN. Kantha jareya carana imam ngatorragi kurban kaangguy dusana oreng dhari ra'yat biyasa, sopaja dusana jareya esapora'a bi' PANGERAN.
[32] Mon se ekurbannagi jareya dumba kaangguy pangamponanna dusana, dumba jareya kodu babine' ban ta' olle badha calena.
[33] Oreng jareya kodu nompangngagi tanangnga e attassa cethagga dumbana, se pas kodu esambelli e dhaja'anna mezba, kennengnganna panyambelliyanna keban kaangguy kurban obbaran.
[34] Imam kodu mamaso' garigi'na ka dhalem dharana dumba jareya, pas abuliddagi dhara e garigi'na jareya ka dhu'-tandhu' e saneyap padduna mezba, ban nyerammagi karena dharana ka dhasarra mezba.
[35] Saellana jareya gajina dumba jareya kodu ekala' kabbi akantha kurban salameddan. Gaji jareya kodu eobbar e attassa mezba, epabareng ban kurban kakanan se eatorragi ka PANGERAN. Kantha jareya carana imam ngatorragi kurban kaangguy dusana oreng jareya, sopaja dusana jareya esapora'a bi' PANGERAN.