[1] PANGERAN abu-dhabu kadhukaleyanna ka Yunus.
[2] Dhabuna, “Kassa' ba'na entar ka Niniwe, kottha se raja rowa, ban panapa' ka ra'yadda Tang sen-pessen rowa.”
[3] Yunus atoro' ka dhabuna PANGERAN, pas meyos ka Niniwe, settong kottha se ce' rajana; dhari rajana, mon oreng lebada e kottha jareya sampe' tello are abidda.
[4] Yunus maso' ka kottha jareya ban saellana alomampa saare benteng, laju molae akotbah, dhabuna, “Pa' polo are aggi' Niniwe reya bakal ancora.”
[5] Oreng Niniwe parcaja ka dhabuna Allah jareya. Ra'yadda kabbi motossagi apowasa'a, ban sakabbinna oreng, raja otaba kene', padha ngangguy kalambi karong kaangguy noduwagi tobadda atena dhari sa-dusana.
[6] E bakto rato Niniwe meyarsa kabar jareya, pas duli toron dhari tahtana. Juba karaja'anna ebukka', pas asalen ngagem rasogan karong, sarta pas alenggi e attassa abu.
[7] Salaenna jareya rato buru makalowar ma'lumat se monyena kantha reya, “Parenta reya epakalowar e Niniwe kalaban kapotosanna rato ban para mantre: sakabbinna oreng, sape, dumba sarta ebin laenna padha ta' olle ngakan ban ta' olle ngenom.
[8] Manossa sarta ban-keban kodu akalambi karong. Menangka tandhana tobat sakabbinna oreng kodu adu'a kalaban gu-onggu ka Allah. Reng-oreng jareya kabbi kodu ngoba tengkana se jahat sarta lalakonna se possa' dusana.
[9] Sapa tao me' pola Allah bakal ngoba'a kasokanna sarta ta' duka pole, daddi sengko' ban ba'na burung se mateya!”
[10] Allah ngoladi apa se elakone reng-oreng jareya; Salerana ngoladi ja' reng-oreng jareya la ambu ta' atengka juba' pole. Daddi Allah pas ngoba kapotosanna ban burung se ngokoma reng-oreng jareya.