[1] PANGERAN adhabu, “E bakto jareya kama'moranna Yerusalim ban Yehuda bi' Sengko' epabaliya akantha asalla.
[2] Sa-bangsa bi' Sengko' epakompola kabbi egiba'a ka Cora Panghakiman. Sa-bangsa jareya bi' Sengko' eadilana polana kajahadanna ka Tang ommat, iya reya gi-magi tana Isra'il sarta mowang Tang ommat ka pan-barampan nagara.
[3] Sa-bangsa jareya mabadha lottre kaangguy neptebbagi sapa se bakal olleya reng-oreng tawanan. Ban-paraban sarta lalake'an se gi' ngodha ejuwal epadaddi dunor. Ollena pessena egabay entar ka sondel ban kaangguy ngenom anggur.
[4] Epabaramma'a Sengko' reya bi' ba'na, he, Tirus, Sidon ban sakabbinna dhaera Filistin? Apa ba'na terro malessa sake' atena ka Sengko'? Sateya, tarema Tang babales se ceppet padhatengnga.
[5] Tang emmas ban Tang salaka bi' ba'na ebigal, Tang dhi'-andhi' se aji bi' ba'na eangko' ka kowella.
[6] Pandhudhu' Yehuda ban Yerusalim bi' ba'na egiba epajau dhari nagarana; saellana jareya bi' ba'na pas ejuwal ka oreng Yunani.
[7] Sateya reng-oreng jareya bi' Sengko' epakalowar dhari kennengnganna se ejuwal bi' ba'na jareya, ban Sengko' malessa kajahadanna ba'na ka reng-oreng jareya.
[8] Na'-ana'na ba'na se lalake' ban babine' bi' Sengko' ejuwala ka oreng Yehuda; bi' reng-oreng Yehuda na'-ana'na ba'na jareya pas bakal ejuwala pole ka Syeba, nagara se ce' jauna. Sengko', PANGERAN, la ngoca'.
[9] Kabala ma'lumat reya ka sa-bangsa: Mara aya-sadhiya kaangguy aperrang ban ngadduwa kakowadan! Pakalowar sakabbinna pandhekar sarta pahlawan; pakompol sakabbinna parjurit, pas maju!
[10] Tette salagana kagabay peddhang, ban ladding panyokorra kagabay pakakas se epanyoddu'a moso. Bariya keya oreng se ta' andhi' kakowadan kodu ngoca', ‘Sengko' bisa aperrang akantha tantara!’
[11] Mara, duli nyander, he, sa-bangsa dhari saantero padduna bume! Mara akompol e cora e dhissa' rowa.” Adhu, GUSTE, pakonnagi tantaraepon Junandalem nyerrang reng-oreng ka'dhissa'!
[12] PANGERAN adhabu pole, “Para bangsa kodu aya-sadhiya sarta entar ka Cora Panghakiman. E jadhiya Sengko' ngadilana sa-bangsa tatanggana Tang ommat.
[13] Sa-bangsa jareya ce' jahadda; tatta' kabbi papadha ban darigu se la towa neng e teggal. Nyek-enyek papadha ban anggur e dhalem pamerressanna anggur se possa' sampe' nompa.
[14] Oreng se badha e Cora Panghakiman abun-ebun bannya'na. Sabab e jadhiya Arena PANGERAN la para' napa'a baktona.
[15] Are ban bulan petteng, ban tang-bintang ta' nyonar pole.”
[16] PANGERAN adhabu dhari Siyon, gunongnga sowarana duka agarudhu'; dhari Yerusalim sowarana akantha monyena galudhuk. Sampe' langnge' ban bume agundhek. Tape Pangeran bakal teptebba abilla sarta ngaobana Isra'il, ommadda.
[17] “He, Isra'il, sateya ba'na bakal taowa, ja' Sengko' reya PANGERAN, Allahna ba'na. Sengko' enneng e Siyon, Tang gunong se socce. Daddi Yerusalim noro' daddi kottha se socce keya, oreng manca ta' kera maso' ka jadhiya pole.
[18] E bakto jareya nong-gunong bakal possa'a ban kebbun anggur. Ebin bakal ngakana rebba e mo'-gumo' se landhu. Ngay-songay e Yehuda ta' kera tao asat aengnga. Badha songay settong se agiliya dhari Padalemman Socce, sarta mabacca Cora Akasiya kalaban aengnga se nyaman.
[19] Messer bakal daddiya sagara beddhi se kajal, ban Edom daddi kajal, ta' ekennengnge oreng. Sabab reng-oreng jareya la nyerrang Yehuda, sarta mate'e reng-oreng e nagara jareya se tadha' salana.
[20] Sengko' malessa kaangguy dharana reng-oreng jareya, se mate'e bi' Sengko' etatta'a. Tape Yehuda ban Yerusalim bakal pagguna badha orengnga saterrossa, dineng Gunong Siyon bi' Sengko' paggun ekennengngana.”