[1] Daddi kaangguy kadhukaleyanna rato ban Haman adhadha'aran ban nom-ngenoman asareng ban Ester.
[2] Sambi adha'ar aeng anggur, rato adhabu pole ka Ester, “Sateya, tang Parameswari, mara koca'agi apa se epenta'a ba'na! Bi' sengko' masthe eberri', maske se epenta'a ba'na saparona tang karaja'an.”
[3] Atorra Dinaju Rato Ester, “Manabi junandalem kasokan, abdidalem nyo'ona sopaja abdidalem sareng bangsa abdidalem sadaja eedine odhi'.
[4] Sabab abdidalem sareng bangsa abdidalem sadaja ampon padha ejuwal kaangguy epate'e. Ja' sakenga namong ejuwal ekadunora, abdidalem tanto neng-enneng saos, ta' kera marepot ka junandalem. Namong samangken abdidalem sareng bangsa abdidalem sadaja padha epateyana, epamosna'a!”
[5] Rato Ahasyweros laju mareksa ka Dinaju Rato Ester, “Sapa jareya orengnga ban badha e dhimma oreng se andhi' neyat kantha jareya?”
[6] Atorra Ester, “Moso se nganeyaja'a bangsa abdidalem enggi ka'dhinto Haman, oreng se jahat ka'dhinto!” Haman katako'en ngoladi ka rato ban dinaju rato.
[7] Rato talebat dukana, pas ngadek adinggallagi mejana, terros ka lowar, ka kebbunna karaton. Haman ngagali, ja' rato la motossagi ngokoma salerana, daddi paggun alenggi e kapotren jareya, nyo'ona partolongan ka Ester sopaja ta' epateyana.
[8] Haman la ta' andhi' pangarebban, laju malabu ka dipan kennengnganna Ester ren-sarenan, maksodda nyo'ona sapora, tape e bakto jareya keya rato abali dhari kebbunna karaton. Ngoladi Haman se kantha jareya, rato adhabu epakaja, “Apa? Sela kantha reya gi' bangal arosaga dinaju rato e dhinna', e adha'anna sengko' ban e tang karaton dibi'?” Rato buru mare se adhabu kantha jareya, reng-oreng kobiriyan se ajaga e jadhiya maso' ngeba ko'-buko', ebuko'agi ka mowana Haman.
[9] Harbona, sala settong e antarana reng-oreng kobiriyan jareya, mator kantha reya, “Guste, e seddi'annepon bengkona Haman badha cangga pagantongan se tenggina dhu lekor meter. Haman se abadhi cangga gapaneka, epagantonga Mordekhai, oreng se ampon masalamet nyabaepon junandalem.” Rato laju adhabu, “Gantong Haman e jadhiya!”
[10] Daddi Haman laju egantong e cangga se epaddek epagantonga Mordekhai jarowa. Saellana jareya buru dukana rato jareya elang.