[1] “Sateya ba'na olle mele, berkat otabana babaston akantha se la eterrangngagi bi' sengko' rowa. Mon ba'na la ngalame sakabbinna kasangsara'an jareya ban odhi' epasalebbudan e antarana sa-bangsa bi' GUSTE Allahna, ba'na tanto pas enga' ja' bi' sengko' ba'na la eberri' pameleyan.
[2] Mon ba'na ban na' potona atobat, abaliya ka GUSTE Allahna, sarta kalaban gu-onggu ate ngestowagi sakabbinna papakonna se bi' sengko' eajarragi ka ba'na are teya reya,
[3] tanto GUSTE Allah bellas ka ba'na. Bi' PANGERAN ba'na tanto epakompol pole dhari kennengnganna se asalebbudan e antarana sa-bangsa, sarta pas epama'mor pole.
[4] Sanajjan ba'na asalebbudan daddi sabume, ba'na tanto epakompol ban ebakta abali bi' GUSTE Allahna.
[5] Tana se lamba' ekennengnge bangatowana ba'na, bakal ekaandhi'a ba'na pole. Ban ba'na bakal epadaddiya lebbi ma'mor, ban bannya'na ba'na bakal alebbidana dhari bangatowana.
[6] Ba'na sana' potona bakal eparengngana ate se ta'at, sopaja ba'na taresna kalaban gu-onggu ate ka GUSTE Allahna ban bisa terros ngennengnge nagara jarowa.
[7] Sakabbinna babaston rowa bakal teba'a ka so-mosona ba'na, se baji' ka ba'na ban se nyeksa ba'na.
[8] Ba'na bakal ta'ada pole ka PANGERAN ban ajalannagi sakabbinna papakonna se eajarragi sengko' ka ba'na are teya reya.
[9] Bi' GUSTE Allah ba'na eparengngana olle hasel e dhalem sakabbinna usahana; ba'na bakal epabannya'a ana'na ban ebinna; gal-teggalla ba'na bakal bannya'a hasella. PANGERAN senneng panggaliyanna apareng kama'moran ka ba'na, akantha gi' lamba' Salerana senneng keya panggaliyanna apareng kama'moran ka bangatowana ba'na.
[10] Tape ba'na kodu ta'at ka GUSTE Allahna ban ngestowagi sakabbinna hokomma se etoles e dhalem buku reya, iya areya buku Hokomma PANGERAN. Ba'na kodu abali ka Salerana kalaban gu-onggu ate.
[11] Parenta se bi' sengko' epanapa' ka ba'na reya ta' pate malarat ban banne barang se ta' ekenneng lakone bi' ba'na.
[12] Kennengnganna banne e langnge', daddi ba'na ta' olle atanya kantha reya, ‘Sapa se ongga'a dha' essa', se ngala'agiya papakon jareya me' olle sengko' bisa ngedhing ban ajalannagi?’
[13] Bariya keya kennengnganna banne e kennengngan se alengka tase', daddi ba'na ta' olle atanya kantha reya, ‘Sapa se entara alengka tase', se ngala'agiya papakon jareya me' olle sengko' bisa ngedhing ban ajalannagi?’
[14] Ja' atanya kantha jareya, sabab papakon jareya badha e seddi'anna ba'na. Ba'na la tao ban la apal, daddi ba'na pera' kare ajalannagi.
[15] Are teya ba'na olle mele se becce' otaba se juba', mele odhi' otaba mate.
[16] Are teya sengko' marenta'agi ka ba'na sopaja ba'na taresna ka GUSTE Allahna, ta'at ka Salerana, ngestowagi kom-hokom ban papakonna, me' olle ba'na ma'mor ban daddi bangsa se raja. Ba'na bakal eberkadana bi' GUSTE Allahna e nagara se sakejja' aggi' bakal ekennengngana ba'na rowa.
[17] Tape mon ba'na ta' ta'at ban ta' endha' ngedhingngagi, ban endha' eajak oreng lebat jalan se sala, nyemba ka la'-alla'an,
[18] ba'na tanto epatompes. Kaenga'e, ya, jareya bi' sengko' la epaenga' ka ba'na sateya reya. Ba'na ta' kera abit odhi' e nagara e bara'na Songay Yordan se ekennengngana ba'na rowa.
[19] Sateya ba'na olle mele, odhi' apa mate, berkadda Pangeran otaba babastonna. Langnge' ban bume bi' sengko' egabaya saksena potosanna ba'na. Mara mele odhi'.
[20] Taresnae GUSTE Allahna, pata'at ban paesto ka Salerana. Tanto ba'na ban na' potona eparenge odhi' abit e nagara se ejanjiyagi PANGERAN ka bangatowana ba'na, Ibrahim, Ishak ban Yakub.”