[1] Lema are saellana jareya, Imam Agung Ananiyas ban pin-pamimpin Yahudi meyos ka Kaisareya abareng ban pangacara se anyama Tertulus. Sanapa'na ka jadhiya pas ngadhep ka Gubennor Feliks sarta areppottagi Paulus.
[2] E bakto esoro maju, Tertulus laju areppottagi Paulus kantha reya, “Towan Gubennor Se Molja! E dhalem pamarenta'annepon panjennengngan nagara abdina taremtem. Jugan dhari kabicaksana'annepon panjennengngan ampon bannya' se epalerres sareng panjennengngan kaangguy kaparlowannepon bangsa abdina.
[3] Sadajaepon gapaneka etarema kalaban pangarga'an se talebat tenggina e man-ka'dhimman, ban abdina sadaja ce' sakalangkongnga ka panjennengngan.
[4] Namong, sopaja ta' bannya' baktoepon panjennengngan se tabuwang, abdina sadaja nyo'ona kasokana panjennengngan meyarsa'agi reppodan abdina se rengkes ka'dhinto'.
[5] Abdina sadaja padha manggi'i ja' oreng ka'dhinto' tokang madhateng rarusu se babaja. E man-ka'dhimman oreng ka'dhinto' madhateng rarusu e antaraepon reng-oreng Yahudi, sarengngan oreng ka'dhinto' daddi kapalana gerrakannepon reng-oreng Nazaret.
[6] Oreng ka'dhinto' la'-mala' ampon ngoddi manajjisa Padalemman Socce, tape sareng reng-oreng Yahudi laju etangkep. [Abdina sadaja amaksod ngadilana oreng ka'dhinto' menorot hokomma agamana bangsa abdina dibi'.
[7] Namong komandhan Lisiyas arebbu' oreng ka'dhinto' dhari abdina sadaja,
[8] sareng makon sopaja reng-oreng se areppottagi oreng paneka padha ngadhep ka panjennengngan.] Manabi panjennengngan ampon mareksa oreng ka'dhinto', panjennengngan dibi' tanto meyarsa dhari oreng paneka ja' sadaja se ereppottagi abdina parkara oreng ka'dhinto' pajat lerres.”
[9] Reng-oreng Yahudi se badha e jadhiya noro' agugat Paulus keya sarta abendherragi pa-apa se ekoca'agi Tertulus.
[10] Gubennor jareya laju apareng tandha ka Paulus ja' salerana eedine abu-dhabu. Daddi Paulus adhabu, “Abdina oneng ja' panjennengngan daddi hakim e nagara ka'dhinto' ampon ataonan abidda. Daddi abdina arassa senneng ngajuwagi pambilla'an abdina e ajunannepon panjennengngan.
[11] Panjennengngan kengeng nalektegi dibi' ja' ta' lebbi dhari dhubellas are se kapongkor abdina entar ka Yerusalim asambajanga.
[12] Reng-oreng Yahudi ta' oneng manggi'i abdina atokar sareng pasera'a saos, otabana makompol oreng kaangguy mabadha rarusu e Padalemman Socce otabana e kennengnganna kabakteyan otabana e ka'dhimma'a saos e dhalem kottha.
[13] Reng-oreng ka'dhinto' jugan ta' kera bisa abukteyagi sadajana se earannagi ka abdina e ajunannepon panjennengngan.
[14] Pajat abdina kodu ngakone e ajunanna panjennengngan ja' abdina nyemba Allahepon bangatowa abdina sadaja menorot pangajarannepon Isa se sareng reng-oreng Yahudi eanggep sala. Namong abdina gi' parcaja ka sadajaepon se etoles e dhalem Ketab Mosa sareng Ketabba Bi-nabbi.
[15] Akadi reng-oreng Yahudi gapaneka, abdina jugan gadhuwan pangarebban ka Allah ja' sadajana oreng bakal odhi'a pole saamponna mate -- sadajana oreng se sae, jugan se juba'!
[16] Lantaran gapaneka abdina terros aehteyar epagu-onggu, sopaja essena ate abdina teptep berse e dhalem panggaliyanna Allah sareng e adha'epon manossa.
[17] Saamponna pan-saponapan taon tadha' e Yerusalim, abdina abali ka kottha gapaneka, marengngagiya bantowan pesse ka bangsa abdina sarengngan jugan parlo ngatorragiya kurban ka Allah.
[18] E bakto abdina ajalannagi maksod gapaneka, reng-oreng ka'dhinto' manggi'i abdina e Padalemman Socce, saamponna abdina lastare ajalannagi opacara nyocce'e aba'. E bakto gapaneka e ka'dhissa' ta' bannya' oreng, sarengngan jugan tadha' rarusu.
[19] Namong badha reng-oreng Yahudi dhari propinsi Asia. Reng-oreng gapaneka se samasthena badha e ka'dhinto' se areppot ka panjennengngan, manabi badha se earannagiya ka abdina.
[20] Otabana diggal me' olle reng-oreng ka'dhinto' notorragi dibi' kajahadan ponapa se epanggi elakone abdina e bakto abdina eadhebbagi ka Mahkamah Agama.
[21] Reng-oreng ka'dhinto' namong manggi settong okara ka'dhinto' saos se ekoca'agi abdina e adha'epon, enggi ka'dhinto': Kaula eadili e are mangken polana kaula parcaja ja' oreng se mate bakal epaodhi'a pole.”
[22] Feliks se la bannya' ngagali parkara pangajaranna Isa, pas notop sidhangnga parkara jareya. “Sengko' motosana parkara reya,” dhabuna, “mon komandhan Lisiyas la dhateng dha' enna'.”
[23] Saellana jareya, Feliks pas apareng parenta ka parwira se epassrae ajaga Paulus, sopaja Paulus teptep etahan tape sopaja eberri'i kabebasan sakone' ban ngedine ca-kancana ngatore pa-apa kaparlowanna.
[24] Saellana olle pan-barampan are dhari jareya Feliks rabu bi' rajina se anyama Drusila; Drusila jareya oreng Yahudi. Feliks pas makon oreng ngone'e Paulus, ban saellana jareya laju meyarsa'agi Paulus nerrangngagi parkara parcaja ka Isa Almasih.
[25] Tape e bakto Paulus nerrossagi abu-dhabu parkara kajujuran ban tahan napso ban okoman e Are Keyamat, Feliks laju tako', pas adhabu, “Kassa' ba'na abali ka kennengnganna sateya. Bi' sengko' ba'na eologa pole mon badha kasempadan.”
[26] Sabatara jareya Feliks ngarep olleya pesse dhari Paulus. Jareya sababba Feliks li-baliyana makon oreng ngone'e Paulus, eajaga abu-dhabu.
[27] Saellana olle dhu taon, Gubennor Feliks egante Perkiyus Festus. Sarrena Feliks terro ngala'a atena reng-oreng Yahudi, daddi Paulus paggun epenjara.