[1] Sabatara jareya, Samuwel se gi' kana' rowa aladine PANGERAN ejaga bi' Eli. E bakto jareya rangrang PANGERAN asen-pessen otaba ngaton.
[2] E settong malem, Eli se la ce' towana ban para' buta'a rowa asaren e kamarra,
[3] ban Samuwel tedhung e seddi'anna Petthe Parjanjiyanna PANGERAN, e Kemah Socce. E bakto pajjar gi' ta' ngombar ban damar gi' odhi',
[4] PANGERAN adikane Samuwel, Samuwel nyaot, “Ka'dhinto, Pa'?”
[5] Samuwel pas berka' ka kennengnganna Eli, laju mator, “Ponapa, Pa', abdina me' edikane?” Saodda Eli, “Enja', sengko' ta' ngolok ba'na, kassa' la dhung-tedhung pole.” Daddi Samuwel pas abali ka katedhunganna.
[6] PANGERAN adikane Samuwel pole, tape kana' jareya ta' tao ja' se ngolok jareya PANGERAN, sabab sabellunna jareya PANGERAN ta' tao abu-dhabu ka aba'na. Daddi Samuwel jaga pas entar ka Eli laju mator, “Badha ponapa, pa', abdina me' edikane?” Saodda Eli, “Enja', na', sengko' ta' ngolok ba'na; kassa' la dhung-tedhung pole.”
[8] PANGERAN adikana Samuwel katellokaleyanna; Samuwel jaga, pas entar ka Eli laju mator, “Badha ponapa, Pa', abdina me' edikane?” Eli pas apangrasa ja' PANGERAN se adikane kana' jareya,
[9] daddi pas adhabu ka kana' jareya, “Kassa' la dhung-tedhung pole; mon badha se ngolok ba'na pole, ba'na ngoca' kantha reya, ‘Ngereng adhabu, GUSTE, abdidalem merengngagi.’ ” Daddi Samuwel abali ka katedhunganna pole.
[10] PANGERAN pas rabu, ngadek e jadhiya sarta adikane pole, “Samuwel! Samuwel!” Samuwel nyaot, “Ngereng adhabu, GUSTE, abdidalem merengngagi.”
[11] Dhabuna PANGERAN ka Samuwel, “Sengko' madhatengnga settong kadaddiyan se talebat nako'e ka bangsa Isra'il, sampe' sapa'a bai se ngedhing tanto pas bingong.
[12] E are jareya Sengko' ajalannagiya Tang ancaman ka saessena bengkona Eli molae dhari adha' sampe' ka budhi.
[13] Bi' Sengko' Eli la ebalai ja' saessena bengkona bi' Sengko' eokoma salanjangnga sabab na'-ana' lake'na ya-nyeya Sengko'. Eli tao ja' na'-ana'na jareya ngalakone dusa jareya, tape bi' Eli epanneng bai.
[14] Daddi Sengko' asompa parkara ana' binena Eli, ja' dusana na'-ana'na se talebat rajana jareya ta' ekenneng paelang bi' kurban otabana tor-ator apa'a bai sampe' salanjangnga.”
[15] Samuwel pas tedhung pole sampe' gi' laggu, saellana jaga pas mokka'e bang-labangnga Padalemman Socce. Aba'na ta' bangal abala ka Eli parkara se etangale'e malemmanna jareya.
[16] Tape Eli ngolok kana' jareya, dhabuna, “Samuwel, na'!” “Ka'dhinto, Pa',” saodda Samuwel.
[17] “Apa se edhabuwagi Pangeran ka ba'na?” dhabuna Eli. “Kabala kabbi ka sengko'. Mon bi' ba'na badha se ealengngagi, ba'na tanto eokom bi' Allah.”
[18] Daddi bi' Samuwel kabbi ecareta'agi ka Eli; tadha' se ealengngagi. Dhabuna Eli, “Se adhabu jareya PANGERAN; dina apa se eanggep paleng becce' me' olle elampa'agi.”
[19] Samuwel atamba raja, terros esarengnge PANGERAN; sabarang se edhabuwagi Samuwel bi' PANGERAN epakalakon kabbi.
[20] Lantaran jareya ommat Isra'il sanagarana padha ngakone ja' Samuwel jareya nabbina PANGERAN. Mon Samuwel abu-dhabu, ommat Isra'il padha ngedhingngagi kabbi. PANGERAN terros ngaton e Silo, kennengnganna Salerana se ngaton ban abu-dhabu dha'-adha'na ka Samuwel jareya.