[1] Сiйö лунö керкаысь петöм бöрын Исус лэччис ты дорö да пуксис.
[2] Зэв уна йöз чукöртчис Исус дiнö, Сылы весиг ковмис пуксьыны пыжö, а йöзыс сулалiсны вадорас.
[3] Исус висьталiс налы уна велöданвисьт: «Морт кöдзны петас.
[4] Кöдзигас кымынкö кöйдыс усяс туй бокö. Сэтчö воасны лэбачьяс да кокаласны.
[5] Кымынкö кöйдыс усяс изъяинö. Этша муыс вöсна ляпкыдiнад найö öдйö чужасны.
[6] Петас шондi, пöжны пондас, и омöль вужъя петасыд косьмас.
[7] Кымынкö кöйдыс усяс лежнöг пöвстö. Быдмигас лежнöгыс пöдтас петассö.
[8] Мукöд кöйдысыс усяс бур муö да ваяс уна тусь: öтияс – сё пöв, мöдъяс – квайтымын пöв, коймöдъяс – комын пöв.
[9] Кодлöн эм пель, мед кылö!»
[10] Велöдчысьяс матыстчисны Исус дiнö да юалiсны: «Мыйла Тэ сёрнитан йöзыскöд велöданвисьтъясöн?»
[11] Исус вочавидзис: «Енэжвыв Юралöмлысь гусяторъяссö тiянлы сетöма тöдны, а налы абу.
[12] Кодлöн эм, сылы коланасьыс унджык на сетасны. Кодлöн абу, сылысь бöръясö босьтасны.
[13] Найö видзöдöны да оз аддзыны, кывзöны да оз кывны и оз гöгöрвоны. Та вöсна сёрнита накöд велöданвисьтъясöн.
[14] Исай пророклöн шуöмыс инö: – Пельнаныд кутанныд кывзыны да онö гöгöрвоöй, синнаныд кутанныд видзöдны да онö аддзöй.
[15] Чорзьöма тайö войтырыслöн сьöлöмыс, сьöкыд пеляöсь, куньса синмаöсь. Аддзынысö оз зiльны, кывзынысö оз кöсйыны, сьöлöмнаныс оз гöгöрвоны. Мелань бергöдчынысö оз кöсйыны, медым Ме бурдöдi найöс.
[16] Тi шудаöсь, öд тiян синныд аддзö да пельныд кылö.
[17] Веськыда висьтала тiянлы: уна пророк да веськыда олысь кöсйисны аддзывны, мый тi аддзанныд, но эз аддзывны. Кöсйисны кывны, мый тi кыланныд, но эз кывлыны».
[18] «Кывзöй, Ме гöгöрвоöда тiянлы кöдзысь йылысь велöданвисьтöс.
[19] Мортыс кылö Енлöн Юралöм йылысь да оз гöгöрво. Сы дiнö локтö омöльыс да гусялö сьöлöмас кöдзöмасö. Тайöс петкöдлö туй бокö усьöм кöйдыс.
[20] Изъяинö усьöм кöйдысыс петкöдлö: мортыс кылö Кывсö да дзик пыр долыдпырысь босьтö сiйöс сьöлöмас,
[21] но вужъясьтöмысла оз дыр эскы, Ен Кыв вöсна дзескöдiгöн-вöтлiгöн сiйö эновтчö эскöмсьыс.
[22] Лежнöг пöвстö усьöм кöйдысыс петкöдлö: мортыс кылö Кывсö, но быдлунъя тöждыс да озырмыны ыштöмыс пöдтö кöдзöм Кывсö, и сiйö оз вай вотöссö.
[23] Бур муö кöдзöм кöйдысыс петкöдлö: мортыс кылö Кывсö, гöгöрвоö сiйöс да вайö вотöс: öтияс – сё пöв, мöдъяс – квайтымын пöв, коймöдъяс – комын пöв».
[24] Исус висьталiс мöд велöданвисьт: «Енэжвыв Юралöмыс татшöм. Морт кöдзас аслас муö бур кöйдыс.
[25] Войнас узигкостiыс локтас паныд мунысь да шобдi кöйдыс костас ёг турун кöдзас, сэсся мунас.
[26] Шобдi петас, кутас шептасьны, ёг турун тшöтш мыччысяс.
[27] Кесйöгъяс локтасны овмöс кутысьныс дiнö да шуасны: "Ыджыдöй, эн-ö бур кöйдыс тэ кöдзлы муад? Кытысь нö ёг туруныс сэтчö петöма?"
[28] Сiйö вочавидзас: "Паныд мунысь тайöс вöчöма". Кесйöгъяс шуасны: "Кöсъян кö, ёг турунсö ми нетшкам".
[29] Мöдыс вочавидзас: "Оз ков. Ёг турун сорнас шобдi петассö тшöтш верманныд нетшыштны.
[30] Кольöй, мед быдмасны öтлаын вундан кадöдзыс. Сэки ме тшöкта вундысьяслы: медводз ёг турунсö чукöртöй, сэсся кольтаясö кöртавлöй да сотöй, а шобдiсö идралöй менам йöртöдö"».
[31] Мöд велöданвисьт Исус висьталiс налы: «Енэжвыв Юралöмыс муö кöдзöм горчица тусь кодь.
[32] Став кöйдыссьыс сiйö медпосни. Сiйö быдмö да лоö пу кодь, став пуктассьыс ыджыд, весиг енэжвыв лэбачьяс поздысьöны вожъясас».
[33] Исус нöшта öти велöданвисьт висьталiс: «Енэжвыв Юралöмыс няньшом кодь. Ань гудралас сэтчö куим шомöс тыр пызь, кад мысти няньыс ловзяс».
[34] Ставсö тайöс Исус висьталiс йöзыслы велöданвисьтъясöн. Висьтъястöг эз сёрнитлы накöд,
[35] медым инiс пророклöн шуöмыс: – Ме велöданвисьтъясöн сёрнита, му пуксьöмсяньыс дзебöмасö юöрта.
[36] Йöзсö кольöм бöрын Исус пырис керкаö. Сэтчö локтiсны велöдчысьясыс да найö корисны: «Гöгöрвоöд миянлы ёг турун йылысь висьттö».
[37] Исус висьталiс: «Бур кöйдыссö кöдзысьыс – Морт Пи.
[38] Кöдза муыс – муюгыд. Бур кöйдысыс – Енлöн йöзыс, ёг туруныс – омöльлöн йöзыс.
[39] Паныд мунысьыс, ёг турунсö кöдзысьыс, – омöль. Вундан кадыс – нэм пом, вундысьясыс – анделъяс.
[40] Кыдзи чукöртöм ёг турунсö сотöны, тадзи лоö нэм помасигöн.
[41] Морт Пи Ассьыс анделъяссö мöдöдас чукöртны Аслас Юраланiнысь став ыштöдысьсö да лёк вöчысьсö.
[42] Сэсся шыбитасны найöс биö. Сэнi лоö бöрдöм да пинь йирöм.
[43] Веськыда олысьяс сэки Батьныс Юраланiнын шондi моз кутасны югъявны. Кодлöн эм пель, мед кылö!»
[44] «Енэжвыв Юралöмыс муö дзебöм озырлун кодь. Морт аддзас муысь озырлун да сiйöс бöр гуалас. Нимкодьысла сiйö мунас, вузалас ассьыс став овмöссö да ньöбас тайö мусö.
[45] Енэжвыв Юралöмыс татшöм. Дона изъясöн вузасьысь мунас корсьны мича изъяс
[46] да аддзас донасьыс-дона из. Сiйö мунас, вузалас ассьыс став овмöссö да ньöбас тайö изсö».
[47] «Енэжвыв Юралöмыс саридзö вöйталöм тыв кодь. Быдсяма чериыс сэтчö шедас.
[48] Тывсö вадорö лэптöм бöрын чери кыйысьяс бур черисö дозйö чукöртасны, лёксö шыблаласны.
[49] Тадзи лоö нэм помасигöн: анделъяс локтасны, торйöдасны лёк йöзöс веськыда олысьясысь
[50] да биö шыбитасны. Сэнi лоö бöрдöм да пинь йирöм».
[51] Исус юалiс: «Ставсö-ö гöгöрвоинныд?» Велöдчысьяс вочавидзисны: «Гöгöрвоим, Господь».
[52] Исус шуис налы: «Индöдö велöдысь, кодi тöдö Енлысь Юралöмсö, керка кутысь кодь, кодi аслас видзанiнысь выльсö и важсö петкöдö».
[53] Тайö велöданвисьтъяссö висьталöм бöрын Исус мунiс сэтысь
[54] Аслас карö. Сэнi велöдiс йöзсö синагогаын. Кывзысьяс шензьöмöн шуалiсны: «Кытысь Сылöн татшöм мывкыдлуныс да татшöм выныс?
[55] Абу-ö Сiйö тшупсьысьлöн пи? Абу-ö Сылöн мамыс Мария, а вокъясыс – Яков, Иосей, Симон да Иуда?
[56] Оз-ö танi овны Сылöн чойясыс? Кытысь Сылöн ставыс тайö?»
[57] Тадзи Сiйöс öтдортiсны. Исус шуис налы: «Пророкöс пыдди пуктöны быдлаын, сöмын ас карас да ас гортас оз».
[58] Йöзыслöн эскытöм вöсна Исус эз вöч сэнi уна шензьöданаторсö.