[1] Вокъяс, öнi казьтышта тiянлы Евангелльö йылысь, кодöс висьтавлi нин тiянлы. Тi сибöдiнныд сiйöс да зумыда кутчысянныд сэтчö.
[2] Тайö Евангелльöыс пыр тi мездманныд, кутанныд кö зумыда кутчысьны менам висьтавлöмö. Онö кö, тiян эскöмныд весьшöрö.
[3] Ме висьтавлi тiянлы медколанаторсö, мый ачым босьтi сьöлöмö: Гижöдыс серти Кристос кулiс миян мыжъяс вöсна.
[4] Сiйöс вöлi гуалöма, но коймöд луннас Енмыс ловзьöдiс Сiйöс. Тадзи висьталöма Гижöдас.
[5] Сiйö петкöдчис Кифалы, сэсся дас кык велöдчысьыслы,
[6] сэсся öтпырйö петкöдчис витсёысь унджык воклы. На пиысь унджыкыс ловъяöсь на, öткымынöн мöдар югыдас нин вуджисны.
[7] Та бöрти Исус петкöдчис Яковлы, сэсся став апостолыслы.
[8] Медбöрти петкöдчис меным, апостолъяс пиысь медiчöтыслы.
[9] Öд на пöвстын ме медшогмытöмыс. Ме ог шогмы весиг шусьыны апостолöн, Енлысь Вичкосö вöтлi да.
[10] Но Енлöн буралöмыс вöсна ме сэтшöм, кутшöм эм. Сылöн буралöмыс ме дiнö эз вöв весьшöрö, öд ме уджалi мукöд апостол дорысь ёнджыка на. Дерт, ме эг ачым уджав, а ме пытшкын олысь Енлöн буралöмыс уджалiс.
[11] Та вöсна оз ков торйöдны, кодi висьтавлö тiянлы юöрсö: ме либö найö, öд ми быдöн öти юöр висьтавлам. И тайö юöрас тi эскинныд.
[12] Ми висьтавлам ловзьöм Кристос йылысь. Сiдзкö, мыйла тiян пиысь öткымынöн шуöны, кулöмаяс пö оз ловзьыны?
[13] Öд кулöмаяс кö оз ловзьыны, сiдзкö, Кристос тшöтш эз ловзьы.
[14] Кристос кö эз ловзьы, сiдзкö, миян висьтавлöмыс весьшöрö, и тiян эскöмныд тшöтш весьшöрö.
[15] Сiдзкö, ми лоам Ен йылысь ылöгсö висьталысьясöн, öд ми висьтавлам, мый Енмыс ловзьöдiс Кристосöс. Но тi кö шуанныд, кулöмаяс пö оз ловзьыны, сiдзкö, Енмыс эз ловзьöд Кристосöс.
[16] Öд кулöмаяс кö оз ловзьыны, сiдзкö, Кристос тшöтш эз ловзьы.
[17] Но Кристос кö эз ловзьы, сiдзкö, тi эсканныд весьшöрö, и тiян мыжъясныд пыр на тiян вылын.
[18] Сiдзкö, Кристослы эскысьяс, кодъяс кулiсны нин, пыр кежлö вошисны.
[19] Ми кö Кристос вылö лача кутам сöмын тайö мувывса олöмас, сiдзкö, ми став йöзсьыс на коньöрöсь.
[20] Но Кристос ловзис кулöмысь, Сiйö медводдзаöн ловзис кулöмаяс пöвстысь.
[21] Кулöмыс мортсянь лоис, кулöмысь ловзьöмыс тшöтш мортсянь лоис.
[22] Адамсянь лоис став йöзлы кулöмыс, Кристоссянь лоö став йöзлы ловзьöмыс.
[23] Но быдöн ас кадö ловзяс: медводз ловзис Кристос, сэсся Сылöн локтiгас ловзясны Кристослöн войтырыс.
[24] Кор Кристос бырöдас быдпöлöс ыджыдалысьясöс, веськöдлысьясöс да вынаясöс, сэки Ассьыс ыджыдалан вынсö сетас Ен Батьыслы. Та бöрти лоö пом.
[25] Öд Енмыс шуис ыджыдавны Кристослы сэтчöдз, кытчöдз Енмыс оз пукты Сы кок улö став паныд мунысьсö.
[26] Медбöръя паныд мунысьыс – кулöм, и сiйöс лоö бырöдöма.
[27] Öд «Енмыс ставсö пуктiс Сы кок улö». Кöть шуöма "ставсö пуктiс", но Ачыс Енмыс оз пыр тайö "став" лыдас. Öд Ачыс Сiйö ставсö пуктiс Кристос кок улö.
[28] Кор Енмыс ставсö сетас Кристос кипод улö, сэки Ачыс Пиыс сетас Ассьыс ыджыдалан вынсö Енмыслы, кодi ставсö пуктiс Сы кок улö. Тадзи Енмыс кутас ыджыдавны быдöн вылын да быдлаын.
[29] Мыйла йöзыс кулöмаяс пыдди пыртчöны? Öд кулöмаяс кö оз ловзьыны, сiдзкö, мыйла на пыдди пыртчынысö?
[30] Сiдзкö, мыйла быд кадö ми паныдасям кулöмыскöд?
[31] Вокъяс, ме быд лун кулан выйын – тайö збыль, кыдзи збыль и сiйö, мый ме ошйыся тiянöн Исус Кристос Господьным водзын.
[32] Ме кö мöвпалi тайö мувывса йöзыс моз, Ефес карын эськö эг кут тышкасьны зверъяскöд, öд тайö меным нинöм оз сет. Кулöмаяс кö оз ловзьыны, сiдзкö, «кутам сёйны-юны, öд аски кулам!»
[33] Видзчысьöй, мед некод оз ылöдлы тiянöс! «Öд лёк оласногаяс тшыкöдöны бур оласногаöс».
[34] Пальöдчöй да олöй бур ногöн, дугдöй вöчны мыжсö! Öд öткымынöн тiян пöвстысь оз тöдны Енсö, ме шуа тайöс тiянöс янöдöм могысь.
[35] Кодкö вермас юавны: кыдзи нö ловзяс кулöм мортыс? Кутшöм лоö сылöн вир-яйыс?
[36] Вежöртöмöй! Кöйдысыс кö оз кув, сэки нинöм оз ловзьы.
[37] Кöдзигад тэ он асьсö быдтассö кöдз, а сöмын кöйдыссö. Тайö вермас лоны шобдiлöн либö кутшöмкö мöд быдмöглöн кöйдыс.
[38] Сэсся Енмыс Ас кöсйöм сертиыс сетö тайö кöйдысыслы аслыспöлöс паськöм. Быдпöлöс кöйдыслы Сiйö сетö аслыспöлöс паськöм.
[39] Быд ловъя олысьлöн аслыспöлöс вир-яй. Шуам, мортлöн вир-яйыс торъялö пемöсысь, черилöн – лэбачысь.
[40] Эмöсь енэжвывсаторъяс, эмöсь и мувывсаторъяс, но налöн вир-яйыс торъялö öта-мöдсьыныс. Енэжвывсалöн дзирдлуныс öтипöлöс, а мувывсалöн – мöдпöлöс.
[41] Шондi öти ногöн дзирдалö, тöлысь да кодзувъяс – мöд ногöн, но быд кодзув ас ногыс дзирдалö.
[42] Тадзи артмö тшöтш кулöмаяслöн ловзигöн: гуавсьö сiсьмана вир-яй, ловзьö сiсьмытöм.
[43] Гуавсьö мисьтöм вир-яй, ловзьö дзирдалана, гуавсьö жеб вир-яй, ловзьö вына вир-яй.
[44] Гуавсьö мувывса вир-яй, ловзьö енэжвывса. Эм кö мувывса вир-яй, эм и енэжвывса.
[45] Гижöдыс висьталö: «Медводдза мортыс, Адам, лоис ловъя олысьöн», а мöд Адамыс лоис олöмсö сетысь Лолöн.
[46] Медводдза олысьыс вöлi мувывса, эз енэжвывса, сэсся енэжвывсаыс локтiс.
[47] Медводдза мортыс вöлi мувывса, сiйöс вöлi муысь вöчöма. Мöд мортыс – Господь, кодi локтiс енэжсянь.
[48] Сiдзкö, мувывса олысьяс öткодьöсь муысь вöчöмторйыскöд. А енэжвывса олысьяс öткодьöсь енэжсянь Локтысьыскöд.
[49] Öнi ми öткодьöсь муысь вöчöмторйыскöд, коркö лоам öткодьöсь енэжсянь Локтысьыскöд.
[50] Вокъяс, кöсъя висьтавны тiянлы, мый тайö мувывса вир-яйлы оз вичмы Енлöн Юраланiныс, öд тайö вир-яйыс сiсьмана.
[51] Висьтала тiянлы гусятор: ми огö ставным кулöй, но ставным вежсям.
[52] Тайö лоö зэв öдйö, син лапнитiгкостi, трубалöн бöръя букöстiгöн. Труба букöстас, и кулöмаяс ловзясны сiсьмытöмöн, а ми – вежсям.
[53] Öд тайö сiсьмана вир-яйлы колö вежсьыны сiсьмытöмö, да кулана вир-яйлы – кувлытöмö.
[54] Кор тайö сiсьмана вир-яйыс вежсяс сiсьмытöмö да кулана вир-яйыс – кувлытöмö, сэки инасны Гижöдысь кывъясыс: – Кулöмсö бырöдöма, вермöма пыр кежлö!
[55] Кулöм, кöнi тэнад чушканыд? Ад, кöнi тэнад вермöмыд?
[56] Кулöмыслöн чушканыс – мыж, а вынсö мыжыслы сетö Индöд.
[57] Ошкöм Енлы! Миян Господь Исус Кристос пыр Сiйö сетö миянлы вермöм!
[58] Муса вокъяс, сулалöй зумыда да вöрзьывтöг. Быд кадö кесъялöй Господьлы сьöлöмсяньныд. Тöдöй, мый тi кесъяланныд Господьлы онö весьшöрö.