[1] Воннэзӧ, тійӧ ─ вежа отир, енӧжись Енӧн корӧммез. Видзӧтӧ Енлӧн Ыстӧм вылӧ, миян Аркирей Кристос Исус вылӧ, Кӧдалӧ мийӧ веритам.
[2] Сія быдӧсын кывзісис Сійӧ Аркирейнас Сувтӧтісьсӧ, кыдз и Моисейыс «Ен керкуын быдӧс керис Сы сьӧрті».
[3] Исуссӧ колӧ ошкыны Моисейӧсся ӧддьӧнжык. Керку лэбтісьсӧ эд керкуыс сьӧрті ӧддьӧнжык ошкӧны.
[4] Быд керкулӧн эм керку керись, а Еныс ─ быдӧс Керисьыс.
[5] Моисейыс «Енлӧн керкуас быдӧсын вӧлі надейнӧй кысъялісьӧн». Сылӧн кысъялӧмыс мыччаліс сійӧ, мый Еныс мӧдіс висьтавны одзланься кадӧ.
[6] А Кристосыс ─ Зон. Сія веськӧтлӧ Енлӧн керкунас. Сылӧн керкуыс ─ мийӧ, медбӧрӧдз вермам кӧ овны повтӧг да надейтчӧмнаным, кӧдӧн ӧні ошшасям.
[7] Сійӧн, Вежа Лолыс сідз баитӧ: ─ Талун, Сылісь шысӧ кывтӧн,
[8] эд чорзьӧтӧ сьӧлӧммезнытӧ, кыдз вӧлі кушмуӧт мунікӧ, Ме вылӧ лэбтісьӧм коста Менӧ лӧгӧтлікӧ.
[9] Тіян айезныт нёльдас во сьӧрна адззылісӧ Менчим уджӧс. Асьныс тай лӧгӧтлісӧ, ылӧтлісӧ Менӧ.
[10] Сійӧн Ме лӧгаси эта увтыр вылӧ, висьталі: «Нія пыр мӧдӧрӧ ылалӧны. Нія озӧ тӧдӧ Менчим туйезӧс».
[11] Сійӧн Ме лӧгувьям кыв сетӧмӧн висьталі: «Нія озӧ пырӧ шоччисянінас, кӧдӧ Ме лӧсьӧті».
[12] Воннэзӧ, видзӧтӧ, медбы тіян коласісь некин эз вӧв вериттӧм мортӧн да эз вӧв сьӧлӧм выланыт лӧгыс. Тіян коласісь ась некин оз янсав ловья Еныс дынісь.
[13] Вынсьӧтӧ ӧтамӧднытӧ быд лун, кытчӧдз кадсӧ позьӧ шуны «талун». Ась некин тіян коласісь оз бӧбась умӧльсӧ керны да сысянь оз чорзьӧт сьӧлӧмсӧ.
[14] Кристослӧ лӧсьӧтӧм пайыс дӧнзяс и миянлӧ, пондам кӧ бура веритны медбӧрӧдз, кыдз и пондім.
[15] Эта йылісь висьталӧм: ─ Талун, кӧр кылат Сылісь шысӧ, эд чорзьӧтӧ сьӧлӧммезнытӧ, кыдз вӧлі Ме вылӧ лэбтісьӧм коста.
[16] Енлісь шысӧ кыліссез коласісь мукӧдыс лэбтісьӧмась паныт, но абу быдӧнныс, кӧдна петісӧ Моисейыскӧт Египетсис.
[17] Кин вылӧ Сылӧн петӧм лӧгыс нёльдас во сьӧрна? Эз я умӧльсӧ кериссес вылӧ, кӧдналӧн лыэс кольччӧмась кушмуас?
[18] Кин йылісь кыв сетӧмӧн висьталӧм: озӧ пӧ пырӧ Сы шоччисянінӧ? Сідз висьталіс кывзісьтӧммес йылісь.
[19] Мийӧ адззам, нія эзӧ вермӧ пырны Енлӧн шоччисянінӧ, эзӧ веритӧ да.