[1] Меным колӧ, медбы тійӧ тӧдіт, мымда ме песся тіян понда. Ме песся и Лаодикияын да Иерапольын оліссез понда, да и ны понда, кӧдна менӧ эзӧ и адззывлӧ.
[2] Песся, медбы нылӧн радейтӧмнас ӧтлаӧтӧм сьӧлӧммезныс вынсялісӧ. Ась унажык пондӧны тӧдны да буржыка вежӧртӧны Ен Айнымлісь тӧдлытӧм сетӧмсӧ ─ Кристоссӧ.
[3] Сы пытшкын меддонаыс ─ адззывлытӧм мывкыдыс да быдӧс тӧдӧмыс.
[4] Сідз ме висьталі, медбы некин тіянӧс эз вермы ылӧтны кужӧмӧн баитӧмнаныс.
[5] Ме кӧть вывтырнам абу тіянкӧт, но ловнам тіянкӧт. Ме адзза, тійӧ ёна сулалат Кристослӧ веритӧмас и тіян быдӧс арта. Сысянь менам сьӧлӧм вылам гаж.
[6] Тійӧ Дӧсвидзись Кристос Исуссӧ босьтіт сьӧлӧманыт. Сідзкӧ, сідз и одзлань олӧ Сыкӧт ӧтлаасьӧмӧн.
[7] Тіянӧс эд велӧтісӧ Сылӧ веритны. Сійӧн лэдзӧ вуджжезнытӧ, ась вынсялӧ Кристослӧ веритӧмныт. Быд сьӧлӧмсянь буркывтӧ Енсӧ.
[8] Воннэзӧ, видзӧтӧ, ась некин оз ылӧт тіянӧс морт мывкыдсянь баитӧмнаныс да абутӧмсӧ кӧсйӧмнаныс. Нія велӧтӧммес абу Кристоссянь, а морт мывкыдсянь. Сэтшӧм велӧтӧммес эд му вылісь выннэзсянь шогмисӧ.
[9] Кристосыс пӧртчис мортӧ. Аслас вывтырын Сія мыччаліс Енлісь быдӧс тырмӧмсӧ.
[10] Кристоскӧт ӧтлаасьӧмсянь и тіянлӧ сетӧм Енлӧн быдӧс тырмӧмыс. Кристосыс вына Юралісь быдкодь юраліссез да быдпӧлӧс выннэз вылын.
[11] Сыкӧт ӧтлаасьӧмнаныт тійӧ вундыштыштӧмӧсь, но абу морт киӧн. Кристосыслӧн вундыштыштӧмыс мездіс тіянӧс умӧльсӧ керӧмсис, кӧда ыждаліс вывтыраныт.
[12] Пыртчӧмныт коста тійӧ Сыкӧт вӧлітӧ дзебӧмӧсь, Сыкӧт и ловзит. Тійӧ эд веритіт Еныслӧ, Кӧда Аслас вынӧн ловзьӧтіс Кристоссӧ.
[13] Тійӧ одзжык асланыт умӧль керӧммез кузя вӧліт кулӧмӧсь, эдӧ вӧлӧ вундыштыштӧмӧсь. Ӧтлаын Кристосыскӧт Еныс тіянӧс ловзьӧтіс. Сія миянлісь умӧль керӧммезнымӧс проститіс.
[14] Миян умӧль керӧммез йылісь гижӧмсӧ Еныс чышкис, крест вылас дорӧмӧн косяліс гижӧтсӧ. Гижӧмыс понда миянлӧ ковсис бы вештісьны Туйдӧтас висьталӧм сьӧрті.
[15] Кристос отсӧтӧн Еныс вермис юралісь-веськӧтліссесӧ. Мырддис выннысӧ, быдӧнныс одзын уськӧтіс нійӧ рожа кулянӧдззас.
[16] Сідзкӧ, ась некин оз баит умӧльсӧ тіян йылісь сёян-юанныт кузя, кытшӧмкӧ вежалуннэз порйӧтӧм кузя, виль тӧлісьӧ да шоччисян лунӧ мыйкӧ керӧм кузя.
[17] Ны сьӧрті олӧмыс дзир одзланьсяыслӧн вуджӧр, а быльыс ─ Кристос.
[18] Эд лэдзӧ асьнытӧ бӧбӧтлыны ас мывкыдсянь рама видзсись отирлӧ, ангеллэзлӧ копрасиссеслӧ. Нія ошшасьӧны адззылӧммезӧн, кӧдна ылӧтӧны. Весись нія асланыс морт мывкыдӧн асьнысӧ лэбтӧны.
[19] Сэтшӧммес озӧ видзсьӧ Юрыс бердӧ. Юрсяняс эд быдсӧн вывтырыс видзсьӧ. Сія быд торсӧ сӧннэзӧн да суставвезӧн йитӧ ӧтамӧд бердӧ. Ӧтлаӧтӧ ӧтік вывтырӧ ─ вичкуӧ. Еныс отсӧтӧн вывтырыс быдмӧ да вынсялӧ.
[20] Тійӧ Кристосыскӧт куліт, мезмит му вылісь выннэзсис. Мыйлӧ сэк видзсят ны бердӧ, жыв олат му вылісь отир моз этна тшӧктӧммез сьӧрті:
[21] «Сы бердӧ эн павкӧтчы», «сійӧ эн сёй», «сійӧ эн вӧрӧт?»
[22] Отирыслӧн сэтшӧм тшӧктӧм-велӧтӧммес эд дзир сы йылісь, мый бырӧ.
[23] Отирыс ас мознаныс керӧны, жыв нія Ен сьӧрті олӧны, ас мывкыдсянь рама видзсьӧны да тшыгьялӧны. Этадз олӧмныс мыччалӧ, жыв нія бур мывкыдаӧсь, но сэтісь абу бурыс. Сія оз отсав нылӧ вермыны вывтырныслісь умӧльсӧ керны ӧзйӧтчӧммесӧ.