<Ә’йанти 15

[1] Һьнге мьн ль ә’змен нишанәкә дьнә мәзьн у әщеб дит, һ’әфт мьлйак’әтед хwәйе һ’әфт бәлайед ахьрийе пе к’ижана wе хәзәба Хwәде бьһата сери.

[2] Wи чахи мьн тьштәки мина бә’рәкә шушә егьрва т’әвайи дит, ӧса жи әwед кӧ щә’нәwьр, һ’әйкәле wи у һ’әсабе наве wи бьндәст кьрьбун. Әвана сәр бә’ра шушә сәкьни бун, чәнгед кӧ Хwәде дабунә wан дәстед wанда бун

[3] у стьрана Мусайе хӧламе Хwәде у стьрана Бәрх дьстьран: «Кьред Тә мәзьн у ә’щеб ьн Хӧдан Хwәдейе Һ’әму Зорайийе! Р’ийед Тә р’аст у сәр һәqийе нә, йа П’адшайе мьләта .

[4] Хӧдан, к’и жь Тә wе нәтьрсә у р’умәте нәдә wи наве Тә? Чьмки Тӧ т’әне Йе пироз и. Һ’әму мьләте бәрбь Тә бен у сәре хwә бәр Тә дайньн, чьмки кьред Тәйә р’аст хӧйа бун» .

[5] Пәй ван тьштар’а мьн дина хwә дайе, ва п’арьстгәһа ә’змен вәбу, аwа готи Коне Шә’дәтийе.

[6] Әw һәр һ’әфт мьлйак’әтед хwәйе һәр һ’әфт бәла жь п’арьстгәһе дәрк’әтьн. К’ьтанед паqьжә бьрqок ль wан бун у мәлахтед зер’ин ль сингед wан бун.

[7] Һьнге жь һәр чар р’ӧһ’бәра йәки һ’әфт т’асед зер’инә хәзәба wи Хwәдейива т’ьжи, Йе кӧ һ’әта-һ’әтайе Сах ә, данә wан һәр һ’әфт мьлйак’әта.

[8] П’арьстгәһ дуйе р’умәта Хwәде у qәwата Wива т’ьжи бу у т’ӧ кәс нькарьбу бьк’әта п’арьстгәһе, һ’әта кӧ һәр һ’әфт мьлйак’әта, һәр һ’әфт бәла нәанина сери .