Fîlîpî 2
[1] Аwа һәгәр т’әвбуна wәйә т’әви Мәсиһ бина бәр wә йә, һәгәр һ’ьзкьрьна Wи дьл дьдә бәр wә, һәгәр Р’ӧһ’е Пироз wә дькә йәк , һәгәр дьлшәwати у р’ә’ма wә һәйә,
[2] әшqа дьле мьн бь т’ьфаqа хwә һун бьгьһиньнә сери: Бьра әw һ’ьзкьрьна нава wәда бә у сәр нет у фькьрәке бьн.
[3] Тьштәки бь һәвр’ьк’ийе нәкьн у ль наве хwә нәгәр’ьн, ле жь wә һәр йәк бь мьлуктийе һәвале хwә сәр хwәр’а бьгьрә.
[4] Т’әне ль к’ара хwә нәгәр’ьн, ле бьра һәр кәс ль к’ара һәвале хwә жи бьгәр’ә.
[5] Мәсиһ Иса сәр чь нет-фькьре бу, жь wә һәр кәс жи ӧса бьфькьрә:
[6] Әw кӧ бьнйат’а Хwәда Хwәде бу, пәй wе йәке нәк’әт, кӧ бьма wәкә Хwәде,
[7] ле Хwәха Хwә шкенанд, к’әтә бьнйат’а хӧламәки у бу мина мәрьва, к’әтә дьлqе инсен.
[8] Әwи Хwә ньмьз кьр, һ’әта мьрьнер’а жи qайл бу, әw жи мьрьна сәр хаче.
[9] Бона ве йәке Хwәде Әw һе бьльнд кьр у навәки ӧса п’ешк’еши Wи кьр, кӧ жь һ’әму нава бьльндтьр ә,
[10] wәки һәр чок ль бәр наве Иса бьтәwә, һәгәр ль ә’змен бә, һәгәр сәр дьне бә, һәгәр ль дийаре мьрийа бә
[11] у һәр зар-зьман иqрар кә, кӧ Иса Мәсиһ Хӧдан ә, бона р’умәта Бав Хwәде .
[12] Аwа дәлалийед мьнно, чаwа әз нава wәда бум һун т’ьме гӧһдар бун, ньһа һе гәләки гӧһдар бьн, гава нә нава wәда мә. Бона хьлазбуна хwә бь хоф у тьрс бьхәбьтьн, кӧ wе йәке бьгьһиньнә сери,
[13] чьмки Хwәде Хwәха ве йәке дькә дьле wә, кӧ һун дьхwазьн у дькьн, чаwа ль Wи хwәш те.
[14] Һәр тьшти бе бинтәнги у бе шәр’ у дә’w бькьн,
[15] wәки һун нава ви ньсьле нәһәq у хальфида беләк’ә у беqӧсур, зар’ед Хwәдейә бесущ бьн. Нава ванда шәwq бьдьн мина р’онайед ә’змана ,
[16] чаwа йед хәбәра жийине һьлгьрти. Әзе һьнге Р’ожа һатьна Мәсиһ р’успи бьм, кӧ бадиһәwа нәбәзимә у бадиһәwа нәхәбьтимә.
[17] Бәле һәгәр щи бе кӧ хуна мьн сәр wе баwәрийа wәда бе р’етьне, йа кӧ хьзмәтк’арийа wәда чаwа qӧрбан Хwәдер’а те дайине, әзе ша бьм у т’әви әшqа wә бьм.
[18] Ӧса жи һун ша бьн, т’әви әшqа мьн бьн.
[19] Гӧмана мьн сәр Иса Хӧдан һәйә, кӧ әзе зутьрәке Тимот’ейо сәр wәда бьшиньм, кӧ дьле мьн р’ьһ’әт бә, гава әз һ’але wә пе бьһ’әсьм.
[20] Әз дьле хwәр’а йәки мина wи набиньм, кӧ бона һ’але wә мина пешәwьтики хәм бьхwә.
[21] Чьмки йед майин һәр кәс ль пәй к’ара хwә к’әтийә, нә кӧ йа Иса Мәсиһ.
[22] Ле һун хwәха заньн кӧ әw йәки чаwайи щер’ьбанди йә у хwәха т’әви мьн Мьзгинидайинер’а ӧса хьзмәти кьр, чаwа кӧр’ бавер’а.
[23] Аwа нета мьн һәйә, кӧ әз әwи зу бьшиньмә щәм wә, гава әз һаш жь һ’ал-һ’әwале хwә һәбьм.
[24] У әз Хӧданда гӧман ьм, кӧ әзе хwәха жи зутьрәке сәр wәда бем.
[25] Ле мьн ӧса р’е тер’а дит, wәки әз wи бьрайе мә Епафродито бьшиньмә щәм wә, йе кӧ т’әви мьн хәбьти у шәр’е хwә кьр, к’ижан wә шандьбу кӧ к’омәк бьда мьн.
[26] Әwи жи гәләки бира wә кьрийә у бәр хwә дьк’әвә, wәки wә бона нәхwәшийа wи бьһистийә.
[27] Р’асти жи әw нәхwәш к’әт, чу бәр дәре мьрьне. Ле Хwәде ль wи һатә р’ә’ме, нә кӧ т’әне ль wи, ле ӧса жи ль мьн, wәки сәр к’әдәре к’әдәр сәр мьнда нәйе.
[28] Бона ве йәке әз wи бь дьл дьшиньм, wәки һун wи бьбиньн, диса ша бьн у әз бәр хwә нәк’әвьм.
[29] Аwа бона хатьре наве Хӧдан әwи бь т’әмамийа әшqа дьле хwә qәбул кьн. Qәдьре йед мина wи гьран бьгьрьн,
[30] чьмки әw бона шьхӧле Мәсиһ һ’әта бәр дәре мьрьне жи чу у дәсте хwә жь ә’мьре хwә жи к’ьшанд, wәки дәwса wе хьзмәтк’арийа кӧ wәйе мьнр’а бькьра әwи хwәха бькьра.