<Щьһуда

[1] Жь Щьһудайе хӧламе Иса Мәсиһ, бьрайе Аqуб, wәр’а, йед кӧ газикьри нә, жь Бав Хwәдеда һ’ьзкьри у хwәйкьрийед Иса Мәсиһ ьн:

[2] Дә бьра р’ә’м, ә’дьлайи у һ’ьзкьрьн һе ль wә зедә бә.

[3] Дәлално! Гава мьн дьл кьр, кӧ әз бона ве хьлазбуна мәйә т’омәри wәр’а бьньвисьм, һьнге мьн р’е тер’а дит бона ве йәке wәр’а бьньвисьм у дьл бьдьмә wә, wәки һун бона wе баwәрийа кӧ щарәке бона һәр т’ьм щьмә’та Хwәдер’а һатийә дайине, шәр’е хwә бькьн.

[4] Чьмки чәнд мәрьв дьзива к’әтьнә нава wә, кӧ дәрһәqа диwана wанда һе пешда ньвисар бу. Әwед нәп’ак бьн наве к’әрәма Хwәдейе мә хwә данә бенамусийе у Хӧдане мә Иса Мәсиһ Хwәйики бешьрики-беһәвал инк’ар кьрьнә.

[5] Ле әз дьхwазьм биньмә бира wә, чаwа һун ван һ’әму тьшта заньн жи, кӧ Хӧдан щьмә’та Хwә жь wәлате Мьсьре хьлаз кьр, паше qьр’а йед кӧ баwәр нәкьрьн ани .

[6] У әw мьлйак’әтед кӧ һ’ӧкӧме хwә хwәй нәкьрьн, ле щийе хwә шьһ’ьтандьн, Хwәде wан бь qәйдед һ’әта-һ’әтайейә тә’ристанийеда хwәй дькә, бона wе Р’ожа һ’әсабә Диwане.

[7] Ве жи бир нәкьн чаwа Содом, Гомора у бажаред дор-бәред wан, мина wан жь гӧр’а Хwәде дәрк’әтьн qави кьрьн, ч’ә’в авитьнә бәдәна башqә у диwана агьрийә һ’әта-һ’әтайе сәр хwәда анин. Әвана иди бона мә т’әрз у дәрс ьн.

[8] Ӧса жи әw мәрьв пәй хәwна дьк’әвьн, qальбе хwә дьһ’әр’ьминьн, дьжәньнә сәрwертийа у һәйинед хwәйир’умәтә жорьн беһӧрмәт дькьн .

[9] Ле Мьхайиле сәрәке мьлйак’әта әв йәк нәкьр. Гава бона щьнйазе Муса р’абу мирещьнр’а к’әтә һ’ӧщәте, тӧрӧш нәкьр кӧ бь готьнед беһӧрмәткьрьне диwана wи бькьра, ле гот: «Бьра Хӧдан ль тә һьле!»

[10] Ле әв мәрьвана сәрәдәрийе wан тьшта накьн, к’ижана кӧ беһӧрмәт дькьн, ле чь жи мина һ’әйwанед безарә-безьман бь бьнйат’и фә’м дькьн, бь wан жи ӧнда дьбьн.

[11] Wәй ль wан, кӧ р’ийа Qайинда чун, мина Бьлам хальфин, пәй к’ара хwә к’әтьнә у мина р’абәрибуна Qорах wе бәла хwә бьбиньн .

[12] Әвана мәсрәфед һ’ьзкьрьна wәда ләк’ә нә, т’әви wә бе хоф дьхwьн-вәдьхwьн, т’әне зьке хwә дьч’ериньн. Йед һа, ә’wред беавә жь бәр бе чуйи нә, даред пайизейә бебәр ьн, р’аwава р’акьри, дӧ щар һ’ьшк буйи,

[13] пелед бә’рейә р’абуйи нә, кӧ чаwа ә’йба кьред wе мина к’әфе сәр дьк’әвә. Әw стәйркед хальфи нә, бона к’ижана духана тә’ристанийе һ’әта-һ’әтайе хwәйкьри йә.

[14] Һәнох жи кӧ пәй Адәмр’а баве һ’әфта бу, бона ван мәрьва п’ехәмбәрти кьр у гот: «Ва йә Хӧдан т’әви пирозед Хwәйә беһ’әсаб те ,

[15] wәки диwана һ’әмуйа бькә у һ’әму нәп’ака нәһәq кә, бона һ’әму кьред wанә нәп’ак у бона wан һ’әму готьнед хьраб, кӧ нәп’акед гӧнәк’ар һьндава Wида хәбәр дан».

[16] Әвана мәрьвнә бинтәнгә фьш-фьшко нә, пәй хwәстьнед дьле хwә дьчьн, жь хwә мәстьр хәбәр дьдьн у бона к’ара хwә һ’ьләк’арийа дькьн.

[17] Ле һун дәлално, wан готьнед кӧ шандийед Хӧдане мә Иса Мәсиһ пешда готьнә бир биньн,

[18] кӧ wәр’а дьготьн: «Р’ожед ахьрийеда мәрьвед qәрфкьр wе дәрен, пәй хwәстьнед дьле хwәйә нәп’ак һәр’ьн» .

[19] Әв әw мәрьв ьн, йед кӧ дӧтирәтийе дькьн, йед кӧ бь мәрьвайи тенә р’ебәрикьрьне, нә кӧ бь Р’ӧһ’е Пироз.

[20] Ле һун дәлално, хwә бьдьнә сәр авакьрьна баwәрийа хwәйә пироз, бь Р’ӧһ’е Пироз дӧа бькьн,

[21] хwә нава wе һ’ьзкьрьна Хwәдейә һьндава хwәда хwәй кьн, һивийа р’ә’ма Хӧдане мә Иса Мәсиһ бьн, кӧ жийина һ’әта-һ’әтайе бьдә wә.

[22] У һьндава дӧдьлийада р’ә’м бьн .

[23] Һьнәка жи жь агьр бьр’әвиньн хьлаз кьн, дьле wә сәр йед майин жи бь тьрс бьшәwьтә, ле жийина wанә гӧнәк’арә мина к’ьнща ләwьт’и бәр ч’ә’ве wә р’әш бә .

[24] Wир’а, Йе кӧ дькарә wә жь к’әтьне хwәй кә у ль бәр р’умәта Хwә беqӧсур әшq бьдә сәкьнандьне,

[25] Хwәдейе бешьрики-беһәвал, Хьлазкьре мәр’а, бь дәсте Иса Мәсиһе Хӧдане мә, шькьр у мәзьнайи, qӧдрәт у һ’ӧкӧмәт бә, бәри һәр-һәйе у ньһа жи у һ’әта-һ’әтайе! Амин.