<Уньс 4

[1] Уньс гәләки ль бәр хwә кʼәт у һерс кʼәт.

[2] Бәр бь Хӧдан дӧа кьр у гот: «Йа Хӧдан, гава әзи һе wәлате хwәда бум, бона ве йәке мьн нә дьгот кӧ тӧ йәки аһа йи? Ләма мьн дькьр кӧ әз бьрʼәвийама Тʼаршише. Чьмки мьн заньбу кӧ тӧ Хwәдеки рʼәʼм и у дьлшәwат и, сәбьр ськʼан и, рʼәʼм кʼәрәм и у жь һерскʼәтьне жи зу вәдьгәрʼи.

[3] Ле ньһа йа Хӧдан, рʼәща дькьм рʼӧһʼе мьн жь мьн бьстинә, чьмки мьрьна мьн жь жийина мьн четьр ә».

[4] Хӧдан готе: «Гәло һәq ә, кӧ тӧ бона ве йәке бина хwә һаqаси тәнг дьки?»

[5] Уньс жь бажер дәркʼәт, алийе рʼоһьлата бажер рʼуньшт у ль wьр хwәрʼа һʼолькәк чекьр у бьн сийа wеда рʼуньшт, кӧ дина хwә бьдә бажер кʼа wе чь бьqәwьмә.

[6] Һьнге Хӧдан Хwәде әʼмьри ль кʼоләке кьр, әw кʼол мина даре шин бу у ль сәр Уньс кьрә си, кӧ wи жь wе бинтәнгийе хьлаз кә. Уньс бона wе кʼоле гәләки ша бу.

[7] Рʼожа дьн сьбәһе зу, Хӧдан әʼмьри ль кӧрмәки кьр әw кʼола кот у әw һʼьшк бу.

[8] Гава тәʼв дәркʼәт, бь әʼмьре Хwәде, алийе рʼоһьлате баки кʼәw у гәрм рʼабу, тәʼве ль сәре Уньс хьст, әw сьст бу, мьрьна хwә хwәст у гот: «Мьрьна мьн жь жийина мьн четьр ә».

[9] Һьнге Хӧдан готә Уньс: «Гәло һәq ә, кӧ тӧ бона ве кʼоле бина хwә һаqаси тәнг дьки?» Уньс гот: «Бәле, һәq ә кӧ әз бина хwә тәнг дькьм, һʼәта мьрьна хwә жи әз рʼази мә».

[10] Ле Хӧдан готе: «Һʼәйфа тә wе кʼоле те, йа кӧ тә худан ль сәр нәрʼет у мәзьн нәкьр, кʼижан кӧ нав шәвәкеда шин бу у шәвәкеда жи һʼьшк бу.

[11] Ле һʼәйфа мьн чаwа жь wи бажаре Нинәwайа мәзьн нәйе, кӧ нав wеда сәд бист һʼәзар мәрьви зедәтьр һәнә, кӧ дәсте чʼәп у рʼасте жь һәв дәрнахьн, ӧса жи гәләк һʼәйwан?»