[1] Дәстпебунеда Хәбәр һәбу. Хәбәр т’әви Хwәде бу у Хәбәр Хwәха Хwәде бу.
[2] Әw дәстпебунеда т’әви Хwәде бу.
[3] Һәр тьшт бь Wи ә’фьрин у бейи Wи т’ӧ тьшт нәqәwьми, чь кӧ qәwьми.
[4] Канийа жийине Әw бу у жийин жи р’онайа мәрьва бу.
[5] Р’онайи тә’ристанийеда шәwq дьдә у тә’ристанийе Пе нькарьбуйә.
[6] Мәрьвәки жь алийе Хwәдеда шанди һәбу, кӧ наве wи Йуһ’әнна бу.
[7] Әw бона шә’дәтийе һат, wәки бона Р’онайе шә’дәтийе бьдә, кӧ һ’әму пе wи баwәр бькьн.
[8] Әw хwәха нә әw Р’онайи бу, ле әw һат кӧ шә’дәтийа Р’онайе бьдә.
[9] Р’онайа р’аст Әw ә, к’ижан кӧ те дьнйайе у һ’әму мәрьва р’онайи дькә.
[10] Әw дьнйайеда бу у дьнйа пе Wи ә’фьри, ле дьнйайе Әw нас нәкьр.
[11] Әw һатә сәр wаре Хwә, ле щьмә’та Wи Әw qәбул нәкьр.
[12] Ле әwед кӧ Әw qәбул кьрьн у баwәрийа хwә наве Wи анин, Әwи да, кӧ һәqийа wан һәбә бьбьнә зар’ед Хwәде.
[13] Әвана нә жь хуне, нә жь хwәстьна бәдәне у нә жи жь хwәстьна мәрьвайе бунә, ле әw жь Хwәде бунә.
[14] У Хәбәр бу хун у гошт, бь к’әрәм у р’астийева т’ьжи нав мәда коне Хwә дани. Мә р’умәта Wи дит, әw р’умәта Кӧр’е Бавейи тайе т’әне.
[15] Йуһ’әнна бона Wи шә’дәти да у бь дәнгәки бьльнд гот: «Әва йә, бона К’ижани мьн готьбу: ‹Әwе кӧ пәй мьн те Әw сәр мьнр’а йә, чьмки Әw бәри мьн һәбу›».
[16] Мә һ’әмуйа жь т’ер-т’ьжийа Wи к’әрәм сәр к’әрәмеда станд .
[17] Чьмки Qанун бь дәсте Муса һатә дайине, к’әрәм у р’асти бь дәсте Иса Мәсиһ.
[18] Т’ӧ кәси т’ӧ щар Хwәде нәдитийә, ле Йе Тайе Т’әнейи кӧ хут Хwәде йә у һ’әмеза Баведа йә, Әwи Әw да ә’йанкьрьне.
[19] Әв бу Шә’дәтийа Йуһ’әнна: Гава щьһуйа жь Оршәлиме к’аһин у леwи шандьн, wәки жь Йуһ’әнна бьпьрсьн, кӧ әw к’и йә, Йуһ’әнна һьлда сәр хwә,
[20] инк’ар нәкьр у ашкәрә гот: «Әз нә Мәсиһ мә».
[21] Wана же пьрси: «Ле тӧ к’и йи? Елйас и?» Әwи гот: «На». «Әw п’ехәмбәре создайи йи?» Щаб да: «На».
[22] Һьнге жер’а готьн: «Дә бежә, тӧ к’и йи, wәки әм щабәке wанр’а бьбьн, йед кӧ әм шандьнә. Тӧ бона хwә чь дьбежи?»
[23] Әwи гот: «Әз әw дәнг ьм кӧ бәр’ийеда дькә гази: ‹Р’ийа Хӧдан р’аст бькьн!› чаwа кӧ Ишайа п’ехәмбәр готийә».
[24] Әwед кӧ һатьбунә шандьне жь ферьсийа бун.
[25] Wана же пьрси: «Ле иди чьма дьньхӧмини, һәгәр тӧ нә Мәсиһ и, нә Елйас у нә жи п’ехәмбәр?»
[26] Йуһ’әнна ль wан вәгәр’анд у гот: «Әз бь аве дьньхӧминьм, ле Йәк нав wәда һәйә, кӧ һун Wи нас накьн.
[27] Әw ә, Йе кӧ пәй мьн те, кӧ әз нә һежа мә, wәки бәне чарьхед Wи жи вәкьм».
[28] Әв һ’әму ль wи бәри Урдӧне, ль Бәйтанйайе, wи щийе кӧ Йуһ’әнна ль wьр дьньхӧманд qәwьмин.
[29] Р’ожа дьне Йуһ’әнна дит кӧ Иса бәрбь wи те, әwи гот: «Ва йә! Бәрхе Хwәде, Йе кӧ гӧнед дьнйайе һьлдьдә!
[30] Әв ә бона К’ижани мьн готьбу: ‹Пәй мьнр’а Йәке бе, кӧ сәр мьнр’а йә, чьмки Әw бәри мьн һәбу›.
[31] Мьн ньзаньбу Әw к’и йә, ле әз һатьмә бь аве дьньхӧминьм, wәки Wи Исраелева бьдьмә ә’йанкьрьне».
[32] Йуһ’әнна әва шә’дәтийа да у гот: «Мьн дит кӧ Р’ӧһ’ жь ә’змен мина кәвоткәке һат сәр Wи дани у ма.
[33] Мьн ньзаньбу Әw к’и йә, ле Әwе кӧ әз шандьм, кӧ бь аве бьньхӧминьм, мьнр’а гот: ‹Тӧ к’ижани бьбини кӧ р’ӧһ’ те сәр датинә у дьминә, Әw ә кӧ бь Р’ӧһ’е Пироз дьньхӧминә›.
[34] Мьн жи дит у шә’дәти да кӧ Әв ә Кӧр’е Хwәде».
[35] Р’ожа дьне Йуһ’әнна диса т’әви дӧ шагьртед хwә сәкьни бу.
[36] Дит кӧ Иса wьрар’а дәрбаз дьбә, гот: «Ва йә Бәрхе Хwәде!»
[37] Әв йәк кӧ бьһистьн, һәр дӧ шагьрт пәй Иса чун.
[38] Иса ль пьшт Хwәва вәгәр’ийа у дит кӧ wана дайә пәй Wи тен, wанр’а гот: «Һун чь дьхwазьн?» Wана жер’а гот: «Р’абби», кӧ те фә’мкьрьне: «Дәрсдар», «Тӧ ль к’ӧ дәре дьмини?»
[39] Әwи wанр’а гот: «Wәрьн һуне бьбиньн». Wана чу у дит кӧ Әw ль к’ӧ дьминә. Иди сьһ’әт незики чара бу у wе р’оже әw ль щәм Wи ман.
[40] Жь wан һәр дӧйа, йед кӧ жь Йуһ’әнна бьһистьн у пәй Иса чун, йәк Әндраwьсе бьре Шьмһ’ун-Пәтрус бу.
[41] Әwи пер’а-пер’а бьре хwә Шьмһ’ун дит у жер’а гот: «Мә Мәсиһ дит», кӧ те фә’мкьрьне: «Йе К’ьфшкьри» .
[42] Wи әw ани щәм Иса. Иса ль Шьмһ’ун ньһер’и у готе: «Тӧ, Шьмһ’уне кӧр’е Йуһ’әнна, те Кифас бейи готьне» (аwа готи «Пәтрус», кӧ те фә’мкьрьне: «Qәйа»).
[43] Р’ожа дьне Иса qьрар кьр кӧ һәр’ә Щәлиле. Wи Филипо дит у жер’а гот: «Пәй мьн wәрә!»
[44] Филипо жь Бәйтсайдайе бу, жь бажаре Әндраwьс у Пәтрус.
[45] Филипо чу Натанйел дит у жер’а гот: «Мә Әw дит, бона к’ижани Муса Qанунеда у п’ехәмбәра жи ньвисаред хwәда сальхе Wи дабун, Исайе Кӧр’е Усьве жь Ньсрәте».
[46] Натанйел же пьрси: «Qәт дьбә кӧ тьштәки п’ак жь Ньсрәте дәрк’әвә?» Филипо жер’а гот: «Wәрә у бьбинә!»
[47] Гава Иса дит кӧ Натанйел бәрбь Wи те, дәрһәqа wида гот: «Ва йә исраелики һәqи-һ’әлал кӧ дьле wида мьхәнәти т’ӧнә».
[48] Натанйел же пьрси: «Чаwа мьн нас дьки?» Иса ле вәгәр’анд у готе: «Һе Филипо гази тә нәкьрьбу, гава кӧ тӧ ль бьне дара һежире р’уньшти буйи, Мьн тӧ дити».
[49] Натанйел жер’а гот: «Дәрсдар, Тӧ Кӧр’е Хwәде йи! Тӧ П’адше Исраеле йи!»
[50] Иса ле вәгәр’анд у готе: «Тӧ бона ве йәке баwәр дьки, wәки Мьн тәр’а гот: ‹Мьн тӧ ль бьне дара һежире дити?› Те тьштед жь ве мәстьр бьбини».
[51] У жер’а гот: «Әз р’аст бе хельф wәр’а дьбежьм, һуне бьбиньн ә’зман вәбуйә у мьлйак’әтед Хwәде чаwа жь сәр Кӧр’е Мерьв һьлдьк’ьшьн, пәйа дьбьн» .