Efesî 5
[1] Аwа ч’ә’в бьдьнә Хwәде, чаwа зар’ед һ’ьзкьри
[2] у хwә ль һ’ьзкьрьне бьгьрьн, чаwа Мәсиһ жи әм һ’ьз кьрьн у жийина Хwә бона мә да, Хwәдер’а бу һ’әди у qӧрбана бинхwәш.
[3] Ле һ’әта наве qавийе у һәр һ’әрамийе, йан тьмайе жи гәрәке нава wәда нәйе һьлдане, чаwа ль щьмә’та Хwәде нак’әвә.
[4] Ӧса жи готьнед бемә’рифәти, йан бефә’ми, йан һ’әнәкед qәлпе хьраб, кӧ ль wә нак’әвьн, бьра жь дәве wә дәрнәйен, ле дәwсе шькьрдари.
[5] Һун ве йәке заньбьн кӧ т’ӧ qав, йан һ’әрам, йан тьмак’ар (кӧ п’утп’арьст ә) П’адшатийа Мәсиһ у Хwәдеда wар набә.
[6] Бьра т’ӧ кәс бь хәбәред п’уч’ wә нәхапинә, чьмки бона ван тьшта һерса Хwәде ль wан мәрьвед нәгӧһдар р’адьбә.
[7] Аwа һун т’әви йед ӧса нәбьн!
[8] Һун жи wәхтәке тә’ри бун, ле ньһа һун кӧ п’ара Хӧдан ьн, р’онайи нә. Аwа мина зар’ед р’онайе бьжин,
[9] (чьмки бәре р’онайийе жь һәр qәнщийе, һәqийе у р’астийе дьбә)
[10] у бьзаньбьн кӧ чь ль Хӧдан хwәш те.
[11] Т’әви wан кьред бебәрә тә’рийе нәбьн, ле wан сәр аве хьн,
[12] чьмки бона wан тьштед кӧ әwана бь дьзива дькьн шәрм ә жи кӧ бе хәбәрдане.
[13] Ле гава һәр тьшт те бәр р’онайе, ашкәрә дьбә,
[14] чьмки һәр тьште кӧ ашкәрә дьбә, дьбә р’онайи. Бона ве йәке һатийә готьне: «Хәwьхийо, һ’ьшйар бә! Жь нав мьрийа р’абә у Мәсиһ wе тә р’онайи кә» .
[15] Аwа бьньһер’ьн кӧ һун ньге хwә фәсал бавежьн, нәбьнә мина бефә’ма, ле мина сәрwахта.
[16] Дәст бьдьнә бәр wәхт, чьмки зәмани хьраб ә .
[17] Бона ве йәке бефә’м нибьн, ле бәле бьзаньбьн чь йә qьрара Хӧдан.
[18] У бь шәраве сәрхwәш нәбьн, кӧ ә’мьре мерьв п’уч’ дькә, ле бь Р’ӧһ’е Пирозва т’ьжи бьн.
[19] Зәбур у дьрозга, стьранед р’ӧһ’ани һәвдӧр’а бежьн, бьстьрен у дьле хwәда Хӧданр’а бьловиньн .
[20] Һәр гав бона һәр тьшти р’азибуне бьдьнә Бав Хwәде, бь наве Хӧдане мә Иса Мәсиһ.
[21] Бь хофа Мәсиһә нава хwәда ль бәр һәвдӧ хwә бьшкеньн.
[22] К’ӧлфәтно, ӧса хwә ль бәр меред хwә бьшкеньн, чаwа ль бәр Хӧдан ,
[23] чьмки мер сәре жьне йә, чаwа Мәсиһ жи сәре щьвине йә у Хwәха Хьлазкьре бәдәна Хwә йә.
[24] У чаwа щьвин ль бәр Мәсиһ хwә дьшкенә, бьра ӧса жи жьн һәр тьштида бәр мере хwә шкәсти бә.
[25] Мерно, жьнед хwә һ’ьз бькьн, чаwа кӧ Мәсиһ щьвин һ’ьз кьр у жийина Хwә бәр wева да ,
[26] wәки wе бь хәбәре бӧһӧрти-жьбарә кә, пе аве бьшо ,
[27] кӧ щьвине ль бәр Хwә qәшәнг бьдә сәкьнандьне, кӧ т’ӧ ләк’ә йан qәрч’ьмок, йан тьштәки мина ван сәр т’ӧнәбә, ле паqьж у беqӧсур бә.
[28] Ӧса жи гәрәке мер жьна хwә һ’ьз бькә, чаwа бәдәна хwә. Йе кӧ жьна хwә һ’ьз дькә, әw хwә һ’ьз дькә.
[29] Чьмки бәдәна т’ӧ кәси бәр ч’ә’ве wи нә р’әш ә, ле wе т’ер дькә у хwәй дькә, чаwа Мәсиһ жи щьвине,
[30] чьмки әм әндәмед бәдәна Wи нә.
[31] Чаwа ньвисар ә: «Бона ве йәке мер wе де у баве хwә бьһелә, хwә ль жьне бьгьрә у һәр дӧ wе бьбьнә бәдәнәк» .
[32] Әва сӧр’а к’ур ә, ле әз готьна хwә тиньмә сәр Мәсиһ у щьвине.
[33] Бәле жь wә һәр кәс жи бьра жьна хwә һ’ьз бькә чаwа хwә у жьн жь мере хwә хоф бькә.