[1] Т’ейофилойе хwәйиqәдьр, мьн к’ьтеба хwәйә пешьнда дәрһәqа wан һ’әму тьштада ньвиси, чь кӧ Иса кьр у һин кьр, жь серида
[2] һ’әта wе р’ожа кӧ бәрбь ә’змен һатә һьлатьне. Ле һе бәри ә’змен һьлатьне Әwи бь Р’ӧһ’е Пироз т’әми ль шандийед Хwәйә бьжарти кьр.
[3] Пәй wан щәфайед Хwәр’а Әwи гәләк щара Хwә нишани wан дьда, р’аст дьда избаткьрьне кӧ Әw сах ә. Навбәра чьл р’ожида wанва хӧйа дьбу у дәрһәqа П’адшатийа Хwәдеда wанар’а хәбәр дьда.
[4] Щарәке гава Әwи т’әви wан нан дьхwар, т’әми да wан у гот: «Жь Оршәлиме дәрнәк’әвьн, ле бәле һивийа созе Баве бьсәкьньн, бона к’ижани wә жь Мьн бьһист .
[5] Йуһ’әнна бь аве ньхӧманд, ле һуне чәнд р’ожа шунда бь Р’ӧһ’е Пироз бенә ньхӧмандьне» .
[6] Гава шагьрт һәвр’а щики бун, жь Иса пьрсин у готьне: «Хӧдан, ви зәманида Те П’адшатийа Исраеле ль wан вәгәр’ини?»
[7] Әwи ль wан вәгәр’анд у гот: «Әw нә ише wә йә кӧ һун wан wәхт у зәмана бьзаньбьн йед кӧ Баве бь һ’ӧкӧме Хwә к’ьфш кьрьнә.
[8] Ле гава Р’ӧһ’е Пироз бе сәр wә, һуне qәwате бьстиньн у жь Оршәлимеда гьрти т’әмамийа Щьһустане, Самәрйайе у һ’әта сәре дьне жи бьбьнә шә’дед Мьн» .
[9] Гава әв йәк гот, бәр ч’ә’ве wан бәрбь ә’змен һатә һьлатьне у ә’wрәки жь бәр ч’ә’ве wан Әw вәшарт .
[10] Әw һе зур’ бьбун ль чуйина Wийә ә’змен дьньһер’ин, ва дӧ мәрьвед к’ьнщсьпи щәм wан сәкьнин
[11] у готьн: «Гәли щәлилийа! Һун чьма ӧса сәкьни нә у ль ә’змен дьньһер’ьн? Әw Исайе кӧ жь нав wә һатә һьлатьне, wе ӧса жи бе, чаwа wә дит Әw чу ә’змен».
[12] Һьнге әwана жь ч’ийайе Зәйт’уне вәгәр’ийанә Оршәлиме, кӧ р’ийа р’ожәкә шәмийе дури Оршәлиме бу.
[13] Гава һатьнә бажер, чунә ода мәзьнә жорьн, әw щийе кӧ Пәтрус у Йуһ’әнна, Аqуб, Әндраwьс, Филипо, Т’ума, Бәртоломәйо, Мәтта, Аqубе Һалфаwо, Шьмһ’уне wәлатп’арьст у Щьһудайе Аqуб теда дьман .
[14] Ван һ’әмуйа һәр гав һәвр’а т’әви к’ӧлфәта у Мәрйәма дийа Иса у бьрайед Wи дӧа дькьрьн.
[15] Wан р’ожада Пәтрус нава баwәрмәндада р’абу, (кӧ ль wьр qаси сәд бист мәрьви бун) у гот:
[16] «Гәли бьра! Гәрәке әв ньвисара бьһата сери, чаwа кӧ бәри ве йәке Р’ӧһ’е Пироз бь дәве Даwьд бона Щьһуда готьбу, кӧ әw бу р’ебәре wан, йед кӧ Иса гьртьн.
[17] Әw т’әви мә нав һ’әсабе мәда бу у п’ара wи жи нава ви qӧльхида бу».
[18] (Әwи бь һәqе кьре хwәйи нәһәq ә’рдәк станд у ль wьр сәр сери к’әт, зьк ле qәльши дьл-һ’ьнаве wи һ’әму р’ьжийан.
[19] Әва йәка һ’әму бьнәлийед Оршәлимева ә’йан бу, һ’әта бь зьмане хwә жи wи ә’рдир’а Һәqьлдьма готьн, аwа готи «Ә’рде хуне».)
[20] Пәтрус думайи кьр гот: «Чаwа к’ьтеба Зәбурада жи ньвисар ә: ‹Дә бьра мала wи хьрабә бә, кәсәк теда нәминә› у: ‹Дә бьра qӧльхе wийи сәрwертийе йәки дьн бьстинә› .
[21] Аwа гәрәке йәк жь wан мера бә, к’ижан кӧ т’әмамийа wи wәхти т’әви мә бунә гава Хӧдан Иса т’әви мә дьчу дьһат,
[22] жь ньхӧмандьна Йуһ’әннада гьрти һ’әта wе р’ожа кӧ Әw жь нав мә бәрбь ә’змен һатә һьлатьне. Әw гәрәке т’әви мә бьбә шә’де р’абуна Wийә жь мьрьне».
[23] Дӧ мәри данә сәкьнандьне, йәк Усьве кӧ жер’а Барсабо дьготьн (кӧ наве wи данибун Йусто) у йе дьн Матийо.
[24] Дӧа кьрьн у готьн: «Хӧдан, Тӧ кӧ дьле һәр кәси зани, жь ван һәр дӧйа к’ижани кӧ Тӧ дьбьжери бьдә к’ьфше,
[25] wәки әви qӧльхе шандитийе бьстинә, жь к’ижани Щьһуда же к’әт кӧ һәр’ә щийе хwә».
[26] П’әшк сәр wан авитьн, п’ара Матийо к’әт у әw сәр һ’әсабе йанздәһ шандийада зедә бу.