[1] Жь Паwлосе бь ә’мьре Хwәде шандийе Мәсиһ Иса бона wи созе жийине, йа кӧ бь сайа Мәсиһ Иса йә,
[2] Тимот’ейойе лаwе хwәйи дәлалр’а: Дә бьра р’ә’м, к’әрәм у ә’дьлайи жь Бав Хwәде у Мәсиһ Исайе Хӧдане мә ль тә бә.
[3] Әз жь Хwәде р’ази мә, кӧ мина пешийед хwә бь исафа р’ьһ’әт Wир’а хӧламтийе дькьм, һәр гав шәв у р’ож нава дӧайед хwәда тә бир тиньм.
[4] Гава әз һесьред тә тиньмә бира хwә, дьк’әвьмә дәмана дитьна тә, wәки шабун бьк’әвә дьле мьн.
[5] Әз wе баwәрийа тәйә дьле сах тиньмә бира хwә, йа кӧ бәре щәм пирька тә Лойисе у дийа тә Әйньке һәбу у әз баwәр ьм, кӧ йа тә жи һәйә .
[6] Бона wе йәке әз дькьмә бира тә, кӧ тӧ агьре п’ешк’еша Хwәде һе гӧр’ ки, йа кӧ бь дәстданина мьн тәр’а һатә дайине.
[7] Чьмки Хwәде р’ӧһ’әки тьрсе нәда мә, ле Йе qәwате, һ’ьзкьрьне у хwәгьртьне .
[8] Аwа шәрм нәкә, кӧ бона Хӧдане мә шә’дәтийе бьди, нә жи бона мьн шәрм бькә, кӧ әз бона наве Wи гьрти мә. Ле т’әви щәфайе Мьзгинийе бә, анәгори qәwата Хwәде.
[9] Хwәде әм хьлаз кьрьн, пирозийер’а гази кьрьн, нә кӧ бона кьрьнед мә, ле ль гора qьрар у к’әрәма Хwә. Әва к’әрәма бь сайа Мәсиһ Иса, әw һе дәwред бәреда мәр’а һатә дайине.
[10] Ле ньһа бь хӧйабуна Хьлазкьре мә Мәсиһ Иса ә’йан бу, кӧ мьрьн бәтал кьр у жийина бе мьрьн, бь Мьзгинийе р’онайи кьр.
[11] Ве Мьзгинийер’а әз даннасинкьр, шанди у дәрсдар һатьмә к’ьфшкьрьне
[12] у ләма әз ви щәфайи дьк’ьшиньм. Ле әз шәрм накьм, чьмки заньм мьн баwәрийа хwә К’е анийә у гӧман ьм жи, кӧ Әwи чь кӧ спартийә мьн , wе һ’әта wе Р’оже жи хwәй кә.
[13] Тӧ хwә ль wи нәхше һинкьрьна сахләм бьгьрә, йа кӧ тә жь мьн бьһист у нава wе баwәри у һ’ьзкьрьнеда бьминә, к’ижан жь Мәсиһ Иса п’ара мә к’әт.
[14] Әw тьштед qәнщә кӧ ль тә һатьнә спартьне бь wи Р’ӧһ’е Пирози нава мәда хwәй кә.
[15] Тӧ зани әwед кӧ qәза Асйайеда бун пьшта хwә данә мьн, Фугәло у Һермохенис жи т’әви wан.
[16] Бьра Хӧдан р’ә’ма хwә ль мала Онисифоро бькә, чьмки әwи гәләк щара дьле мьн р’ьһ’әт кьр, жь гьртьна мьн шәрм нәдькьр,
[17] ле гава һатә Р’омайе, гәләки ль мьн гәр’ийа, һ’әта әз дитьм,
[18] (дә бьра Хӧдан бьде, кӧ әw wе Р’оже р’ә’ме жь Хӧдан бьбинә) у Әфәседа жи әwи чьqас мьнр’а хьзмәтк’ари кьр, тӧ р’ьнд зани.