Пәтрус I 5
[1] Әз һиви жь бәрпьрсийаред нава wәда дькьм, әз хwәха жи чаwа бәрпьрсийар у шә’де щәфед Мәсиһ у һәвал-п’аре wе р’умәте мә, йа кӧ wе хӧйа бә.
[2] Шьвантийе wи кәрийе пәзе Хwәдейи ль бәр хwә бькьн , нә кӧ бе дьл, ле бь дьл у щан ӧса хwәй кьн, чаwа Хwәде дьхwазә, нә кӧ бона к’ара хwә, ле бь р’әзәдьли ,
[3] нә кӧ ль сәр йед кӧ п’ара wә к’әтьнә һ’ӧкӧм кьн, ле нәхше qәнщ нишани кери кьн.
[4] У гава Сәрәкшьван ә’йан бә, һуне wе т’аще р’умәте бьстиньн, кӧ ч’ьрусийа wе ӧнда набә.
[5] Ӧса жи щаһьлно, гӧр’а мәзьнада бьн. У һун һ’әму жи, ль бәр һәв шкәсти бьн, хӧламтийе һәвдӧр’а бькьн, чьмки ньвисар ә: «Хwәде мьqабьли к’ӧбар-бабаха йә, ле к’әрәме дьдә шкәстийа» .
[6] Бьн дәсте Хwәдейи зор та бьн, кӧ Әw wәхтда wә бьльнд кә
[7] у һ’әму хәмед хwә бавежьнә сәр Wи, чьмки Әw бона wә хәм дькә.
[8] Сәрwахт бьн, һ’ьшйар бьминьн! Мирещьне нәйаре wә мина шер мьр’ә-мьр’а wи йә, дьгәр’ә к’а к’е һ’уфи хwә кә.
[9] Баwәрийеда һ’имгьрти мьqабьли wи бьсәкьньн, чьмки һун заньн кӧ хушк-бьред wә жи т’әмамийа дьнйайеда хут wан щәфа дьк’ьшиньн.
[10] Ле Хwәдейе т’әмамийа к’әрәме, Йе кӧ пе Мәсиһ һун гази р’умәта хwәйә һ’әта-һ’әтайе кьрьнә, пәй һьнәк щәфа дитьнер’а, wе Хwәха wә к’амьл кә, бьшьдинә, qәwат кә, хwәйибьнгәһ кә.
[11] Qӧдрәт жь wир’а һ’әта-һ’әтайе. Амин.
[12] Мьн бь дәсте Силас , чаwа бьраки амьн әз wи һ’әсаб дькьм, кьн wәр’а ньвиси, дьл дьдьмә wә у шә’дәтийе дьдьм, кӧ әв ә к’әрәма Хwәдейә р’аст. Веда һун qәwин бьсәкьньн.
[13] Щьвина Бабилонеда ль wә сьлав дькә, йа кӧ т’әви wә һатийә бьжартьне, ӧса жи лаwе мьн Марqос.
[14] Бь р’амусана һ’ьзкьрьнейә дьле сах һәвдӧ сьлав кьн. Дә бьра ә’дьлайи ль wә һ’әмуйед п’ара Мәсиһ бә. Амин.