[1] ئەڤجا ئەز دبێژم: ئایا خودێ گەلێ خۆ رەت كریە؟ حاشا! ئەز ب خۆ ژی ئیسرائیلیمە، ژ دویندەها ئیبراهیمی و ژ هۆزا بنیامینیمە.
[2] خودێ گەلێ خۆ یێ پێشوەخت هەلبژارتی، رەت نەكر. ما هوین نزانن نڤیسارا پیرۆز دەربارەی ئلیاسی چ دبێژیت، دەمێ ل بەرامبەر خودێ گازندە ژ ئیسرائیل كرین؟
[3] ئەوی گۆت: «خودان، وان پێغەمبەرێن تە كوشتن و قوربانگەهێن تە هەڕفاندن، ئەز ب تنێ یێ مایم و ئەو ل كوشتنا من ژی دگەڕن.»
[4] لێ بەرسڤا خودایی بۆ وی چ بوو؟ «من حەفت هزار زەڵام بۆ خۆ هێلاینە یێن چۆكڤەدان بۆ بەعلی نەبری.»
[5] د ڤی دەمی ژی دا هندەك یێن هەین كو ب رێكا كەرەمێ هاتینە هەلبژارتن.
[6] ئەڤجا ئەگەر ب كەرەمێ بیت، ئێدی ب كریاران نینە. ئەگەر ب كریاران با، ئێدی كەرەم نەدبوو كەرەم.
[7] ئەڤجا چ؟ ئەو تشتێ گەلێ ئیسرائیل بزاڤ بۆ دكر، ب دەست ڤە نەهات، لێ بدەست هەلبژارتیانڤە هات، ئەوێن دی ژی د سەرڕەق بوون.
[8] هەروەكو هاتیە نڤیسین: «خودێ ئەو كرنە د خەوەكا كویر دا و چاڤێن كو نەبینن و گوهێن كو نەبهیسن دانە وان، ئەو تا ئەڤرۆ ژی د وەسانە.»
[9] داوود ژی دبێژیت: «بلا سفرا وان ژ بۆ وان خەفك و داڤ و بەرێ هەلنگفتنێ و سزا بیت.
[10] بلا چاڤێن وان تاری ببن، دا نەبینن، هەردەم پشتێن وان د چەماندی بن.»
[11] ئەڤجا ئەز دبێژم: ئایا ئەو هەلنگفتن دا وەسا بكەڤن كو نەشێن راببنەڤە؟ حاشا! لێ ب رێكا هەلنگفتنا وان، قورتالبوون بۆ نەجوهیان هات، دا چاڤپێڕانەبوونا جوهیان بهێتە ئازراندن.
[12] ئەگەر هەلنگفتنا وان بۆ جیهانێ دەولەمەندی بیت و شكەستنا وان بۆ مللەتێن نەجوهی دەولەمەندی بیت، ئەڤجا ب قورتالبوونا وان دێ دەولەمەندی چەند پتر بیت!
[13] ئەز بۆ هەوە نەجوهیان دبێژم: مادەم كو ئەز هنارتیێ نەجوهیانم، ئەز هەمیان ب مەزناهیا خزمەتا خۆ ئاگەهدار دكەم،
[14] بەلكو ب ڤێ چەندێ ئەز چاڤپێڕانەبوونا مللەتێ خۆ بئازرینم و هندەكان ژ وان قورتال بكەم.
[15] چنكو ئەگەر رەتكرنا وان ژ لایێ خودێ ڤە بۆ جیهانێ ئاشتكرن بیت، هنگی قەبیلكرنا وان ژ لایێ خودێ ڤە دێ چ بیت، ئەگەر ڤەژینا مریان نەبیت؟
[16] ئەگەر نانا ئێكێ، ئەوا دهێتە پێشكێشكرن ، یا پیرۆز بیت، ئەو هەڤیر هەمیێ پیرۆزە و ئەگەر رەه یا پیرۆز بیت، چەق ژی د پیرۆزن.
[17] لێ ئەگەر هندەك چەق هاتنە بڕین و تۆ ژی دارزەیتوونەكا خۆڕستی بی و پێڤە هاتیە پەترومەكرن و بوویە پشكدارێ رەه و قەلەویا دارزەیتوونێ،
[18] ل بەرامبەری وان چەقێن هاتینە بڕین، شانازیێ ب خۆ نەبە. ئەگەر تە شانازی ب خۆ بر، ژ بیر نەكە كو تۆ رەهێ هەلناگری، لێ رەه تە هەلدگریت.
[19] ئەڤجا تۆ دێ بێژی: «چەق هاتنە بڕین داكو ئەز بهێمە پەترومەكرن.»
[20] راستە، ئەو ژ بەر بێباوەریێ هاتنە بڕین و تۆ ب باوەریێ جهگیر بووی. ئەڤجا خۆ دفنبلند نەكە، لێ بترسە.
[21] چنكو ئەگەر دلێ خودێ نەمابیتە ب چەقێن خۆمالی ڤە، دلێ وی نامینیتە ب تە ژی ڤە.
[22] ئەڤجا قەنجی و توندیا خودێ ببینە: توندی بۆ وانە یێن كەفتین ، قەنجی ژی بۆ تەیە، ئەگەر تۆ د قەنجیا وی دا بمینی. ئەگەر نە، تۆ ژی دێ هێیە بڕین.
[23] ئیسرائیلی ژی ئەگەر د بێباوەریێ دا نەمینن، دێ هێنە پەترومەكرن، چنكو خودێ دشێت وان پەترومە بكەت و جارەكا دی ب دارێ ڤە كەت.
[24] چنكو ئەگەر تۆ ژ دارزەیتوونەكا خۆڕستی هاتیە بڕین و بەروڤاژی سرۆشتی ب دارزەیتوونەكا خۆمالیڤە هاتیە پەترومەكرن، چەند پتر چەقێن رەسەن یێن دارا خۆمالی دێ ب دارزەیتوونا خۆ ڤە هێنە پەترومەكرن!
[25] ئەز حەز ناكەم، گەلی خویشك و برایان، هوین ئاگەهداری ڤێ نهێنیێ نەبن، داكو هوین خۆ ئاقلدار نەهژمێرن. نهێنی ئەوە كو سەرڕەقیێ پشكەكا گەلێ ئیسرائیل یا گرتی، تاكو ژمارەیا نەجوهیێن دێ قورتال بن، تەمام ببیت.
[26] هۆسا هەمی گەلێ ئیسرائیل دێ قورتال بیت، هەروەكو هاتیە نڤیسین: «قورتالكەر دێ ژ سییۆنێ هێت، ئەو دێ خودێنەنیاسیێ ژ دویندەها یەعقوبی دویر ئێخیت.
[27] ئەڤە پەیمانا منە ل گەل وان، دەمێ كو ئەز گونەهێن وان رادكەم.»
[28] سەبارەت مزگینیێ ئەو ژ پێخەمەت هەوە دوژمنن ، لێ سەبارەت هەلبژارتنا خودێ ئەو ژ پێخەمەت بابكالان خۆشتڤینە.
[29] چنكو خودێ ژ بەرەكەتداركرن و هەلبژارتنا كەسەكی پەشیمان نابیت.
[30] كا چەوا دەمەكی هەوە گوهداریا خودێ نەكر، لێ نوكە ژ ئەنجامێ نەگوهداریا وان دلۆڤانی ب هەوە هاتە برن،
[31] هۆسا ئەو ژی نوكە بوونە نەگوهدار، دا ژ ئەنجامێ وێ دلۆڤانیا ب هەوە هاتیە برن، دلۆڤانی ب وان ژی بهێتە برن.
[32] چنكو خودێ هەمی كرنە گرتیێن نەگوهداریێ، داكو دلۆڤانیێ ب هەمیان ببەت.
[33] چەند د كویرن دەولەمەندی، ئاقلمەندی و زانینا خودێ! چەند د دویرن بڕیارێن وی ژ تێگەهشتنێ و رێكێن وی ژ راڤەكرنێ!
[34] چنكو «ما كێ هزرێن خودانی زانینە؟ یان كی بوویە شیرەتكارێ وی؟»
[35] «ما كێ تشتەك دایە وی، كو لێ بهێتە ڤەگەڕاندن؟»
[36] چنكو هەمی تشت ژ وینە و ب وینە و ژ بۆ وینە، مەزناهی هەروهەر بۆ وی بیت. ئامین.