[1] ل وان رۆژان، دەمێ شاگرد مشە دبوون، جوهیێن یونانی نەرازیبوونا خۆ ل سەر عیبرانیان دیار كر، چنكو بیژنێن وان د هاریكاریێن رۆژانە دا دهاتنە پشت گوه ڤە ئێخستن.
[2] ئینا هەر دوازدە هنارتیان گازی كۆما شاگردان كر و گۆتنێ: «یا باش نینە، ئەم پەیڤا خودێ بهێلین داكو هاریكاریان بەڵاڤ بكەین.
[3] ئەڤجا گەلی برایان، د ناڤ خۆ دا حەفت زەڵامان هەلبژێرن كو ناڤودەنگێن وان یێ باش بیت و دپڕ بن ژ گیانێ پیرۆز و ئاقلمەندیێ، دا وان دانینە سەر ڤی كاری.
[4] لێ ئەم دێ ل سەر نڤێژان و خزمەتا پەیڤێ د بەردەوام بین.»
[5] ئەڤ پێشنیارە ب دلێ هەمی جەماوەری بوو، وان ژی: ستیڤانۆس، زەڵامەكێ پڕی باوەریێ و گیانێ پیرۆز، هەروەسا فیلیپۆس، پروخورس، نیكانور، تیمون، پەرمیناس و نیقولاوسێ ئەنتاكیایی ئەوێ بوویە جوهی، هەلبژارتن.
[6] جەماوەری ئەڤ هەر حەفتە ل بەرامبەر هنارتیان راوەستاندن، هنارتیان ژی نڤێژ كرن و دەستێن خۆ دانانە سەر وان.
[7] ئینا پەیڤا خودێ پتر بەڵاڤ دبوو و ژمارەیا شاگردان ل ئورشەلیمێ گەلەك زێدە دبوو، هەروەسا گەلەك ژ كاهنان ملكەچی باوەریێ بوون.
[8] ستیڤانۆسێ پڕ ژ كەرەم و هێزێ، مەندەهۆشی و نیشانێن مەزن ل ناڤ مللەتی دكرن،
[9] لێ هندەك جوهیێن ‹كنیشتەیا ئازادكریان› ژ قەیرەوانێ و ئەسكەندەریێ، ل گەل هندەكێن دی ژ هەرێمێن كیلیكیا و ئاسیا رابوون و گەنگەشە ل گەل ستیڤانۆسی كر.
[10] لێ ئەو نەشیان ل بەر ئاقلمەندیا وی و ئەو گیانێ پێ دئاخفت راوەستن.
[11] ئەڤجا وان هندەك زەڵام بەرتیل كرن دا ببێژن: «مە گوه ل ستیڤانۆسی بوو دەربارەی مووسای و خودێ كوفری دكرن.»
[12] هۆسا وان مللەت، ریهسپی و مامۆستایێن دەستووری ل ستیڤانۆسی ئاراندن. ئەڤجا گرت و ئینا جڤاتێ
[13] و هندەك شاهدێن درەوین ئینان و گۆتن: «ئەڤە بەردەوام ئاخفتنا دژی پەرستگەهێ و دەستوورێ مووسای دبێژیت،
[14] چنكو مە گوه لێ بوو یێ دبێژیت، كو عیسایێ ناسیرەیی دێ ڤێ پەرستگەهێ هەڕفینیت و ئەو داب و نەریتێن مە ژ مووسای وەرگرتین دێ گوهۆڕیت.»
[15] دەمێ ئەوێن ل جڤاتێ روینشتی بەرێ خۆ دایە دێمێ وی، دیتن هەروەكو دێمێ فریشتەیانە.