[1] Tiyofalas, Ala ngǝwuro! Amnde ngǝwu gǝrgam kǝla lamarra dawunden wakkajana aniyen ruwuduro ngǝssana,
[2] jiɍi am duwon tǝn badiduramnin awo ania simnjan caruna-a mana Alaye sattuwumasoro waljana-adǝ andiro isanosaanadǝ gai.
[3] Barganǝmmin, tǝn badiduramnjan awo ani sammaa gakke hangallayen kokorǝkke fakkǝna nangaro, wu ye tayia sawinǝkke niro kitawulan ruwunjǝgǝkki yekko.
[4] Ngainin awowa niro njasakkǝrana sammaa tabbatto nonǝmi.
[5] Jaman Mai Hirudus lardu Yahudiyaye cunodidǝn, ɍiman laa mbeji kǝwu ɍimanna Abiyayen kǝrga, cunju Jakariya. Kamunju ye kaduwu Nawi Harunaye, cunju Alisabatu.
[6] Tayi yindiso na Alayen jirewu, wada Kǝmandeye sammaa taldu baworo jaana.
[7] Tada cawandǝnni, Alisabatu rakce cambiwawo nangaro, koro tayi yindi kawu ngǝwu jawuna.
[8] Kǝwu Abiyaye sanja dirije kidǝnniya, Jakariya ye kidanju nanɍimanne fuwu Alayen badiyeno.
[9] Kǝla ada ɍimannayedǝn kamnja fal Fado Alaye na darajaaro ngawo kaaji cakkoro walawala cade Jakariyaa kǝreyera.
[10] Sa kaaji njakkoyen jama samma balballadǝn captana moduwa cadi duwon,
[11] malaiya Kǝmandeye laa kǝmboram kaaji njakkoramben daada tiro fǝleyaada.
[12] Jakariya tia kirunniya, hangalnju jade karwunju pǝt kamgada.
[13] Amma malaiyadǝye tiro: «Jakariya, bare rinǝmmi, Ala moduwanǝm cǝmowona. Kamunǝm Alisabatu niro tada kongwa njǝkkambi, tiro cu Yahaya yakke.
[14] Tiramnin jauro karwunǝm kǝjiji, koro tambonjudǝye am kada ye kǝji fanjai.
[15] Ti na Kǝmandeyen kam darajaaro walji. Bare diben bi mbal fimaa canni, kawu tambimaro Ruhu Alaye tilan dǝgai.
[16] Kaduwu Israyilaye kadaa jawal Ala Kǝmanjayero kalakciyi.
[17] Tidǝ ro-a kǝnduwo-a Nawi Iliyayelan Kǝmadǝa burwoje ise bawaso-a tadawanjaso-a soloji, am ansiya Alaye ye hangal jirewuyero kalakciyi. Adǝgaima Kǝmadǝro jamaa dabbarjiyi,» yeno.
[18] Amma Jakariyaye malaiyadǝro: «Awiawin mana adǝa jirero nokki? Akko wu kiarinǝkkǝna, kamuni ye kǝmurjojǝnadǝ,» yeno.
[19] Daji malaiyadǝye tiro: «Wuma Jibǝrilla fuwu Alayen dadumadǝ wo. Tima wua nanǝmbo lawar kǝji adǝa njukkudǝkkoro sunodo.
[20] Amma manani yasarammidǝ, har awo ani wakkajaidǝro, mǝdǝk nammǝme mana dimbaworo wallǝmi. Awo wulnjǝgǝkkǝna adǝ sanju cǝdiya, tabbatto wakkaji.»
[21] Jama Jakariyaa gurejai ngai duwon, na darajaadǝn jauro tussǝnadǝa ajapkera.
[22] Kiluwunniya, mana tayiro njǝddo tiro tiyero. Jamadǝ awo ajabba laa na darajaalan tiro fǝledǝgǝnaro asuyera. Muwamuwan gǝnia, tayiro rakce manajiyiwawo, mǝdǝk napkeno.
[23] Kida nanɍimanne sanju kerǝnniya, fadoro wallada.
[24] Ngawo kawu aniyen kamunju Alisabatu curo ngoyeno. Kǝndawu uwuro kuwulero kǝlanju cakke karwunjun:
[25] «Akko ser Kǝmande sǝddǝna. Kawu anin kanjimaɍinju wuro fǝlesiye dawu amben nanguni cuttuluwuna,» yeno.
[26] Alisabatu curo ngojǝnaye kǝndawu arakkua Ala malaiya Jibǝrillaa bǝla Najarat cani cidi Galileyedǝro cunode
[27] na fero kǝlayakku laa tǝmajinju kaduwu Mai Daudaye laa cunju Isuwuyero leyeno. Ferodǝ cunju Meram.
[28] Malaiyadǝ na Merambero ise tiro: «Wuse, ni Kǝmande jauro barga dǝmnjǝgǝnamadǝ! Kǝmadǝ ni-a rokko,» yeno.
[29] Merambe hangalnju kǝla lewa adǝyen jauro cije awi maananjuro kǝlanju cuwori duwon,
[30] malaiyadǝye tiro: «Meram, bare rinǝmmi, Ala niro barga dǝmnjǝgǝna.
[31] Akko curo ngonǝme tada kongwa yambǝmi, tiro cu Isa yakke.
[32] Ti kam darajaaro walje tia Tada Mai Samemayelan bowojai. Ala Kǝmande tiro kǝrmai kaarinju Mai Daudayedǝa ci.
[33] Adǝgaima jama Yakubayea har abadaro cunodi, kǝrmainju ye tǝmmaro ceriwawo.»
[34] Daji Merambe malaiyadǝro: «Awiawin attǝ yoji, wu ngaltema kwa nokkǝnidǝ?» cǝne tia kiworo.
[35] Malaiyadǝye tiro: «Ruhu Alaye kǝlanǝmbo jǝpciye kǝnduwo Mai Samemaye nia fofou gairo jannji. Adǝ nangaro tada tayir nilan tambidǝa Tada Alayelan bowojai.
[36] Akko kǝraminǝm Alisabatu ye nankǝmurjonjun curo ngojǝna. Kamu rakce cambiwawo canidǝ, kǝrma curonju kǝndawu arakkuyea.
[37] None, awima Alaro tiyeri bawo!»
[38] Merambe: «Wu kanji Kǝmandeye. Kǝla mananǝmben wakkajo!» yeno. Daji malaiyadǝ tia kolje sapkadan.
[39] Yim anin Meram cije duwaduwan bǝla cidi Yahudaye curo kauwa kura kurayen dǝgana laaro leje
[40] fado Jakariyayero ngaye Alisabaturo salamgeyeno.
[41] Alisabatu salamduwunjudǝa fangenniya, tada curonjuyedǝ moji kido. Ruhu Alaye Alisabaturo jǝpciye
[42] kowo dunoaro sapce: «Curo kamuwayen nima bargaa wo, tada curonǝmbedǝ ye bargaa!
[43] Koro awiro gǝle Kǝmande wuro ser sǝdde, har ya Kǝmaniye naniro isidǝ?
[44] Akko salamduwunǝmdǝa fangekkǝniya, tada curoniyedǝ karwukǝjiro moji kido.
[45] Awo Kǝmande niro wulnjǝgǝnadǝ wakkajiro mǝrsanǝmmadǝ, barganǝm!» yeno.
[46] Daji Merambe: «Karwuni Kǝmandea jajakci,
[47] roni Ala Njǝkkayimanilan kǝji fanji.
[48] Wu kanjinjudǝa curo nantalaaniyen surune ngurnosǝna. Na adǝn fuwun am jaman sammaye wua bargaalan bowosai,
[49] Mai Kǝnduwoma ser kura wuro sǝddǝna nangaro. Cunju darajaa.
[50] «Jaman kureyen tai jaman ngusoro kanjimaɍinju am tia rijanaro fǝlejiyi.
[51] Kǝmande mukkonjun kǝrmai fǝleje, am karwunjan rokuraa tarjǝna.
[52] Maiyaso kǝrmailan cǝsaye sǝlje, talaawaso yea darajaaro cǝdǝna.
[53] Am kǝnanjaasoa awo ngǝlan ambaje, gaɍiwuwaso yea mukko dea dujǝna.
[54] Kǝmande kanjimaɍinju fǝledu koljǝnni, kanjinju Israyilaa banajǝgǝna,
[55] amwurawande Nawi Ibrahim-a kaduwunju-aro har abadaro wuljǝgǝnadǝ gai.»
[56] Meram fado Alisabatuyen kǝndawu yakku gairo napkenniya, fannjuro wallada.
[57] Alisabatu sanju njamboye kidǝnniya, tada kongwa kembo.
[58] Am fannjuye-a kǝmaskiyanju-a ser kura Kǝmande tiro cǝddǝnadǝa fanjane karwukǝjinja tiro fǝleyeyera.
[59] Kawu wuskua jama kajanjuro kadiranniya, tiro cu bawanju Jakariyaye njakko mayera,
[60] amma yanjuye: «A'a, tia Yahayalan bowojai,» yeno.
[61] Tayiye tiro: «Wunduma curo kǝramiyanǝmben cu adǝa bawo!» yera.
[62] Daji muwamuwan bawanjuro cu fi tadadǝro cakkiya cǝraworo keworo.
[63] Jakariya allo cuwore tilan «Cunju Yahaya» ruwuyeno, koro tayi samma ajapkera.
[64] Sadǝman Jakariya ci ye cuwande, tǝlamnju ye wuide, Alaa cungoriaro mana badiyeno.
[65] Daji kǝmaskiyanja samma riyera, koro lawar adǝ cidinja Yahudiyaye kauwa kura kuraa sammaro tatargaada.
[66] Jama adǝa fanjana samma karwunjan rojana, amanjaro: «Tadaana adǝ, awiro gǝle walji?» cani. Fagatto mukko Kǝmandeyedǝ tilan kǝrga.
[67] Daji Ruhu Alaye Jakariyaro jǝpciye nawinawi cǝde:
[68] «Ala Kǝma Israyilawuyedǝa yungoriyo! Nguwu jamanjuyero ngaye tayia merujǝna,
[69] andiro curo kaduwu kanjinju Mai Daudayen Njǝkkayima kǝnduwoa galasaana.
[70] Kǝmande kuren ci nawiyanju kǝrejǝnayen wuljǝnadǝ gai,
[71] mukko kǝladowande-a waduwunde samma-ayen samoye
[72] amannju bargaa koljǝnnilan amwurawandero kanjimaɍinju fǝlejiyi.
[73] Akko kansi duwon bawande Nawi Ibrahimbo jǝbbunadǝ:
[74] Mukko kǝladowandeyen andia samoyiya, andi ye ridu bawoaro rangiye tia gaiye
[75] fuwunjun nanmumin-a nanjire-alan kawunde samman tiro ambǝtkǝiye.
[76] «Ni ye, tadani, nia nawi Mai Samemayen bowonjai. Kǝmadǝn fuwunno lenǝme tiro jawal dabbargǝmi,
[77] jamanjuro biwunja gawurduyen njǝkkawodǝa isanogǝmi.
[78] Ala Kǝmande kanjimaɍima ye, serma ye nangaro, cakke Nur Kudoma nandero samelan ise
[79] am duwu-a kaudi karmoye-alan dasaanadǝa wassi, koro andiro jawal nanlewayedǝa fǝlesagai.»
[80] Adǝgaima tadadǝ wuraji ye, Ruhu Alayen dunoaji ye, har yim jama Israyilayero fǝledǝgǝnadǝro karaan kǝrga.