[1] Yim ngǝmǝri tiro Fentikos canidǝ kidǝnniya, Isaa gawudǝ samma na tilon captana duwon,
[2] sadǝman awo laa karuwa jauro cǝgasi gai samelan nukce fado na napcanadǝ sammaa kimowo.
[3] Awo laa alama tǝlamba kannuye gai tayiro fǝledagane fafaidane kǝla wundunja yayen napkeno.
[4] Ngainin Ruhu Alaye tayi sammaro jǝpciye cakke tǝlamba gadegaden manadu badiyera.
[5] Sa adǝ yen yaudiya muminna laa larduwa dunia sammaye Jerujalembo isane dasaana mbeji.
[6] Nuktu adǝa fangeranniya, jama isane captane hangalnja ciyeno, dalilnjudǝ wundunja yaye tǝlamnjun jandejai fanjǝna nangaro.
[7] Jaumaro ajapcane kattenjan: «Am jandejai ani samma am cidi Galileye, gǝna?
[8] To, jiɍi fin gǝle wundunde yaye awo wuljaidǝa tǝlamnju tamboyeman fanjidǝ?
[9] «Curonden am Fartiyaye-a Mediyaye-a Elambe-a mbeji. Laande ye Mesofotamiya-a Yahudiya-a Kafadokiya-a Fantus-a Asiya-a
[10] Firijiya-a Bamfiliya-a Masar-a kǝrye Libiye kanji bǝla Kuraneyen-a bǝrni Rombe-alan kasarga.
[11] Gadende yaudi yen kal, kǝrdi duwon yaudiro walyeno yen kal, Kǝret-a Arabiya-alan kadira. Tǝlamnden awo ajabba ajabba Ala cǝdǝnadǝa am ani wuljai fanniye!»
[12] Tayi samma jaumaro ajapcane hangalnja cije wunduye kamanjuro: «Awo attǝ, awi maananju wo?» cǝni.
[13] Amma laa ye tayia rujane: «Diben lele diye casane sagarandana!» cani.
[14] Daji Biturus kǝngayamba mewun tilondǝ-a rokko cije daje kowo sapce jamadǝro: «Am lardu Yahudiyaye-a nayi Jerujalemlan dǝgawwa samma-a manani fannowo, awo adǝa asunowo!
[15] Am ani sagarandanaro tǝmanuwwa duwon, ngai gǝni, kǝrmadǝ sa lǝgar suwaye.
[16] Amma adǝma awo Ala ci Nawi Yowellen wuljǝnadǝ:
[17] «“Jaman daryeyen adamgǝna sammaro Ruhunidǝa figǝkke tadawando-a ferowando-a nawinawi cade, jairowando ye wahayi carui, kiariyando ye kǝnnasim cadi.
[18] Yim anin har kanjiyani kwa-a kamu-aro Ruhunidǝa figǝkke nawinawi cadi.
[19] Awo ajabba ajabba samelan dikki, alamaso ye cidilan dikki: bu-a kannu-a kange cǝlǝm samero ciɍijiyi-a.
[20] Kǝngal ye cǝlǝmbo walji, kumbal ye buro walji. Ngawo adǝyen yim kura darajaa Kǝmandeyedǝ isi.
[21] Daji wundu duwon cu Kǝmandeyea bowojǝnamadǝ njǝkkawo cuwandi.”
[22] «Jama Israyilaye, mana adǝa fannowo! Nayima dam nonuwwa, Ala Isa kam Najarattedǝlan kǝnduwo so, awo ajabba so, alama so dawundon cǝdiaro tia ardijǝnaro fǝleyeno.
[23] Nodunjun caman tagǝnasso kadarjǝnadǝ gai, timaa mukkondoro sǝrǝccagane, nayi ye mukko am diwiyelan tia kǝskaro jawuwe kejuw.
[24] Amma Ala tia ajawu karmoyero cǝkkaye roaro kisango, karmodǝ tǝmmaro rakce tia rojiwawo nangaro.
[25] Awoa Nawi Dauda kǝla tiyen adǝa wulyeno: «“Kullum Kǝmandea fuwunin rukki, ti kǝmborammin dǝgana nangaro awima loloduro sakkiwawo.
[26] Adǝma nangaro karwuni kǝjiji, cini yelan aiya yekki. Tiyini ye tǝmaa dǝgai,
[27] dalilnjudǝ roni kannulan kollǝmbawo, Ti Tayirnǝmdǝa yakkǝme njǝpciwawo nangaro.
[28] Jawal ro fandoye isanosǝgǝmma, koro fuwunǝmnin karwukǝji dadu bawo simi.”
[29] «Kǝramiyani, kǝla kaarinde Nawi Daudayen nayiro farakko wulnjagakki, bawoje tia sittǝrayera, kaurinju ye kumaro nanden kǝrga.
[30] To, ti nawi duwon, koro Ala tiro kaduwunju fal mairo galajiro kansi jǝbbunadǝa nojǝnadǝ,
[31] caman karmolan cidu Almasiwuyedǝa cure kǝladǝn tiye kannulan tia koljǝnni, tiyinju ye njǝpcǝnni cǝnna.
[32] Ti Isa adǝmaa Ala roaro kalakco, kǝla adǝyen andi samma shedawu.
[33] Tia kǝmboram Alayero sapcane, Ruhu Alaye duwon Bawadǝ ci cǝne wadu ngojǝnadǝa cǝmowona adǝ, awo ruwwa-a fannuwwa-adǝa fiyeyeno.
[34] Awoa Nawi Dauda samero lejǝnni, amma ti kǝlanjuye: “Kǝmandeye Kǝmaniro: ‘Namme kǝmborammilan duwon,
[35] kǝladowanǝmba si gǝnadurammǝmbo dikki!’ cǝnna.”
[36] Adǝ nangaro jama Israyilaye samma adǝa fagatto noja: Isa kam kǝskaro jajagǝwwadǝ, Ala timaa Kǝma ye, Almasiwu yero cǝdo!» yeno Biturusse.
[37] Jamadǝ adǝa fangeranniya, karwunja kamde Biturus-a kǝngayamba gadedǝ-aro: «Kǝramiyandeso, awi gǝle diye?» cane keworo.
[38] Biturusse tayiro: «Tǝmmowo, biwundo cindoro wundundo yayero cu Isa Almasiwuyen kasala caddo, ngainin Ala Ruhunjudǝa njadi.
[39] Awoa wadu adǝmadǝ kaando ye, kaduwundoye ye, am kuruwun dasaana sammaye ye, wotte wundu duwon Ala Kǝmande bowojidǝye.»
[40] Biturus mana gade ngǝwulan sǝmonja kasse gala cǝdde: «Jaman diwi adǝlan kǝlandoa yǝkkawowo!» cǝni.
[41] Daji am mananju ngojanadǝro kasala keddo. Yim adǝn alama am dǝwu yakku gai Isaa gawudǝro kǝllaadara.
[42] Sawiso karwu tiloaro Isaa gawudǝ alamdu kǝngayambayedǝa kǝrǝnjai, naptu nanyaanaye cadi, burodi fǝsakcane kallo jagari, moduwa ye rokko cadi kasarga.
[43] Mukko kǝngayambadǝyen awo ajabba so, alama so kada tadi nangaro, am samma riyera.
[44] Isaa gawu samma na tilon dasaana, awonja sammaa kallo cadai,
[45] koro kǝndanja calade wuɍidǝa dagarjane mǝradu wunduye yaye galjai.
[46] Yimbi yaye karwu tiloaro Fado Alayen captai, fado fadolan burodi fǝsakcane karwu kǝjiaro rokura bawoalan kǝmbonjadǝa kallo jawui,
[47] Alaa congori, koro na jama sammayen ardiya cawandi kasarga. Yim nguson Kǝmande am njǝkkawo cawandidǝa tayiro kǝljiyi.