[1] ओहीच दिन दबोरा अऊ अबीनोम के बेटा बाराक ये गीत गाईन:
[2] “जब इसरायल के राजकुमारमन अगुवई करथें, जब मनखेमन अपन ही ईछा से अपनआप ला दे देथें— यहोवा के परसंसा होवय!
[3] “हे राजामन, ये बात ला सुनव! हे सासन करइयामन सुनव! मेंह खुद यहोवा बर गीत गाहूं; मेंह यहोवा, इसरायल के परमेसर के गीत गाके परसंसा करहूं।
[4] “हे यहोवा, जब तेंह सेईर ले निकलय, जब तेंह एदोम के देस ले आघू बढ़य, त धरती ह कांपिस, अकासमन टूट पड़िन, बादरमन पानी बरसाईन।
[5] सीनय के यहोवा के आघू म, यहोवा, इसरायल के परमेसर के आघू म पहाड़मन कांप उठिन।
[6] “अनात के बेटा समगर के दिनमन म, अऊ याएल के दिनमन म, राजमार्गमन सूना पड़े रिहिन; डहार रेंगइयामन पै-डगरीमन ले जावत रिहिन।
[7] जब तक में, दबोरा ह छुड़ानेवाला बनके नइं उठेंव, जब तक मेंह इसरायल म एक दाई होके नइं उठेंव, इसरायल म गांववालामन नइं लड़त रिहिन; ओमन पाछू घुंचत रिहिन।
[8] परमेसर ह नवां अगुवामन ला चुनिस, जब लड़ई ह सहर के दुवारमन म आ गीस, पर चालीस हजार इसरायलीमन के बीच म एको ठन ढाल या बरछी नइं दिखिस।
[9] मोर मन ह इसरायल के राजकुमारमन कोति, अऊ मनखेमन के बीच म अपन ईछा से सैनिक बने मनखेमन कोति हवय। यहोवा के परसंसा होवय!
[10] “हे पंर्रा गदहामन म सवारी करइया, अपन काठी म कम्बल डालके बईठइया मनखेमन, अऊ हे रसता म रेंगइया मनखेमन,
[11] पानी सिंचइया जगहमन म गीत गवइयामन के अवाज ऊपर धियान दव। ओमन यहोवा के बिजय के, अऊ इसरायल म ओकर गांववालामन के बिजय के गीत गाथें। “तब यहोवा के मनखेमन खाल्हे सहर के दुवारमन करा गीन।
[12] ‘जाग, जाग, हे दबोरा! जाग, जाग, गाना सुना! हे बाराक, उठ! हे अबीनोम के बेटा, अपन बंदीमन ला बंधुवई म ले जा।’
[13] “परभावसाली मनखेमन के बांचे मनखेमन खाल्हे उतरिन; यहोवा के मनखेमन बलसालीमन के बिरूध म लड़े बर मोर करा उतर आईन।
[14] कुछू मनखेमन एपरैम ले आईन, जेमन के संबंध अमालेक म रिहिस; बिनयामीन ह ओ मनखेमन के संग रिहिस, जऊन मन तोर पाछू चलिन। माकीर म ले कप्तानमन उतर आईन जबूलून ले सेनापति के सामान-धरइयामन आईन।
[15] इस्साकार के राजकुमारमन दबोरा के संग रिहिन; हव, इस्साकार ह बाराक के संग रिहिस; ओकर हुकूम पाके ओमन घाटी म गीन। रूबेन के इलाकामन म बहुंत बातमन ला मन म सोचे गीस।
[16] भेड़-बकरी के झुंड बर चरवाहा के सीटी के अवाज सुने बर, तेंह काबर भेड़साला म रूक गे रहय? रूबेन के इलाकामन म बहुंत बातमन ला मन म सोचे गीस।
[17] गिलाद ह यरदन के ओ पार रह गीस। अऊ दान ह काबर पानी जहाजमन म रूक गीस? आसेर ह समुंदर के तीर म रह गीस अऊ ओकर छोटे खाड़ीमन म ठहर गीस।
[18] जबूलून के मनखेमन अपन परान ला खतरा म डालिन; वइसने ही नपताली घलो खेतमन के चौरस जगह म ठहर गीस।
[19] “राजामन आईन, अऊ ओमन लड़िन, कनान के राजामन मगिद्दो के सोतामन करा तानाक म लड़िन; ओमन चांदी के कोनो सामान ला नइं लूटिन।
[20] अकासमन ले तारामन लड़िन; ओमन अपन क्रम म सीसरा ले लड़ई करिन।
[21] कीसोन नदी ह ओमन ला बोहाके ले गीस, याने कि ओ पुराना नदी, ओ कीसोन नदी। हे मोर मन, आघू बढ़; मजबूत हो!
[22] तब घोड़ामन के खुर के गरजन होवन लगिस— ओकर ताकतवर घोड़ामन सरपट दऊड़न लगिन।
[23] यहोवा के स्वरगदूत ह कहिस, ‘मेरोज सहर ला सराप देवव; येकर मनखेमन ला भारी सराप देवव, काबरकि ओमन यहोवा के सहायता करे बर, बलसाली मनखेमन के बिरूध म यहोवा के सहायता करे बर नइं आईन।’
[24] “केनी हेबेर के घरवाली याएल ह माईलोगनमन म सबले जादा धइन होवय, तम्बू म रहइया माईलोगनमन म सबले जादा धइन होवय।
[25] सीसरा ह पानी मांगिस, पर ओह ओला दूध दीस; परभावसाली मनखेमन बर उचित, ओह सीसरा बर कटोरा म दही ले आईस।
[26] याएल ह अपन एक हांथ म तम्बू के खूंटी, अऊ अपन जेवनी हांथ म बढ़ई के हथौड़ा धरिस। अऊ ओह हथौड़ा ले सीसरा ला मारिस; ओह ओकर मुड़ ला कुचर दीस; ओह ओकर कनपटी ला चकनाचूर करके आर-पार छेद दीस।
[27] ओ माईलोगन के गोड़मन म ओह झुकिस, ओह गिरिस; उहां ओह चित हो गीस। ओकर गोड़मन म ओह झुकिस, ओह गिरिस; जिहां ओह झुकिस, उहां ओह गिरिस—मर गीस।
[28] “खिड़की म ले सीसरा के दाई ह झांकके देखिस; अऊ जाली के पाछू म ले पुकारके कहिस, ‘ओकर रथ के आय म अतेक देर काबर होवत हे? ओकर रथमन के खड़खड़ के अवाज काबर सुनई नइं देवत हे?’
[29] ओकर सबले बुद्धिमान माईलोगनमन ओला जबाब देथें; वास्तव म, ओह अपनआप ला कहिते रहिथे,
[30] ‘का ओमन लूट ला पाके बांटा नइं करत हें: हर आदमी बर एक या दू माईलोगन, सीसरा बर लूट के रूप म रंग-बिरंगी कपड़ामन, काढ़े गय रंग-बिरंगी कपड़ामन, मोर गला बर बढ़िया ढंग से काढ़े गय कपड़ामन— ये जम्मो लूट के रूप म?’
[31] “हे यहोवा, तोर जम्मो बईरीमन नास हो जावंय! पर ओ जम्मो, जऊन मन तोर ले मया करथें, ओमन अपन पूरा ताकत ले उगत सूरज के सहीं होवंय।” तब इसरायल देस म चालीस साल तक सांति रिहिस।