[1] Liá phoi-ngia̍k, fú-phai, khî-fu ngìn ke sàng chhám lé!
[2] Kì m̀ thâng-chhiùng Song-chú ke min-lin, ya m̀ chiap-su Kì ke kón-kau. Kì m̀ yí-kho Song-chú, ya m̀ chhîn-khiun kì ke Song-ti.
[3] Kì ke-têu cho-kôn ke chhiong ho-ho-kún ke sṳ̂-é; kì ke-têu sṳ́m-phan-kôn thâm-sîm to chhiong am-pû-sṳ̀ tông-yâu ke sài-lòng, lièn yit kî kut-thèu me-mò liù-to thiên-kông.
[4] Kì ke-têu siên-tî mò fu chit-ngim, yu kúi-cha; kì ke-têu chi-sṳ̂ tá-lá-sap sṳn-vu̍t, khiuk-kié Song-ti ke fap-li̍t.
[5] Chúng-he Song-chú hàn-he chhai liá sàng-tú; Kì hàng kûng-ngi, chhie̍t-tui m̀-voi cho put-ngi ke sṳ. Tak chêu-sṳ̀n, Kì hiong Kì ke chṳ́-mìn hién-mìn kûng-ngi, chhiùng-lòi m̀-sṳt thìn-chṳ́; chúng-he put-ngi ke ngìn-mìn ki-siu̍k fam-chhui, m̀-tî kien-seu.
[6] Song-chú kóng: “Ngài sêu-me̍t lie̍t-koet, chhio-tha̍p kì-têu ke sàng-sṳ, chiông kì-têu ke sàng-lèu pien-cho sa̍k-tôi, lu-hong mò-ngìn sông-hâ. Ngài sṳ́ kì-têu ke sàng-sṳ fông-liòng, kiê-lu khûng-khûng, mò liù pan-sà.
[7] Ngài láu-tó ke-sṳ̀ Ngài ke chṳ́-mìn yit-thin voi chûn-kin Ngài, chiap-su kón-kau, yún-yén ki-tet Ngài pûn kì-têu ke kau-hiun! Chúng-he ko mò kí-kiú, kì-têu yu hàn-kha li-hoi cho fái-sṳ lé!”
[8] Song-chú kóng: “Ngì-têu thin-chho̍k oi tén, tén Ngài hong-hí-lòi ko lie̍t-koet ke-ngit. Ngài yí-kîn kiet-thin seu-si̍p lie̍t-koet van-pâng chhièn-lòi, chiông Ngài ke thai fat-khién chhiòn-phu tó chhai kì-têu sṳ̂n-song. Ngài ngie̍t-chhìn ke fó oi sêu-me̍t chhiòn sṳ-kie.
[9] “Ke-sṳ̀, Ngài oi kói-pien van-mìn, pûn kì-têu chhiòn-phu yung chhiang-li ke fa lòi khì-khiù Ngài, thùng-sîm ha̍p-yi sṳ-fung Ngài.
[10] Ngài só fûn-san ke chṳ́-mìn, lièn chhai yén-yén ke Kú-sṳ̍t hò-pa ke-vi ke, ya oi to-chón-lòi hiong Ngài hien-chi.
[11] To ke-sṳ̀, Ngài ke chṳ́-mìn â, ngì-têu m̀-sṳ́ yîn-vi phoi-ngia̍k Ngài ke sṳ kám-kok to kien-seu; yîn-vi Ngài oi tui ngì-têu chûng-kiên chhù-thet só-yû kiêu-ngau ke ngìn. Chhai Ngài ke sṳn-sân, ngì-têu m̀-voi chai chhṳ-kô chhṳ-thai.
[12] Ngài oi chhai ngì-têu tông-chûng liù-hâ khiâm-pî, khun-khú ke ngìn; kì-têu voi to Ngài mien-chhièn lòi khiù Ngài pó-fu.
[13] Só-chhûn ke ke-têu Yî-set-lie̍t-ngìn, m̀-voi chai cho fái-sṳ, m̀-voi kóng fâ-liâu, me mò kúi-cha. Kì-têu voi ôn-kî lo̍k-ngia̍p, m̀-voi chai kiâng má-ngìn.”
[14] Siak-ôn ke chṳ́-mìn â, yin-tông chhong-kô! Yî-set-lie̍t-ngìn â, yin-tông thai-sâng hêm! Yâ-lu-sat-lâng ke pak-siang â, yin-tông mân-sîm fôn-hí khoai-lo̍k.
[15] Song-chú yí-kîn kié-chhù ngì ke chit-fa̍t, yí-kîn kiuk-chéu ngì só-yû ke sù-thi̍t. Song-chú — Yî-set-lie̍t ke Vòng lâu ngì khiung-ha, ngì m̀-sṳ́ chai kiâng voi yû má-ke châi-fo.
[16] Chhai ke-ngit voi yû-ngìn tui Yâ-lu-sat-lâng kóng: Siak-ôn â, m̀-sṳ́ kiâng! M̀-sṳ́ kiâng-to sú-ngiôn kiok-lài!
[17] Song-chú — ngì ke Song-ti lâu ngì khiung-ha; Kì ke thai-nèn sṳ́ ngì tet-sṳn. Kì oi chhai ngì tông-chûng fôn-hí khoai-lo̍k; Kì ke thung-siak oi su ngì sîn ke sâng-miang. Kì oi yîn ngì fôn-hí chhong-kô,
[18] chhiong ngìn chhai ko-chiet ke sṳ̀ án fôn-hí. Song-chú kóng: Ngài yí-kîn thìn-thet châi-fo ke vî-hia̍p, chhù-thet ngì ke kien-seu.
[19] Sṳ̀-chiet to lé! Ngài oi chit-fa̍t yit-chhiet khî-fu ngì ke ngìn; Ngài oi chṳ́n-kiu ngiôn-ngio̍k, sṳt-san ke ngìn, sṳ́ liù-mòng ke ngìn to-chón chhṳ-kâ ke kâ-yèn. Ngài oi sṳ́ kì-têu ke kien-seu pien-cho yùng-yeu; kì-têu chhai chhiòn sṳ-kie voi yû hó miàng-sâng.
[20] Sṳ̀-chiet to lé! Ngài oi chiông ngì-têu si-san ke chṳ́-mìn thu chón-lòi; Ngài oi chhai ngì-têu ngién-chhièn fî-fu̍k ngì-têu ke sán-ngia̍p, sṳ́ ngì-têu ke miàng-sâng chhòn-to thiên-ha van-mìn. Song-chú án-ngiòng siên-pu lé.