[1] Yû yit-ke ngìn miàng ôn-to Pô-â-sṳ̂, yû-chhièn yu yû thi-vi, he Nâ-ngò-mî ló-kûng Yî-li-mí-le̍t ke chhîn-chhu̍k.
[2] Yû yit-ngit, Mô-ap se-moi-é Lu-tet tui Nâ-ngò-mî kóng: “Pûn ngài to thièn-tú hi; na yû ngìn hén hó khoán-thai ngài, ngài chhiu chhai kiâ heu-poi ngiâm kì tiet-thet ke ma̍k-chhon.” Nâ-ngò-mî kóng: “Ngài ke moi-é â, cho ngì hi!”
[3] Só-yî Lu-tet chhiu to thièn-tú hi, thèn chhai sû-kot kûng-ngìn heu-poi ngiâm tiet-hâ-lòi ke ma̍k-chhon. Tú-tú-hó, kì chhiu to Yî-li-mí-le̍t chhîn-chhu̍k Pô-â-sṳ̂ ke-te thièn-tú.
[4] Mò kí-kiú, Pô-â-sṳ̂ tui Pak-li-hèn lòi; kì hiong sû-kot kûng-ngìn mun-ôn kóng: “Song-chú lâu ngì-têu khiung-ha!” Kì-têu en-kóng: “Song-chú su-fuk pûn ngì!”
[5] Pô-â-sṳ̂ mun kûng-thèu: “Ke he nai-kâ ngìn ke se-moi-é?”
[6] Kûng-thèu en kóng: “Kì chhiu-he ke Mô-ap se-moi-é, he thèn Nâ-ngò-mî tui Mô-ap chón-lòi ke.
[7] Kì yêu-khiù ngài pûn kì thèn chhai kûng-ngìn heu-poi ngiâm tiet-thet ke ma̍k-chhon. Kì tá-chó chhiu khôi-sṳ́ ngiâm, liá-ha chang thìn-hâ-lòi, chhai liòng-phùng-hâ hiet-khun.”
[8] Pô-â-sṳ̂ chhiu hi tui Lu-tet kóng: “Se-moi-é, thâng ngài kóng. Ngì m̀-sṳ́ to phe̍t-ngìn ke thièn-tú hi ngiâm ma̍k-chhon, liù chhai liá-vi lâu ngài liá-têu sṳ́-ńg khiung-ha chhiu hó.
[9] Khon nàm-kûng to nai-te thièn sû-kot, ngì chhiu thèn sṳ́-ńg hi ngiâm. Ngài yí-kîn fûn-fu nàm-kûng cho-m̀-tet khî-fu ngì. Ngì choi-châu, chhiu to súi-kon ke-vi lîm nàm-kûng tá-lòi ke súi.”
[10] Lu-tet chhiu phu̍k chhai thi-song khúi Pô-â-sṳ̂, kóng: “Ngì cho-má-ke khoán-thai ngài án-hó? Ngióng voi án koân-sîm ngài liá-ke ngoi-koet ngìn?”
[11] Pô-â-sṳ̂ en-kóng: “Ngiâ ló-kûng sí-heu, ngì tui kâ-ngiòng án yû-hau, ngióng-pân lì-khôi yà-ôi lâu chhṳ-kâ ke ku-hiông, lòi he̍t chhai liá sâng-fun ke mìn-chhu̍k tông-chûng, liá-têu sṳ-chhìn ngài chhiòn-phu thâng-tó lé.
[12] Ngien Song-chú cheu ngì só cho ke po-tap ngì. Ngien Yî-set-lie̍t ke Song-ti, ngì só yí-kho ke Song-chú thai-thai sóng-su ngì.”
[13] Lu-tet kóng: “Sîn-sâng, ngì tui ngài án-hó! Sûi-yèn ngài lièn cho ngì ke sṳ́-ńg ya khâm-m̀-tet, ngì hàn yung chhîn-chhiet ke fa lòi ôn-ví ngài.”
[14] To sṳ̍t-fan ke sṳ̀, Pô-â-sṳ̂ tui Lu-tet kóng: “Ko-lòi liá-vi, sṳ̍t ma̍k-piáng, vun sôn-chhṳ lòi sṳ̍t.” Lu-tet chhiu lâu ke-têu kûng-ngìn khiung-ha chhô. Pô-â-sṳ̂ nâ-têu phoi-hó ke ma̍k-chhon chhòn-pûn kì, kì sṳ̍t-to páu, hàn yû-chhûn.
[15] Kì hí-sṳ̂n yu hi ngiâm ma̍k-chhon ke sṳ̀, Pô-â-sṳ̂ fûn-fu kì ke kûng-ngìn kóng: “Kì chhiu-he tui tôi-tén ke ma̍k-tôi tú hi ngiâm, ngì-têu ya cho-m̀-tet vú-yu̍k kì,
[16] sṳm-chṳ oi tui khún-hó ke ma̍k-khún chûng chhû-têu chhut-lòi, liù pûn kì ngiâm, ya m̀-hó chit-phi kì.”
[17] Lu-tet chhiu án-ngiòng chhai thièn-tú ngiâm ma̍k-chhon, chhṳ̍t-to lìm-am-é. Kì chiông ngiâm-lòi ke ma̍k-chhon tá-hó, chhâ-m̀-tô yû yit-lò.
[18] Kì chiông tá-hó ke ma̍k-é tai-chón sàng-tú pûn kâ-ngiòng khon, yu chiông kì sṳ̍t-chhûn ke sṳ̍t-vu̍t nâ-pûn kì.
[19] Kâ-ngiòng mun kì: “Ngì kîm-pû-ngit tui nai-vi ngiâm-lòi án-tô ma̍k-chhon? Ngì chhai má-ngìn ke thièn-tú cho-se? Ngien Song-ti su-fuk pûn ke cheu-ku ngì ke ngìn!” Lu-tet chhiu lâu kâ-ngiòng kóng: “Ngài kîm-pû-ngit chhai yit-ke miàng ôn-to Pô-â-sṳ̂ ke thièn-tú cho-se.”
[20] Nâ-ngò-mî tui sîm-khiû kóng: “Ngien yit-chhṳ̍t hó khoán-thai sâng-ngìn lâu sí-ngìn ke Song-chú su-fuk pûn Pô-â-sṳ̂!” Nâ-ngò-mî yu kié-sṳt kóng: “Ke-sà he ên-têu ke chṳ-chhîn, yû ngi-vu cheu-ku ên-têu.”
[21] Mô-ap se-moi-é Lu-tet kóng: “Kì hàn lâu ngài kóng, oi ngài thèn chhai kiâ kûng-ngìn ke heu-poi ngiâm ma̍k-chhon, chhṳ̍t-to cho-vàn kûng.”
[22] Nâ-ngò-mî tui sîm-khiû Lu-tet kóng: “Ngài ke moi-é â, ngì chui-hó lâu kì ke sṳ́-ńg khiung-ha hi cho-se; na-he ngì to phe̍t-ngìn ke thièn-tú hi, kiâng-pha voi pûn-ngìn khî-fu.”
[23] Só-yî Lu-tet thèn Pô-â-sṳ̂ ke-têu sṳ́-ńg hi ngiâm ma̍k-chhon, chhṳ̍t-to thai-ma̍k, séu-ma̍k chhiòn-phu sû-kot kiet-suk. Lu-tet hàn-he lâu kâ-ngiòng khiung-ha he̍t.