[1] Só-yî, ki-yèn ngì-têu chhai Kî-tuk tî-poi ke sâng-miang sṳ́ ngì-têu kha kiên-khiòng, kì ke thung-siak kú-li ngì-têu, ngì-têu lâu Sṳn-Lìn yû kâu-thûng, ngì-têu ya yû chhṳ̀-pî lâu lìn-mén ke sîm,
[2] ngì-têu chhiu oi yû khiung-thùng ke sîm-chṳ, khiung-yong ke oi-sîm, siông-thùng ke chhìn-kám, lâu yit-chṳ ke sióng-fap, hó pûn ngài chhûng-mân fôn-hí.
[3] M̀-hó chhṳ-sṳ̂ chhṳ-li ya-he chhṳ-kô chhṳ-thai, fán-chón oi pí-chhṳ́ khiâm-pî, khon phe̍t-ngìn pí chhṳ-kâ kha kô-mìn.
[4] M̀-hó tân-chhiang ku chhṳ-kâ, ya oi koân-sîm phe̍t-ngìn ke sṳ.
[5] Ngì-têu oi yung Kî-tuk Yâ-sû ke sîm cho ho̍k-si̍p ke mù-fam:
[6] Kì pún-lòi chhiu yû Song-ti ke pún-chṳt, chúng-he m̀-sṳt lam-yung kì thùng Song-ti khiung-yong ke thi̍t-khièn.
[7] Tiên-to, kì chhṳ-ngien piong-thet yit-chhiet, chhí nù-phu̍k ke pún-chṳt. Kì sàng-cho ngìn, yung ngìn ke hìn-thí chhut-hien.
[8] Kì chhṳ-kâ kâm-ngien pî-mì, sun-fu̍k to sí, yu sí chhai sṳ̍p-sṳ-ka-táng.
[9] Só-yî, Song-ti sṳ́ kì kô-sṳ̂n to chṳ-kô, su-pûn kì ke chhêu-ko van-miàng ke miàng;
[10] sṳ́ thiên-táng, thi-song lâu thi-tái-hâ ke chung-sên, yit thâng-tó Yâ-sû ke miàng, chhiòn-phu chhiu khúi lo̍k-hi,
[11] chung khiéu ko-pha̍k kóng: “Yâ-sû Kî-tuk he Chú!” kûi yùng-kông pûn Â-pâ Song-ti.
[12] Só-yî, chhîn-oi ke phèn-yû, ngài thùng ngì-têu khiung-ha ke sṳ̀, ngì-têu sòng-sòng thâng-chhiùng ngài; liá-ha ngài mò chhai ngì-têu ke-vi, ngì-têu hàn-kha oi thâng ngài ke fa. Ngì-têu oi kiâng-kiâng lu̍k-lu̍k, yit-chhṳ̍t tá-piang lòi vàn-sṳ̀n ngì-têu chhṳ-kâ ke tet-kiu;
[13] yîn-vi he Song-ti sòng-sòng chhai ngì-têu sîm-kôn-tú yun-hàng, sṳ́ ngì-têu yu kâm-ngien yu nèn sṳ̍t-hàng Kì mî-san ke chṳ́-yi.
[14] Ngì-têu mò-lun cho má-ke, m̀-hó mài-yen ya-he chên-lun,
[15] hó pûn ngì-têu sàng-cho sùn-kiet sṳ̀n-sṳ̍t ke ngìn, chhai liá fú-phai, chhui-ok ke sṳ-thoi chûng, cho Song-ti mò khiet-tiám ke chṳ́-ńg. Ngì-têu oi chhai sṳ-kiên-ngìn tông-chûng fat-kông, chhiong sên-é cheu-kông thiên-táng,
[16] chiông sâng-miang ke tho chhòn-pûn kì-têu. Ngì-têu na-he án-ngiòng cho, chhai Kî-tuk chai-lòi ke-ngit, ngài chhiu yû hó khoâ-khiéu lé, yîn-vi liá voi chṳn-mìn ngài mò chéu ngong-lu, mò cho ngong-se.
[17] Khó-nèn ngài oi yung chhṳ-kâ ke hiet cho chi-chiú, lòi lìm chhai ngì-têu yung sin-sîm hien-pûn Song-ti ke chi-vu̍t-táng. Na-he án-ngiòng, ngài ya chhin fôn-hí, thùng-sṳ̀, ngài oi thùng ngì-têu thai-kâ fûn-hióng ngài ke fôn-hí.
[18] Khiung-yong, ngì-têu ya oi fôn-fôn hí-hí, pûn ngài ya fûn-hióng ngì-têu ke fôn-hí.
[19] Ngài kho Chú Yâ-sû, hî-mong mò kí-kiú heu, ngài cho-tet phai Thì-mô-thai hi ngì-têu ke-vi, chiông ngì-têu ke sêu-sit tai-chón-lòi pûn ngài, pûn ngài tet-tó ôn-ví.
[20] Kì he vì-yit lâu ngài thùng-sîm, yu chṳn-kîn koân-sîm ngì-têu ke ngìn.
[21] Phe̍t-ngìn lûng-chúng vi chhṳ-kâ ke sṳ tá-son, mò koân-sîm Yâ-sû Kî-tuk ke sṳ-chhìn.
[22] Chúng-he ngì-têu chhîn-chhú tî Thì-mô-thai ke cho-ngìn: Kì thùng ngài chhiu-chhiong lai-é lâu â-pâ, vi-tó fuk-yîm, khiung-ha sîn-khú kûng-chok.
[23] Tén ngài yit tî chhṳ-kâ ke kiet-khiu̍k voi ngióng-pân ke sṳ̀, ngài hî-mong phai-hi khon ngì-têu ke chhiu-he kì.
[24] Ngài kho Chú chhṳ-sin chhai tón sṳ̀-kiên-nui ya voi chhîn-sṳ̂n hi khon ngì-têu.
[25] Ngài sióng, ngài yin-kôi sung ngài-têu ke hiûng-thi Yî-pâ-fut-thì chón ngì-têu ke-vi hi. Ngì-têu sién-phai kì lòi thùng ngài then-sú, khiung-ha kûng-chok, khiung-ha chok-chan.
[26] Kì tông sióng-ngiam ngì-têu thai-kâ; sîm-kôn ya chhin m̀-ko-yi, yîn-vi tî ngì-têu thâng-tó kì pot-phiang lé.
[27] Kì yû-yáng sṳt pot-phiang, hiám-hiám sí-thet. Chúng-he Song-ti lìn-mén kì, m̀ tân-chhiang lìn-mén kì, ya he lìn-mén ngài, pûn ngài m̀-sṳ́ tù-tó kien-tô ke yù-sông.
[28] Só-yî, ngài hàn-kha sióng-oi kón-kín sung kì chón-hi, pûn ngì-têu fôn-fôn hí-hí thùng kì chhi-si̍p; án-ngiòng, ngài ke yù-sông ya voi kám-séu.
[29] Ngì-têu oi chhai Chú ke tî-poi fôn-fôn hí-hí chiap-thai kì. Ngì-têu oi chûn-chhung chhiong kì án-ngiòng ke ngìn;
[30] yîn-vi kì vi-tó Kî-tuk ke kûng-chok mo sâng-miang ke ngùi-hiám, hiám-hiám sí-thet, vi-tó oi pú-chiuk ngì-têu mò fap-thu fu̍k-sṳ ngài ke só-chhai.