[1] Ngài he Pó-lò; ngài vi-tó Kî-tuk Yâ-sû ke yèn-ku sàng-cho siù-fam. Ngài lâu Thì-mô-thai hiûng-thi siá sin-é pûn ngì — ngài-têu só chhîn-oi ke thùng-kûng Fî-li-mùn,
[2] lâu chhai ngiâ vuk-hâ chhi-fi ke kau-fi, pin Â-fî-â chí-moi, hàn-yû thùng ngài-têu khiung-ha vi Chú cho-pîn ke Â-kî-pu.
[3] Ngien ngài-têu ke Â-pâ Song-ti lâu Chú Yâ-sû Kî-tuk su ên-tién, phìn-ôn pûn ngì-têu!
[4] Chhîn-oi ke Fî-li-mùn â, ngài tak-pái khì-tó ke sṳ̀ chhiu thì-tó ngì, sòng-sòng vi ngì kám-chhia ngài ke Song-ti;
[5] yîn-vi ngài thâng-kóng ngì tui chung sṳn-thù chhin yû oi-sîm, tui Chú Yâ-sû chhin yû sin-sîm.
[6] Ngài khiù Song-ti thûng-ko ngì tui sin-ngióng só péu-hien ke thòn-khe, pûn ngài-têu chhṳ̂m tî thùng Kî-tuk kiet-lièn ke yit-chhiet hó-chhu.
[7] Chhîn-oi ke hiûng-thi â, ngì ke oi-sîm pûn ngài khi̍t-thai ke fôn-hí lâu ôn-ví; yîn-vi chung sṳn-thù ke sîm yí-kîn tui ngì tet-tó sóng-khoai.
[8] Ki-yèn ngài he ngì chhai Kî-tuk tî-poi ke hiûng-thi, ngài pún-lòi cho-tet thai-tám fûn-fu ngì hàng yin-kôi hàng ke sṳ;
[9] chúng-he, ngài kâm-ngien yung oi-sîm lòi khiù ngì. Sûi-yèn ngài — Pó-lò he Kî-tuk Yâ-sû ke thai-sṳ́, liá-ha yu yîn-vi kì ke yèn-ku sàng-cho siù-fam, ngài hàn-he kâm-ngien án-ngiòng hàng.
[10] Ngài tui ngì ke chhiáng-khiù he vi-tó Â-nì-sî-mèu. Kì he ngài chhai Kî-tuk tî-poi ke lai-é; ngài chhai kâm-ngiu̍k tú ke sṳ̀ sàng-cho kì lìn-sin ke â-pâ.
[11] Thèu-pái kì tui ngì mò má-ke yung, liá-ha kì mò-lun tui ngì, tui ngài, lûng-chúng chhin yû-yung.
[12] Ngài liá-ha sung kì to-chón ngì ke-vi hi, chhiong he sung ngài ke sîm-kôn hi yit-yong.
[13] Ngài pún-lòi sióng-oi liù kì chhai ngài sṳ̂n-piên, ham kì chhai ngài vi fuk-yîm chhô-kâm ke sṳ̀-chiet thoi ngì fu̍k-sṳ ngài;
[14] chúng-he, mò ngì ke thùng-yi, ngài mo̍k án-ngiòng cho kha-hó, pûn ngì só-cho ke hó-sṳ m̀-he miên-kióng, he kâm-sîm lo̍k-yi ke.
[15] Â-nì-sî-mèu chhiam-sṳ̀ lì-khôi ngì, fe̍t-chá he oi pûn ngì yún-yén tet-tó kì.
[16] Liá-ha, kì mò chai he yit-ke nù-li, yí-kîn chhêu-ko nù-li ke sṳ̂n-fun, he chhai Kî-tuk tî-poi chhîn-oi ke hiûng-thi. Tui ngài lòi kóng, kì khok-sṳ̍t he án-ngiòng, tui ngì hàn-kha he! Yîn-vi kì he ngì ke phu̍k-ngìn, yu he Chú-nui ke hiûng-thi!
[17] Só-yî, ngì na-he khon ngài cho chhîn-me̍t ke phèn-yû, chhiáng ngì chiap-na̍p kì chón-hi, chhiong he chiap-na̍p ngài.
[18] Na-he kì sṳt cho tui-m̀-hí ngì ke sṳ, ya-he khûi-khiam ngì má-ke, chhiòn-phu son ngài ke ngiak.
[19] Ngài chhai liá-vi chhîn-pit siá hâ-lòi: Ngài — Pó-lò fu-chit vàn. Ngài mò kóng, ngì me tî, ngì khiam ngài ke he ngì ke sâng-miang!
[20] Só-yî, hiûng-thi â, vi-tó Chú ke yèn-ku, khiù ngì pûn ngài liá-ke ngìn-chhìn! Ngài chhai Kî-tuk tî-poi ke hiûng-thi â, khiù ngì pûn ngài ke sîm tet-tó sóng-khoai!
[21] Ngài siá liá-fûng sin-é pûn ngì, yîn-vi ngài chhṳ̂m-sin ngì voi thâng-chhiùng ngài. Khì-sṳ̍t, ngài tî ngì só-hàng ke voi chhêu-ko ngài só yêu-khiù ke.
[22] Thùng-sṳ̀, chhiáng thoi ngài chún-phi yit-chak kiên-fòng; ngài hî-mong Song-ti voi thâng ngì-têu ke khì-tó, pûn ngài chón-to ngì-têu ke-vi hi.
[23] Vi-tó Kî-tuk Yâ-sû thùng ngài khiung-ha chhô-kâm ke Yî-pâ-fut tui ngì chhiáng-ôn.
[24] Ngài ke thùng-kûng Mâ-khó, Â-lî-tha̍t-kú, Tí-mâ, lâu Lu-kâ ya tui ngì chhiáng-ôn.
[25] Ngien Chú Yâ-sû Kî-tuk ke ên-tién sòng chhai ngì-têu ke sîm-chûng!