[1] Yâ-sû yu tui kì-têu kóng: “Ngài sṳ̍t-chhai lâu ngì-têu kóng, khî chhai liá-vi ke ngìn, yû-têu chhai sí yî-chhièn voi khon-tó Song-ti ke chú-khièn thai-yû nèn-li̍t lòi sṳ̍t-hien.”
[2] Liuk-ngit yî-heu, Yâ-sû tai-tén Pí-tet, Ngâ-kok lâu Yok-hon, tiâm-tiâm-é sông yit-chho kô-sân. Chhai kì-têu mien-chhièn, Yâ-sû ke hìn-siong kói-pien:
[3] Kì ke sâm fat-kông, fî-sòng ke pha̍k, sṳ-kiên mò-ngìn nèn chiông pu-é pheu-to án pha̍k.
[4] Sâm-ke ho̍k-sâng fut-yèn khon-tó Yî-li-â lâu Mô-sî chhai ke-vi thùng Yâ-sû kóng-fa.
[5] Pí-tet tui Yâ-sû kóng: “Sîn-sâng, ngài-têu chhai liá-vi chhin hó! Ngài-têu lòi tap sâm-kiên liàu-è, yit-kiên pûn ngì, yit-kiên pûn Mô-sî, yit-kiên pûn Yî-li-â.”
[6] Yîn-vi sâm-ke ho̍k-sâng chhin kiâng, Pí-tet m̀-tî oi kóng má-ke chang hó.
[7] Liá-sṳ̀ yû yùn chhut-hien, châ-tén kì-têu. Fut-yèn yû sâng tui yùn-chûng chhòn chhut-lòi kóng: “Liá he Ngài só-siak ke Lai-é. Ngì-têu oi thâng-chhiùng kì!”
[8] Kì-têu kón-kín si-mien kín-chhìm, chúng-he mò khon-tó phe̍t-ngìn, chṳ́-yû Yâ-sû thùng kì-têu khiung-ha.
[9] Kì-têu hâ-sân ke sṳ̀, Yâ-sû fûn-fu kì-têu kóng: “Ngìn-chṳ́ màng tui sí fu̍k-fa̍t yî-chhièn, chhiên-van m̀-hó chiông só khon-tó ke sṳ lâu phe̍t-ngìn kóng.”
[10] Kì-têu chûn-sú Yâ-sû ke fa, chúng-he pí-chhṳ́ thó-lun kóng: “Tui sí fu̍k-fa̍t to-tái he má-ke yi-sṳ?”
[11] Kì-têu yu mun Yâ-sû kóng: “Kîn-ho̍k kau-sṳ̂ ngióng-voi kóng, Yî-li-â thin-chho̍k oi siên lòi nè?”
[12] Yâ-sû en-kóng: “Yû-yáng, Yî-li-â oi siên lòi sṳ́ van-sṳ fu̍k-ngièn; chúng-he Sṳn-kîn ngióng-pân yu kóng, Ngìn-chṳ́ pit-thin voi su chhin-tô khú pin pûn-ngìn hi-chhie̍t nè?
[13] Chúng-he ngài lâu ngì-têu kóng, Yî-li-â yí-kîn lòi lé; kì-têu ya sùi-sîm só-oi lòi tui-thai kì, chhiong Sṳn-kîn só kóng koân-he kì ke fa yit-yong.”
[14] Kì-têu to-chón-hi khì-thâ ho̍k-sâng ke-vi ke sṳ̀, khon-tó yit thai-khiùn ngìn vì-tén kì-têu. Yû-têu kîn-ho̍k kau-sṳ̂ chhai ke-vi thùng ho̍k-sâng phien-lun.
[15] Chung-ngìn yit khon-tó Yâ-sû, chhiòn-phu fî-sòng khì-koai, chhiu chéu-tén hi ngiàng-chiap kì.
[16] Yâ-sû mun ho̍k-sâng kóng: “Ngì-têu thùng kì-têu phien-lun má-ke?”
[17] Ngìn-khiùn chûng yû yit-ke ngìn en-kóng: “Sîn-sâng, ngài tai-tén ngài ke lai-é lòi chhìm ngì; yîn-vi kì pûn á-è-kúi fu-sṳ̂n, mò fap-thu kóng-fa.
[18] Tak-pái kúi kûng-kit kì ke sṳ̀, chhiu chiông kì phiâng-lo̍k thi-nài-hâ, sṳ́ kì choi kín pu̍t-phô, ngâu-hèn ngà-kau, kûi-sṳ̂n ngang-ngang. Ngài yêu-khiù ngiâ ho̍k-sâng kiuk liá-ke kúi chéu, chúng-he kì-têu mò phan-fap.”
[19] Yâ-sû tui kì-têu kóng: “Ngì-têu liá sṳ-thoi ke ngìn ngióng-pân án mò sin-sîm! Ngài hàn oi chhai ngì-têu liá-vi kí-kiú nè? Hàn oi ngiûn-nai ngì-têu kí-kiú nè? Chiông se-ngìn-è tai-lòi ngài liá-vi!”
[20] Kì-têu chhiu chiông se-ngìn-è tai-ko-lòi. Ke kúi yit khon-tó Yâ-sû, chhiu sṳ́ se-ngìn-è thai chhû-kîn, vang chhai thi-song kún-lòi kún-hi, choi kín pu̍t-phô.
[21] Yâ-sû mun kì ke â-pâ kóng: “Kì pot liá-ke phiang yû kí-kiú lé?” Kì en-kóng: “Chhiùng se chhiu yû lô.
[22] Kúi chhin-tô pái sióng-oi hoi-sí kì, chiông kì phiâng-to fó tî-poi, súng-lo̍k súi-chûng. Ngì na yû phan-fap, khiù ngì lìn-mén ngài-têu, pông-chhu ngài-têu!”
[23] Yâ-sû kóng: “He ô, ngì na yû phan-fap! Yû sin-sîm ke ngìn, má-ke sṳ-chhìn tû yû khó-nèn.”
[24] Se-ngìn-è ke â-pâ ngiàm-sṳ̀ thai-sâng kóng: “Ngài sin, chúng-he ngài ke sin-sîm m̀-la, khiù ngì pông-chhu ngài!”
[25] Yâ-sû khon-tó chung-ngìn vì-tén lòi, chhiu ngiàm-ngiàm chit-phi ke sià-lìn kóng: “Ngì liá lûng-á-kúi, ngài min-lin ngì tui liá se-ngìn-è sṳ̂n-song chhut-lòi, put-chún ngì chai ngi̍p-hi!”
[26] Ke kúi thai-hêm yit-sâng, sṳ́ se-ngìn-è thai chhû-kîn yit-chhṳn-é, chhiu chhut-lòi. Se-ngìn-è sa chhiong sí-thet yit-yong; thai-kâ kóng: “Kì sí-thet lô!”
[27] Chúng-he Yâ-sû khiên-tén kì ke sú, fù kì hong-hí-lòi, kì chhiu khî-hí-lòi.
[28] Yâ-sû yit ngi̍p-hi vuk-tú, ho̍k-sâng chhiu am-chûng mun kì kóng: “Ngài-têu ngióng-pân mò fap-thu chiông ke kúi kiuk chhut-hi nè?”
[29] Yâ-sû en-kóng: “Chṳ́-yû kho khì-tó chang kiuk tet-chéu liá-chúng ke kúi, yî-ngoi mò phe̍t ke phan-fap.”
[30] Kì-têu lì-khôi ke thi-fông, kîn-ko Kâ-li-li. Yâ-sû mò-oi pûn ngìn tî kì hi nai,
[31] yîn-vi kì chhai ke-vi kâu ho̍k-sâng. Kì kóng: “Ngìn-chṳ́ voi pûn-ngìn kâu chhai ngìn ke sú-chûng; kì-têu voi sat-hoi kì; sí-heu thi-sâm-ngit kì voi fu̍k-fa̍t.”
[32] Chúng-he kì-têu m̀-voi liáu-kié liá fa ke yi-sṳ, yu m̀-kám mun kì.
[33] Kì-têu lòi-to Kâ-pak-nùng, ngi̍p-hi vuk-tú heu, Yâ-sû mun kiâ ho̍k-sâng kóng: “Ngì-têu chhai lu-song chên-lun má-ke nò?”
[34] Kì-têu m̀-kám chhut-sâng, yîn-vi kì-têu kûi-lu châng mò-thìn: Má-ngìn chui ví-thai.
[35] Yâ-sû chhô-hâ-lòi, ham sṳ̍p-ngi-ke ho̍k-sâng to kì mien-chhièn lòi, tui kì-têu kóng: “Sióng-oi cho thèu ke, kì chhiu oi cho chui-se ke, cho chung-ngìn ke phu̍k-ngìn.”
[36] Yèn-heu kì ham yit-ke se-ngìn-è lòi-to kì-têu tông-chûng, nám-tén kì, tui kì-têu kóng:
[37] “Vi-tó ngài ke miàng chiap-thai yit-ke chhiong liá se-ngìn-è ke, chhiu-he chiap-thai ngài. Chiap-thai ngài ke, m̀-he tân-chhiang chiap-thai ngài, ya he chiap-thai ke chhâi ngài lòi ke.”
[38] Yok-hon tui Yâ-sû kóng: “Sîn-sâng, ngài-têu khon-tó yû-ngìn fung ngì ke miàng kiuk-kúi, ngài-têu chhiu kim-chṳ́ kì, yîn-vi kì m̀-he thèn ngài-têu ke.”
[39] Yâ-sû kóng: “M̀-hó kim-chṳ́ kì; yîn-vi mò ngìn voi fung ngài ke miàng hàng sṳ̀n-chiak, ngiàm-sṳ̀ yu fán-ko-lòi kóng fái-fa kûng-kit ngài.
[40] M̀-he fán-tui ngài-têu ke, chhiu-he chan-sṳ̀n ngài-têu ke.
[41] Ngài sṳ̍t-chhai lâu ngì-têu kóng, mò-lun má-ngìn, yîn-vi ngì-têu su̍k Kî-tuk, nâ yit-pî súi pûn ngì-têu lîm, kì yit-thin voi tet-tó chióng-sóng.”
[42] Yâ-sû kóng: “Mò-lun má-ngìn hoi sin-thù chûng ngim-hò yit-ke mì-se ke ngìn lì-khôi ngài, kì chui-hó pûn-ngìn yung thai mo-sa̍k thò-tén kiáng-kîn, fit-lo̍k hói-tú hi.
[43] Na-he ngì ke yit-kî sú hoi ngì fam-chhui, chám-thet kì! Séu yit-kî sú lòi tet-tó yún-yén ke sâng-miang, kha-yàng sûng-sú hó-hó lo̍k thi-ngiu̍k, lo̍k chhai yún-yén put-me̍t ke lie̍t-fó chûng.
[45] Na-he ngì ke yit-kî kiok hoi ngì fam-chhui, chám-thet kì! Séu yit-kî kiok lòi tet-tó yún-yén ke sâng-miang, kha-yàng sûng-kiok hó-hó sa fit-lo̍k thi-ngiu̍k.
[47] Na-he ngì ke yit-chak muk-chû hoi ngì fam-chhui, chiông kì yet-chhut-lòi! Séu yit-chak muk-chû ngi̍p Song-ti ke koet, kha-yàng sûng-muk hó-hó sa fit-lo̍k thi-ngiu̍k.
[48] Chhai ke-vi, chhùng-è m̀-voi sí, lie̍t-fó yún-yén put-me̍t.
[49] “Mî-yit-ke ngìn voi pûn fó sṳ-lien, chhiong pûn yàm lû yit-yong.
[50] Yàm he hó ke, chúng-he yàm na sṳt-thet hàm-mi, oi ngióng-pân sṳ́ kì chai hàm nè? Ngì-têu oi yû yàm ke chok-yung, yu oi pí-chhṳ́ fò-mu̍k.”