[1] Song-chú thi-ngi pái hiong Yok-nâ kóng-fa.
[2] Kì kóng: “Ngì hi Nì-nì-mì ke-chho thai-sàng, hiong ke-vi ke ngìn siên-pu Ngài fûn-fu ngì kóng ke fa.”
[3] Yok-nâ fu̍k-chhiùng Song-chú ke min-lin, chhiu hi Nì-nì-mì. Ke he yit-chho chhin-thai ke sàng, sî-yeu sâm-ngit ke sṳ̀-kiên chang lit tet-theu.
[4] Yok-nâ ngi̍p-sàng, hàng yit-ngit ke lu-chhàng, kì siên-pu kóng: “Chai-ko si-sṳ̍p ngit, Nì-nì-mì-sàng chhiu voi su fí-me̍t!”
[5] Nì-nì-mì-sàng ke ngìn sin Song-ti ke fa. Só-yî kì-têu kiet-thin oi kim-sṳ̍t; sàng-tú só-yû ke ngìn, mò-lun thai-se chhiòn-phu chok mà-sâm péu-sṳ fí-kói.
[6] Nì-nì-mì-vòng yit thâng-tó liá sêu-sit, chhiu lì-khôi pó-chho, thot-hâ vòng-phàu, chok mà-sâm, chhô chhai fó-fôi tông-chûng.
[7] Kì hiong Nì-nì-mì-ngìn fat-chhut thûng-ko, kóng: “Liá he vòng lâu kì ke thai-sṳ̀n kûng-pu ke min-lin: Ngìn, lâu thèu-sâng, ngiù-yòng, chhiòn-phu put-chún sṳ̍t, ya put-chún lîm.
[8] Ngìn lâu thèu-sâng chhiòn-phu oi chok mà-pu. Tak-sà yit-thin oi pet-chhiet hiong Song-ti khì-tó, ya oi lì-khôi fái hàng-vì, m̀-hó cho phau-li̍t ke sṳ.
[9] Khó-nèn Song-ti voi kói-pien Kì ke sîm-yi, mò ki-siu̍k fat-khién, ngài-têu chhiu m̀-voi me̍t-mòng!”
[10] Song-ti khon-tó kì-têu só-cho ke yit-chhiet, khon-tó kì-têu lì-khôi fái hàng-vì, Kì chhiu kói-pien sîm-yi, mò chiông Kì yî-chhièn siên-pu ke châi-nan kong-pûn kì-têu.