[1] Song-chú kóng: Chhai ke-ngit, Ngài oi sṳ́ Yù-thai lâu Yâ-lu-sat-lâng chhùng-sîn tet-tó fàn-yùng.
[2] Ngài oi seu-si̍p van-koet van-mìn hâ-to “Sṳ́m-phan Sân-lak”; Ngài oi yîn-vi kì-têu kâ-pûn Ngài chṳ́-mìn ke sông-hoi sṳ́m-phan kì-têu. Kì-têu sṳt chiông Yî-set-lie̍t-ngìn fûn-san to lie̍t-koet, fûn-kot Ngài ke thú-thi Yî-set-lie̍t.
[3] Kì-têu chhû-chhiâm kiet-thin, khon má-ngìn tet-tó chok-lòi ke ngìn. Kì-têu yung se-â-kô-é von kî-ńg, mai se-â-moi-é hi mâi-chiú lîm.
[4] “Thai-ngì, Sî-tun, lâu Fî-li-sṳ tak só-chhai ke ngìn â, ngì-têu sióng-oi hiong Ngài po-fu̍k he-mò? Na-he sióng, Ngài tông-kiak chhiu voi hiong ngì-têu po-fu̍k.
[5] Ngì-têu chhióng Ngài ke kîm-ngiùn, chhióng Ngài ke chhòi-pó, chiông kì-têu piong chhai ngì-têu ke sṳ̀n-meu tú.
[6] Ngì-têu chiông Yù-thai lâu Yâ-lu-sat-lâng ke ngìn-mìn mai-pûn Hî-lia̍p-ngìn, sṳ́ kì-têu yén-lì chhṳ-kâ ke kâ-hiông.
[7] Ngài ngiàm-sṳ̀ oi chiông kì-têu tui ngì-têu mai hi ke só-chhai tai chón-lòi. Ngài oi cheu ngì-têu khoán-thai kì-têu ke fông-fap tui-fu ngì-têu.
[8] Ngài oi chiông ngì-têu ke chṳ́-ńg mai pûn Yù-thai-ngìn; kì-têu voi chiông ngì-têu ke chṳ́-ńg chón-mai pûn yén-fông ke Sṳ-pâ-ngìn. Ngài he Song-chú; Ngài án-ngiòng siên-pu lé.”
[9] Ngì-têu oi chhai van-koet chûng siên-pu: Chún-phi siông-chhṳ̀! Seu-si̍p chan-sṳ! Si̍p-ha̍p só-yû ke kiûn-pîn chhièn-chin!
[10] Oi chiông lài-thèu tá-cho tô-kiam; chiông liàm-è tá-cho chhiông. Kha ngiôn-ngio̍k ke ngìn ya oi cho yúng-sṳ chhut-chhṳn.
[11] Si-vì ke lie̍t-koet â, kiak-kiak lòi! Si̍p-ha̍p chhai sân-lak chûng. Song-chú â, khiù Ngì phai Ngì ke kiûn-chhui kûng-tá kì-têu!
[12] Van-koet oi chún-phi hó, to “Sṳ́m-phan Sân-lak” lòi. Ngài — Song-chú oi chhô chhai ke-vi, sṳ́m-phan si-vì ke lie̍t-koet.
[13] Kì-têu chhui-thai ok-khi̍t; só-yî, oi chám-sí kì-têu, chhiong sû-kot ńg-kuk án-ngiòng. Oi tha̍p-mièn kì-têu, chhiong phù-thò chhai chiú-chhò pûn-ngìn tha̍p-mièn, chhṳ̍t-to chiú-chhò nêm chhut-lòi.
[14] Chhiên-chhiên van-van ke ngìn chhi-si̍p chhai “Sṳ́m-phan Sân-lak”; yîn-vi Song-chú sṳ́m-phan ke ngit-è chhiu oi chhai ke-vi lìm-to.
[15] Ngit-ngie̍t mò kông, sên-sṳ̀n vû-am.
[16] Song-chú tui Siak-ôn chhiong sṳ̂-é ho-ho-kún, tui Yâ-lu-sat-lâng chhiong lùi-kûng lung-lung-kún. Thiên lâu thi chhiòn-phu pi̍t-pi̍t-chhat, chúng-he Song-chú oi pó-fu Kì ke chṳ́-mìn, cho Yî-set-lie̍t-ngìn ke phit-nan-só.
[17] Song-chú kóng: Ke-sṳ̀ ngì-têu chhiu voi tî Ngài he Song-chú — ngì-têu ke Song-ti. Ngài he̍t chhai Ngài ke sṳn-sân Siak-ôn; Yâ-lu-sat-lâng voi sàng-cho sṳn-sàng, ngoi-chhu̍k-ngìn yún-yén m̀-voi chai cham-liâng kì.
[18] To ke-sṳ̀, thai-sân voi tit-chiú, se-sân liù-nen; Yù-thai ke hâi-súi voi liù mò-thìn. Yû chhièn-súi oi tui Song-chú ke sṳn-thien liù chhut-lòi, yim-to Sṳ̍p-thìn sân-lak.
[19] Âi-khi̍p voi sàng-cho fông-thi; Yî-tûng voi sàng-cho khóng-yâ. Yîn-vi kì-têu sṳt yung khiòng-phau tui-fu Yù-thai, liù mò-chhui ngìn ke hiet.
[20] Ngài oi vi su-hoi ke ngìn po-sù; Ngài chhie̍t-tui m̀-voi piong-ko ke-têu hiûng-fam. Chúng-he Yù-thai yún-yén voi yû-ngìn he̍t, Yâ-lu-sat-lâng voi thoi-thoi siông-chhòn. Ngài — Song-chú oi he̍t chhai Siak-ôn-sân.