[1] Só-yî, ngài liá yîn-vi sṳ-fung Chú sàng-cho siù-fam ke, khien-va ngì-têu: Hàng-sṳ vì-ngìn yin-tông oi ha̍p Song-ti fû-seu ngì-têu lòi tet-tó ke sṳ̂n-fun.
[2] Ngì-têu oi khiâm-pî, vûn-yù, ngiûn-nai, yung oi-sîm fu-siông khôn-yùng,
[3] yung fò-phìn pí-chhṳ́ kiet-lièn, chhin-li̍t pó-chhṳ̀ Sṳn-Lìn só-su ha̍p-yit ke sîm.
[4] Chṳ́-yû yit-ke sṳ̂n-thí, chṳ́-yû yit-vi Sṳn-Lìn; chhiong Song-ti fû-seu ngì-têu ke sṳ̀, ngì-têu chṳ́-yû yit-ke phan-mong.
[5] Chṳ́-yû yit-vi Chú, yit-ke sin-ngióng, yit-ke sé-lî.
[6] Chṳ́-yû yit-vi Song-ti, chhiu-he ngìn-lui ke Â-pâ; Kì chhêu-ye̍t van-yû, chhai van-yû chûng-kiên, ya chhai van-yû tî-poi.
[7] Ngài-têu tak-ke ngìn lûng-chúng cheu Kî-tuk só fûn-phi ke, liâng-su thi̍t-phe̍t ke ên-su.
[8] Chhiong Sṳn-kîn só kóng: Kì sṳ̂n-sông-hi to kô-kô ke só-chhai, tai-tén chhin-tô chok-lòi ke sù-thi̍t; Kì chiông kok-yong ke ên-su su-pûn ngìn.
[9] (“Kì sṳ̂n-sông-hi” liá-ki fa he má-ke yi-sṳ nè? Liá chhiu-he kóng: Kì sṳt siên kong hâ-lòi, to thi chui chhṳ̂m ke só-chhai.
[10] Ke “kong hâ-lòi” yu “sṳ̂n-sông-hi” to chû-thiên táng-kô ke he khiung yit-sà; kì án-ngiòng cho he oi chhûng-mân van-yû.)
[11] Kì ya he ke “chiông kok-yong ke ên-su su-pûn ngìn” ke; kì chṳ́-thin yû-têu ngìn cho sṳ́-thù, yû-têu ngìn cho siên-tî, yû-têu ngìn cho chhòn fuk-yîm ke, yû-têu ngìn cho mu̍k-sṳ̂ ya-he kau-sṳ̂;
[12] muk-tit he oi chông-phi chung sṳn-thù cho sṳ-fung ke kûng-chok, lòi kien-li̍p kau-fi, chhiu-he Kî-tuk ke sṳ̂n-thí,
[13] chhṳ̍t-to ngài-têu chung-ngìn tui Song-ti ke Lai-é yû khiung-yong ke sin-ngióng lâu ngin-sṳt, chóng-thai sṳ̀n-ngìn, mân-yû Kî-tuk sṳ̀n-su̍k ke yong-sṳt.
[14] Án-ngiòng, ngài-têu chang m̀-voi chai chhiong se-ngìn-è, ham-lo̍k ngìn só-sat khì-kháu ke kúi-kie, thèn-tén kok-yong ke ho̍k-sot chéu, chhiong pûn fûng-long phêu-lòi tá-hi.
[15] Tiên-to, ngài-têu oi yung oi-sîm kóng sṳ̍t-fa, chhai kok fông-mien yit-chhṳ̍t chóng-chin to chhiong Kî-tuk. Kì chhiu-he thèu;
[16] chhiòn-sṳ̂n lûng-chúng yí-kho kì, thûng-ko koân-chiet lâu kîn-kut lòi fu-siông phi-ha̍p, pí-chhṳ́ lièn-kiet. Án-ngiòng, tông kok kî-thí ke kûng-háu fat-fî ke sṳ̀, sṳ̂n-thí chhiu voi chhai siông-siak ke tông-chûng chhiam-chhiam chóng-thai, ye̍t lòi ye̍t yúng-khien.
[17] Ngài liá-ha fung Chú ke miàng khien ngì-têu: M̀-hó chai chhiong Ngoi-pâng-ngìn ko ke-chúng ke sên-fa̍t. Kì-têu só-sióng ke he mò li-yit ke sṳ,
[18] kì-têu ke sîm-kôn vû-am, kì-têu yí-kîn thùng Song-ti só-su ke sâng-miang kak-thôn lé; yîn-vi kì-têu mò thèu-nó yu ngang-hok.
[19] Kì-têu m̀-tî kien-seu, fong-chiúng chhìn-yu̍k, sùi-sîm só-oi hi hàng kok-chúng phai-tet ke sṳ-chhìn.
[20] Chúng-he, ngì-têu ho̍k-si̍p Kî-tuk chhiu m̀-he án-ngiòng!
[21] Ngì-têu na-he yû-yáng thâng-to kì ke sṳ, cho kì ke sin-thù, yu ho̍k-ko chhai Yâ-sû tî-poi chang yû ke chṳ̂n-lî,
[22] án-ngiòng, ngì-têu chhiu oi thot-thet ke sṳ́ ngì-têu sên-fa̍t chhai fú-phai chûng ke khiu-ngìn; khiu-ngìn he yîn-vi sṳ̂-yu̍k ke yú-fe̍t lòi fú-phai-thet ke.
[23] Ngì-têu ke sîm-sṳ̂ yi-ngiam oi von-sîn,
[24] oi chiông sîn-ngìn chok-hí-lòi; sîn-ngìn he cheu Song-ti ke hìn-siong chho ke, thûng-ko chṳ̂n-lî ke sên-fa̍t lòi péu-mìn chṳn-ngi lâu sṳn-kiet.
[25] Só-yî, ngì-têu m̀-hó chai kóng fâ-liâu! Tak-sà tui lìn-sa yin-tông kóng sṳ̍t-fa, yîn-vi ngài-têu lûng-chúng he Kî-tuk sṳ̂n-thí ke kî-thí.
[26] Ngì-têu na fat-khién, m̀-hó yîn-vi án-ngiòng lòi fam-chhui; ya m̀-hó at-to ngit-thèu lo̍k-sân;
[27] m̀-hó liù kî-fi pûn Mô-kúi lòi hoi ngì.
[28] Thèu-pái cho-chhe̍t ke, m̀-hó chai thêu-nâ; oi kho chhṳ-kâ ke sûng-sú ngin-chṳ̂n cho-se, chang voi yû nèn-li̍t pông-chhu khiùng-khú-ngìn.
[29] Kóng-fa m̀-hó sông ngìn, oi kóng tui ngìn yû pông-chhu, chho-chhiu ngìn ke fa, pûn thâng-tó ke ngìn tet-tó li-yit.
[30] M̀-hó pûn Song-ti ke Sṳn-Lìn yù-sèu; yîn-vi Sṳn-Lìn he ngì-têu su̍k Song-ti ke yin-ki, pó-chṳn Song-ti sṳt-fong ngì-têu ke ngit-è voi to.
[31] Ngì-têu oi chhù-thet yit-chhiet ke ok-thu̍k, yen-hen, lâu fun-nu. M̀-hó chai yên-kâ ya-he fí-pong; cho-m̀-tet chai yû má-ke yên-sù.
[32] Oi yung chhṳ̀-pî lâu lìn-mén ke sîm fu-siông hó khoán-thai, pí-chhṳ́ sa-miên, chhiong Song-ti thûng-ko Kî-tuk sa-miên ngì-têu yit-yong.