[1] M̀-hó chit-phi ló-ngìn-kâ; oi khien kì chhiong khien ngiâ pâ yit-yong. Tui-thai heu-sâng-ngìn oi chhiong tui hiûng-thi án-ngiòng;
[2] tui ngièn-chóng fu-ńg oi chhiong tui â-mê án-ngiòng; tui heu-sâng ke fu-ńg oi yung sùn-kiet ke sîm, chhiong tui chí-moi yit-yong.
[3] Oi chûn-chhung chṳn-kîn sú-koá ke fu-ńg.
[4] Koá-fu na-he yû chṳ́-ńg ya-he sûn-é sûn-ńg, kì ke heu-pi chhiu-oi siên ho̍k-si̍p ngióng-pân chhai vuk-hâ chhin hau-tho, lòi po-tap yà-ôi ya-he â-kûng â-phò, yîn-vi liá he Song-ti só fôn-hí ke.
[5] Chṳn-kîn sú-koá yu mò-ngìn hó yí-kho ke fu-ńg, só ngióng-mong ke chṳ́-yû Song-ti, ngit-ya khì-tó só-khiù ke chhiu-he Song-ti ke pông-chhu.
[6] Tân-tân chûi-khiù hióng-lo̍k ke koá-fu, sûi-yèn sâng-tén, khì-sṳ̍t he yí-kîn sí-thet.
[7] Liá-têu sṳ-chhìn, ngì yit-thin oi kâu, miên-tet kì-têu pûn-ngìn phî-phìn.
[8] Na-he yû-ngìn m̀ cheu-ku chhîn-chhit, thi̍t-phe̍t he chhṳ-kâ vuk-hâ ke ngìn, kì chhiu-he vì-phoi sin-ngióng, pí m̀-sin ke ngìn hàn-kha fái.
[9] Koá-fu tên-ki ke thiàu-khien he án-ngiòng: Kì-têu oi yû liuk-sṳ̍p se yî-song; chṳ́-yû kiet-fûn yit-pái;
[10] hàn oi yû hó miàng-sâng, chhiu-chhiong: Chhin voi yông-yuk chṳ́-ńg, chiap-thai lî-hak, sé sṳn-thù ke kiok, kiu-chi kip-nan, chhin-li̍t hàng kok-yong san-sṳ.
[11] Chúng-he, heu-sâng ke koá-fu m̀-hó tên-ki; yîn-vi kì-têu chhìn-yu̍k fat-thung, lì-khôi Kî-tuk ke sṳ̀, chhiu sióng-oi chai ka-ngìn,
[12] vì-phoi tông-chhû só-hí ke ngien, yîn-vi án-ngiòng su thin-chhui.
[13] Thùng-sṳ̀, kì-têu hàn ho̍k-tó lân-sṳ̂, hau ko kâ; hàn-kha chhám ke he, m̀ tân-chhiang lân-sṳ̂, yu hau kóng-chhòng kóng-tón, chhap phe̍t-ngìn ke hàn-sṳ, kóng mò yin-kôi kóng ke fa.
[14] Só-yî, ngài hî-mong heu-sâng ke koá-fu chai ka-ngìn, sên-yông chṳ́-ńg, cheu-ku kâ-thìn, mo̍k pûn tui-thi̍t yû kûng-kit ke pá-piang.
[15] Yîn-vi, yí-kîn yû-têu koá-fu kói-pien sîm-yi, hi thèn Sat-tan lé.
[16] Sin Chú ke fu-ńg na-he vuk-hâ yû koá-fu, kì chhiu oi cheu-ku kì-têu, m̀-hó chiông tâm-é thôi pûn kau-fi; án-ngiòng, kau-fi chang voi yû nèn-li̍t cheu-ku ke-têu mò-ngìn hó yí-kho ke koá-fu.
[17] Chhin voi chhṳ-lî kau-fi ke chóng-ló, thi̍t-phe̍t he ngin-chṳ̂n kóng-tho lâu kau-thô ke, yin-kôi oi tet-tó kâ-phi ke kin-fung.
[18] Yîn-vi Sṳn-kîn kóng: “Ngiù tha̍p kuk ke sṳ̀, m̀-hó lûng-tén kì ke choi”; yu kóng: “Kûng-ngìn tet kûng-chhièn he ha̍p-lî ke.”
[19] Na-he yû-ngìn ko chóng-ló, chhù-fî yû lióng-ke ya-he sâm-ke chṳn-ngìn, chhiu m̀-sṳ́ tap kì.
[20] Oi kûng-khôi chit-phi só-yû fam-chhui ke ngìn, lòi pûn khì-thâ ke ngìn tet-tó kín-kie.
[21] Ngài chhai Song-ti, Kî-tuk Yâ-sû, lâu su kién-sién ke thiên-sṳ́ ke mien-chhièn sṳ́m-chhung fûn-fu ngì, oi chûn-sú liá-têu kau-hiun, mò-lun má-ke sṳ-chhìn m̀-hó yû sṳ̀n-kien ya-he phiên-sîm.
[22] M̀-hó sùi-phien vi ngìn hàng on-sú-lî; m̀-hó lâu phe̍t-ngìn ke chhui-ko yû-fun; oi pó-sú chhṳ-kâ sùn-kiet.
[23] Yîn-vi ngì ke sṳ̂n-thí sòng-sòng yû phiang, m̀-hó tân-chhiang lîm súi, oi lîm yit-si̍t-é chiú lòi pông-chhu sêu-fa.
[24] Yû-têu ngìn ke chhui he fî-sòng mìn-hién ke, chhin kiak chhiu su thin-chhui; chúng-he, yû-têu ngìn ke chhui heu-lòi chang pûn-ngìn khon-chhut-lòi.
[25] Khiung-yong, hó ke hàng-vì ya he mìn-hién ke; chhiu-son m̀-he án mìn, ya mò fap-thu khong-hí-lòi.