[1] Khiung-yong, cho pû-ngiòng ke, ngì-têu ya yin-kôi sun-chhiùng chhṳ-kâ ke ló-kûng, pûn mò sin-chhiùng chṳ̂n-tho ke ló-kûng yîn-vi ngì-têu ke hó phín-hen lòi su kám-fa. Ngì-têu ke fa m̀-sṳ́ kóng án-tô,
[2] yîn-vi kì-têu voi khon-tó ngì-têu sùn-kiet lâu tôn-chông ke phín-hen.
[3] Ngì-têu m̀-hó kóng-kiu ngoi-chhai ke tá-pan, chhiong oi ngióng-pân piên thèu-nà-mô, tai kîm-lien, chok chiâng sâm tén.
[4] Yin-tông yû nui-chhai ke chiâng, yung m̀-voi thui-set ke vûn-yù lâu tiâm-chhin lòi tá-pan; cheu Song-ti khon, liá he chui yû ka-chhṳ̍t ke.
[5] Yîn-vi, thèu-pái ke-têu sṳn-kiet ke fu-ńg, kì-têu ngióng-mong Song-ti, lûng-chúng yung sun-chhiùng ló-kûng lòi tá-pan chhṳ-kâ.
[6] Sâ-lâ chhiu-he án-ngiòng; kì sun-chhiùng Â-pak-lâ-hón, chhṳ̂n kì cho “Thèu-kâ”. Ngì-têu na hàng-san, mò kiâng tûng kiâng sî, chhiu-he Sâ-lâ ke moi-é lé.
[7] Khiung-yong, cho ló-kûng ke, ngì-têu thùng pû-ngiòng khiung-ha sên-fa̍t, oi thí-thiap kì-têu he kha ngiôn-ngio̍k ke thùng-phân. Oi chûn-chhung kì-têu, yîn-vi kì-têu he thùng ngì-têu khiung-ha sṳ̀n-chiap Song-ti só su ke sîn sâng-miang. Án-ngiòng, ngì-têu ke khì-tó chhiu m̀-voi su chú-ngoi.
[8] Chúng-kóng, ngì-têu thai-kâ oi yû khiung-yong ke sîm-chṳ lâu sîm-chhìn, chhiong hiûng-thi chí-moi án-ngiòng siông-siak, yung chhṳ̀-oi lâu khiâm-pî fu-siông khoán-thai.
[9] M̀-hó yung fái po fái, yung yu̍k-ma vàn yu̍k-ma; tiên-to, oi chuk-fuk, yîn-vi Song-ti fû-seu ngì-têu ke muk-tit he oi pûn ngì-têu sṳ̀n-su chuk-fuk.
[10] Chhiong Sṳn-kîn só kóng: Má-ngìn sióng-oi hióng-su ngìn-sên, hî-mong ko ôn-lo̍k ke ngit-è, sa̍t-mà chhiu m̀-hó kóng fái-fa, choi-sùn ya m̀-hó kóng fâ-liâu.
[11] Oi hi-chhie̍t sià-ok, chhin-li̍t hàng-san; oi chûi-khiù fò-phìn, sat-mâng hi hàng.
[12] Yîn-vi Chú khon-ku ngi-ngìn, liù-sîm thâng kì-têu ke khì-tó; chúng-he ke-têu chok-ok ke ngìn, Chú chhiu tui kì-têu pien-mien.
[13] Ngì-têu na-he ngie̍t-sîm hàng-san, má-ngìn voi hoi ngì-têu nè?
[14] Ngì-têu chhiu-he vi ngi su-khú, ya he chhin yû fuk-hi â! M̀-sṳ́ kiâng ngìn ke vî-hia̍p, ya m̀-sṳ́ yù-sèu.
[15] Ngì-têu ke sîm oi kin-vi Kî-tuk, chûn kì cho Chú. Oi sòng-sòng chún-phi hó-se, lòi fì-tap phe̍t-ngìn ke mun-thì, chhiu-he koân-he ngì-têu sîm-chûng ke phan-mong;
[16] chúng-he oi yung vûn-yù lâu kiún-sṳ́m ke thai-thu lòi fì-tap. Oi yû chhîn-pha̍k ke liòng-sîm; án-ngiòng, chhai ngì-têu su vú-yu̍k ke sṳ̀-chiet, ke-têu fí-pong ngì-têu ke ngìn, voi yîn-vi ngì-têu cho Kî-tuk-thù só péu-hien ke hó hàng-vì, chhṳ-kâ kám-kok kien-seu.
[17] Song-ti ke yi-sṳ, na-he oi ngì-têu yîn-vi hàng-san lòi su-khú, kha-yàng yîn-vi chok-ok lòi su-khú.
[18] Yîn-vi Kî-tuk sṳt vi chhui lòi sí, yit-pái chhiu vàn-sṳ̀n, he ngi ke thoi put-ngi ke, oi tai ngì-têu to Song-ti ke mien-chhièn hi. Kì ke ngiuk-thí pûn-ngìn chhú sí-hìn, chúng-he kì ke lìn hàn-he sâng-sâng.
[19] Kì thûng-ko liá-ke lìn sṳt hi tui kâm-ngiu̍k tú ke-têu lìn chhòn-tho.
[20] Ke-têu lìn he ngang-kiáng ke lìn, chhiu-he chhai Nò-â chho thai-sòn ke sṳ̀, Song-ti ngiûn-nai tén-thai ke lìn. Tông-sṳ̀, ngi̍p thai-sòn thûng-ko súi tet-tó chṳ́n-kiu ke ngìn m̀ tô, chṳ́-yû pat-sà.
[21] Liá-ke súi só yi-péu ke sé-lî, liá-ha yí-kîn kiu-tó ngì-têu. Sé-lî m̀-he sé-chhiang ngì-têu sṳ̂n-thí ke lá-sap, he péu-sṳ ngì-têu yung chhiang-li ke liòng-sîm tui Song-ti hí-ngien; liá sé-lî thûng-ko Yâ-sû Kî-tuk ke fu̍k-fa̍t chṳ́n-kiu ngì-têu.
[22] Yâ-sû Kî-tuk yí-kîn sông thiên-táng hi, liá-ha chhô chhai Song-ti ke yu-phién; só-yû ke thiên-sṳ́ pin thiên-kie ke chóng-khièn-chá lâu thúng-chhṳ-chá lûng-chúng fu̍k-chhiùng kì.