[1] Pɔli ni Silasi bɔra ka tɛmɛ Anfipoli ani Apoloni, ka se Tesaloniki. Kalanso tun b'o yɔrɔ zuwifuw fɛ.
[2] Pɔli tagara u fɛ lafiɲɛlon na, i n'a fɔ a tun be deli k'a kɛ yɔrɔ tɔw la cogo min na. A ye lɔgɔkun saba kɛ u fɛ, ka to ka ɲɔgɔn sɔsɔ ka Ala ka kuma fɔ u ye lafiɲɛlon o lafiɲɛlon.
[3] A y'o kɔrɔ fɔ u ye, k'a gwɛ ko Ala tun ka kan k'a ka Mɔgɔ wolomanin min ci ka na, k'o ye Yezu le ye. Ko ale Pɔli be min ka koo fɔra u ye, ko ale lo. Ko wajibi tun lo, a tun ka tɔɔrɔ, ka sa, ka kunun.
[4] Zuwifuw mɔgɔ damani, ani girɛki minw be siran Ala ɲa, olu caaman, ni faamamuso dɔw lara kuma nunu na. Olu nɔrɔla Pɔli ni Silasi la.
[5] Nga, o ma diya zuwifu tɔw ye. Olu wilila ka bɛn ni mɔgɔkolon dɔw ye waasa ka dugu ɲagami. U wilila ka mankan daminɛ ka dugu bɛɛ ɲagami, ka taga Zasɔn ka soo k'u be Pɔli ni Silasi minɛ ka taga n'u ye kiti tigɛyɔrɔ la.
[6] U ma Pɔli ni Silasi sɔrɔ yen minkɛ, u ye Zasɔn ni balima dɔw minɛ ka taga n'u ye u ka ɲamɔgɔw fɛ, k'a fɔ ko: «Mɔgɔ minw ye diɲɛ bɛɛ ɲagami, u sera an fɛ yan.
[7] Zasɔn le y'u ka jatigi ye. O mɔgɔ nunu si te an ka Ɔrɔmu masacɛba ka sariyaw fɛ. U ko masacɛba wɛrɛ be yen, k'o tɔgɔ ko Yezu.»
[8] O mankan nin ye kititigɛlaw ni jama bɛɛ hakili ɲagami.
[9] U ye wariba la Zasɔn n'a tɔɲɔgɔnw kunna. U y'o di, u sɔrɔla k'u bila.
[10] O loon kelen sufɛ, balima minw tun be Tesaloniki, olu bɔra ni Pɔli ni Silasi ye k'u ka taga Bere. U sera yen tuma min na, u tagara zuwifuw ka kalanso kɔnɔ.
[11] Olu ka koo tun ka di ni Tesaloniki zuwifuw ta ye. U sɔnna Ala ka kuma ma ni dusuɲuman ye. Loon o loon, u tun be ɲɔgɔn fɛ ka to ka Ala ka kuma sɛgɛsɛgɛ k'a filɛ ni Pɔli ka kuma nunu ye tiɲɛ ye.
[12] Zuwifu caaman lara Yezu la, ani faamamuso caaman, ni cɛɛ caaman lara a la girɛkiw cɛma.
[13] Nga Tesaloniki zuwifuw y'a mɛn ko Pɔli tagara Ala ka kuma fɔ Berekaw ye dɔrɔn, u wilila ka taga yen. U ye jama kɔnɔnasu, janko mankan ka wili.
[14] O yɔrɔnin bɛɛ, o yɔrɔ balimaw fana ye Pɔli bila sira fɔɔ kɔgɔji daa la. Nga, Silasi ni Timote tora a kɔ.
[15] Mɔgɔ minw tun y'a bila sira, olu sera n'a ye fɔɔ Atɛni dugu kɔnɔ. Olu kɔsegituma, a y'a fɔ u ye k'u ka taga fɔ Silasi ni Timote ye k'u ka banba ka na ale sɔrɔ Atɛni joona.
[16] Ka Pɔli to a tɔɲɔgɔnw kɔnɔni na Atɛni, a ye joo caaman ye dugu nin kɔnɔ, a dusu cɛnna.
[17] O la, a y'a daminɛ ka kuma ni zuwifuw ni mɔgɔtuubininw ye kalanso kɔnɔ. Loon o loon, a tun be taga forobayɔrɔ la ka kuma jama fɛ.
[18] Lɔnnikɛla dɔw tun be yen, o be u dɔw wele ko Epikiriyɛn, ka dɔw wele ko Etoyisiyɛn, olu yɛrɛ y'a daminɛ ka kuma ni Pɔli ye. Nga dɔw ko: «Kuma caaman tigi nin fana ko di?» Dɔw ko: «Nin be Alasira kuraman dɔ le koo fɔra cɔ!» Bari Pɔli tun be Yezu ni suuw ka kununko le fɔra.
[19] O la, u y'a minɛ k'a sama ka taga n'a ye u ka koo ɲanabɔyɔrɔ la. U y'a ɲininga ko: «I be mɔgɔw kalanna Alasira kuraman jumɛn na ten?
[20] Bari i be mɔgɔw kalanna ni koo kuraman minw ye, an ma deli o la. An b'a fɛ e k'a ɲafɔ an ye.»
[21] Tiɲɛ na, Atɛnikaw n'u ka lonanw caaman tun be u ka waati bɛɛ kɛ koo kuramanw kibaru lamɛnni n'a fɔli dama na tuma bɛɛ.
[22] Pɔli lɔnin tora jama cɛma k'u jaabi ko: «Atɛnikaw, ne y'a lɔn ko aw banbanin lo batoli koo la kosɔbɛ.
[23] Bari, ne yaalatɔ aw ka dugu kɔnɔ, aw be batoli kɛ yɔrɔ minw na, ne y'o caaman ye. N y'a sɛbɛnnin ye sɔnni kɛyɔrɔ dɔ yɛrɛ kan ko: ‹Batofɛn min cogo lɔnnin tɛ.› Aw be fɛɛn batora, aw te min cogo lɔn, ayiwa, ne nana o le cogo fɔ aw ye.
[24] Ala min ye diɲɛ n'a kɔnɔnafɛnw bɛɛ dan, ale min ye sankolo ni dugukolo masa ye, adamadenw ka boon lɔnin te se ka kɛ a sigiyɔrɔ ye.
[25] «A m'a fɔ ko a mako be adamaden ka bololafɛn na k'a yɛrɛ mako ɲa n'a ye fana. Bari ale lo be nii, ani sii, ani fɛɛn tɔɔ bɛɛ di adamaden ma.
[26] Siyaw bɛɛ bɔra mɔgɔ kelen na a ye min dan. A ye siya nunu bɛɛ ka sigiyɔrɔw daan tigɛ, k'u sii sabaticogo fana daan tigɛ.
[27] A y'o kɛ, waasa u ka se ka ale Ala yɔrɔ ɲini cogo bɛɛ la, n'u be se k'a ye. Ala do yɔrɔ man jan an si la.
[28] An tonin be nii na, ka sii sɔrɔ, ka kɛwaliw kɛ Ala barika la. Aw ka lɔnnikɛla dɔw yɛrɛ b'a fɔ ten, ko: ‹An ye a deenw ye yɛrɛ.›
[29] Ayiwa, an kɛra Ala deenw ye minkɛ, an man kan k'a miiri ko Ala bɔnin be joo sanulaman fɛ, walima warigwɛlaman, walima kabakuruɲuman lɛsɛnin fɛ! O fɛɛn nunu bɛɛ ye an adamadenw ka miiriya, n'an bulonɔ ye!
[30] Adamadenw ye kolɔnbaliya minw kɛ ka tɛmɛ, Ala te o si jatira tugu. Nga, a b'a ɲini mɔgɔw fɛ yɔrɔ bɛɛ, k'u ka nimisa ka faran u ka kojuguw la.
[31] O kama, a ye loon dɔ sigi. O loon nin sera, a ye mɔgɔ dɔ woloma ka ban, a bena o tigi bila ka diɲɛ mɔgɔw kiti ni tilenninya ye. A y'o tigi kunun a sanin kɔ janko k'a yira bɛɛ la, ko ale lo bena mɔgɔ bɛɛ kiti.»
[32] Pɔli ye suu kununko kuma fɔ minkɛ, dɔw y'a daminɛ k'a lɔgɔbɔ. Dɔw ko: «An bena mɛnni kɛ i fɛ siɲɛ wɛrɛ.»
[33] O la, Pɔli tɛmɛna k'u to yen.
[34] O bɛɛ n'a ta, mɔgɔ damani lara Yezu la, ka nɔrɔ Pɔli la. Olu cɛma, Denisi tun be yen, kititigɛlaw dɔ tun lo. Muso dɔ fana tun be yen, o tɔgɔ ko Damarisi, ani mɔgɔ wɛrɛw.