[1] A mãa Pol, na be a gaso pʋɔ a Yeezu Kɩrɩta ƴãw a, nɩ a tɩ yɛb Timote, tɩ tɩrɛ nɩ a sɛbɛ ŋa kʋ̀rɛ fʋ, fʋ̃ʋ Filemɔ̃, na ɩ a tɩ ba-nɔna nɩ tɩ lãw-tõ-tɔ a,
[2] fʋ̃ʋ nɩ a tɩ yeepuule Afɩa, nɩ a Asɩpɩ na ɩ a tɩ soja-tɔ a, de nɩ a Lãw-yir nɩbɛ na mɩ́ ɓã taa a fʋ yir a.
[3] A Naaŋmɩn tɩ Sãà nɩ a Sore Yeezu Kɩrɩta, bɛ kʋ̀ nyɩ a maalʋ nɩ a ƴã-ɓaarʋ.
[4] Kʋra lɛ mãa wa puore a, ɩ̃ mɩ́ tɩɛrɛ nɩ a fʋ yele, ɛ puore a ɩ̃ Naaŋmɩn yaanɩ.
[5] Bʋ̃ʋ n'ʋ vɛ̃, ɩ̃ wone na bɛ na manɛ a lɛ fʋ na nɔ̃w a Kɩrɩta-nɩbɛ za a, nɩ a lɛ fʋ na saw de a Sore Yeezu a.
[6] Ɩ̃ zɛlɛ nɩ a Naaŋmɩn k'aa saw-deb tɩɩm nɩ fʋ̃ʋ na lãw a, ʋ tɛr ɩ-ɩrɩ a fʋ zie, mɩ́ tʋ̃ɔ ɩ bɛ bãw vla a yel-vɩɛlɩ al za tɩ na tɛr a tɩ nyɔ-vʋʋrʋ pʋɔ lãw nɩ a Kɩrɩta a.
[7] Yɛb ɩ, a fʋ nɔ̃wfʋ kʋ̀ m ɩ nʋ̃ɔ̀ yaga nɩ mɔwlʋ, bʋ̃ʋ n'ʋ vɛ̃, a fʋ nɔ̃wfʋ sɩrɩ na ɩ a Kɩrɩta-nɩbɛ socie a lɛ kpɛmɛ.
[8] Alɛ n'a so, mãa saa na tʋ̃ɔ yel bom nɛ a na fɛr kɛ fʋ ɩ a kʋ b a, a Kɩrɩta ɩ̃ na lãw nɩ a zũú a,
[9] ɩ̃ nyɛ̃ na a sa, k'ɩ̃ɩ zɛlɩ fʋ bʋ̃-kãw a nɔ̃wfʋ zũú. A a ŋa ɩ̃ na ŋmɛ̃ a, a mãa Pol na ɩ dɛ-nyãw a, ɛ be a gaso pʋɔ ƴɛrɛ ŋa a Yeezu Kɩrɩta ƴãw a,
[10] ɩ̃ lɔbr ɩ nuru zɛlɛ nɩ fʋ yãayãa a Onezim ƴãw, ʋl na saw de a Yeezu Kɩrɩta lɩɛbɩ a ɩ̃ bi-dɛb a gaso pʋɔ ka a.
[11] Koro za a, ʋ bɛ tɩ tɛr yel-ɩra a fʋ zie ɩ, ɛ ƴɛrɛ ŋa a, ʋ tɛr ɩ yel-ɩra mãa nɩ a fʋ̃ʋ za zie.
[12] Ɩ̃ bɛrɛ ʋ na, ʋʋ lɛb wa a fʋ zie, ʋl na ɩ mɛ̃ a mãa mɩŋa a.
[13] Ɩ̃ nãá tɩ tɛr ʋ nɩ a ɩ̃ zie ka, ʋ lɩɛrɩ fʋ sõwne mɛ̃ a gaso pʋɔ ka ɩ̃ na be a Yel-nʋ̃ɔ̀ ƴãw a.
[14] Ɛ cɛ, ɩ̃ bɛ tɩ bɔbr k'ɩ̃ɩ ɩ bom za a fʋ pùorí ɛ, k'aa yel-vla ŋa ta ɩ mɛ̃ fɛrʋ n'a a fʋ zie ɩ, ɛ ɩ fʋ̃ʋ n'ʋ nɔnɛ.
[15] A mɩnɛ kãw, a Onezim zɔ na zãá nɩ fʋ blã lɛ tɛwr ƴãw, kɛ́ fʋ wa tʋ̃ɔ lɛb páw ʋ, ʋ be a fʋ zie kʋra lɛ,
[16] ʋʋ ta cãa ɩ gbãgbaa ɩ, ɛ zuo gbãgbaa: ʋ ɩ yɛb-nɔna za. Ʋ ɩ ʋ nɩ yaga za mãa zie, ŋmɩŋmɩn n'a ʋ kʋ̃ ɩ ʋ a fʋ zie zuo lɛ, a ʋ nɩsaalʋ pʋɔ nɩ a ʋ Kɩrɩta-nɩɩlʋ pʋɔ.
[17] Fʋ̃ʋ wa sɩrɩ nyɛ̃ m ɩ̃ ɩ a fʋ yɛb a Naaŋmɩn sawfʋ pʋɔ a, fʋ̃ʋ saw de a Onezim mɛ̃ a mãa mɩŋa n'ʋ fʋ de a.
[18] Ʋlɛ wa sãw fʋ a, bɩɩ tɛr fʋ san a, fʋ̃ʋ de a za dɔwlɩ a ɩ̃ zu.
[19] A mãa Pol, mãa mɩŋa n'ʋ sɛbr ɩ a ɩ̃ nũu yere kʋ̀rɛ fʋ: mãa n'ʋ na ya b. Ɛ ɩ̃ bɛ yere kʋ̀rɛ fʋ a fʋ nyɔ-vʋʋrʋ san fʋ na dɩ a ɩ̃ zie a ɩ.
[20] Sɩza, yɛb ɩ, ɩ̃ zɛlɛ fʋ na, saw kʋ̀ m a maalʋ ŋa a Sore nɔ̃wfʋ zũú: ɩ a ɩ̃ socir nyɛ̃ mɔwlʋ, tɩɩm nɩ a Kɩrɩta na lãw taa a ƴãw.
[21] Ɩ̃ na bãwnɩ a fʋ nʋɔr sawfʋ a n'a, ɩ̃ sɛbr fʋ, ɛ ɩ̃ mɩ̀ bãwnɩ a na fʋ na na maalɩ zuo a lɛ ɩ̃ na yere a.
[22] Mɩ̀ maalɩ gaa-zie bɛr mɛ̃, bʋ̃ʋ n'ʋ vɛ̃, ɩ̃ tɩɛrɛ k'aa nyɩ puoru zũú a, bɛ na lɛb a bɛr mɛ̃ kʋ̀ nyɩ.
[23] A Epafarasɩ na lãw nɩ mɛ̃ be a gaso pʋɔ a, a Yeezu Kɩrɩta ƴãw a, puore fʋ na,
[24] a Markɩ, Arɩsɩtakɩ, Demasɩ nɩ a Luka, na ɩ a ɩ̃ lãw-tõ-taabɛ a, mɩ̀ puore fʋ na.
[25] A Sore Yeezu Kɩrɩta maalʋ, ʋ be a nyɩ zie.