[1] A biɓaar-pipi, a bawr-maal-nɩ-bɛrɛ, nɩ a Naaŋmɩn-Wulu-sɛ-sɛbrbɛ, nɩ a Zifʋ mɩnɛ nɩ-kore, nɩ a bɛ ƴɛrʋ-dɩb-lãw nɩbɛ za, tɩ wõ n taa ɛ nyɔw a Yeezu 'lẽ cen nɩ tɩ kʋ̀ a Pɩlatɩ.
[2] A Pɩlatɩ tɩ sowr ʋ na: «Fʋ̃ʋ n'ɩ a Zifʋ mɩnɛ nãà bɩɩ?» A Yeezu sɔw: «Fʋ̃ʋ n'ʋ yel.»
[3] A bawr-maal-nɩ-bɛrɛ tɩ manɛ nɩ sãwna yaga dɔwlɛ a ʋ zu.
[4] A Pɩlatɩ tɩ lɛb a sowri ʋ: «Fʋ bɛ sɔwr bom za ɩ? Jɩr nyɛ̃ a sãwna bɛ na manɛ dɔwlɛ a fʋ zu sɛw a?»
[5] Ɛ cɛ a Yeezu bɛ lɛ tɩ sɔw bom za ɩ, a ɩ nɔ-ɓãa-yel a Pɩlatɩ zie.
[6] A Tɔlʋ cuw za, a Pɩlatɩ mɩ́ yuo nɩ nɩ-pàwra been bɛr, a ʋlɩ sob a nɩbɛ na mɩ́ zɛlɩ a.
[7] Zɩ̃ kɛ dɔɔ kãw, bɛ na bʋɔlɛ kɛ Barabasɩ a, tɩ be n a gaso pʋɔ, ʋlɛ nɩ nɩbɛ na tɩ kʋ́ nɩr damnʋ kãw pʋɔ a.
[8] A zu-sɛbla tɩ do n a Pɩlatɩ zie tɩ zɛlɛ ʋ k'ʋʋ ɩ a lɛ ʋ na mɩ́ tu a kʋra lɛ a.
[9] A Pɩlatɩ sɔw yel bɛ: «Nyɩ bɔbr a k'ɩ̃ɩ lɛb bɛr a Zifʋ mɩnɛ nãà kʋ̀ nyɩ bɩɩ?»
[10] Ʋ tɩ bãwnɩ a na nyuur ƴãw na n'a a bawr-maal-nɩ-bɛrɛ nyɔw a Yeezu wa n a ʋ zie a.
[11] A bawr-maal-nɩ-bɛrɛ tɩ dɔ n a nɩbɛ ƴãw kɛ́ bɛ zɛlɩ kɛ a Pɩlatɩ nɩ̃ɛ bɛr a Barabasɩ.
[12] A Pɩlatɩ tɩ lɛb a de a ƴɛrʋ sowri bɛ: «A sob ŋa nyɩ na bʋɔlɛ a Zifʋ mɩnɛ nãà a, ɩ̃ ɩ ʋ ŋmɩn?»
[13] Bɛ tɩ lɛb a cɩɩrɛ yere nɩ: «Kpa ʋ da-gara zu!»
[14] A Pɩlatɩ sowri bɛ: «Bʋ̃ʋ n'ʋ ʋ nɩ̃ɛ sãw?» Bɛ lɛb bãw cɩɩrɛ kpɛ̃w za yere nɩ: «Kpa ʋ da-gara zu!»
[15] A Pɩlatɩ na tɩ bɔbr k'ʋʋ ɩ nʋ̃ɔ̀ kpɛ a nɩbɛ a, ʋ tɩ yuo nɩ a Barabasɩ bɛr ɛ ƴãw bɛ fɔb a Yeezu, ɛ ʋ de ʋ kʋ̀ bɛ kɛ́ bɛ tɩ kpa a da-gara zu.
[16] A sojarɩ tɩ tɛr ɩ a Yeezu kpɛ n a nãà yir dàvʋrá, a pɛr lɛ kɛ a piretʋar pʋɔ, ɛ tɩ bʋɔlɩ a bɛ taabɛ za.
[17] Bɛ tɩ de nɩ kpar-kpɛ̃ɛ zɩɛ su ʋ, ɛ wob gʋʋr kpa-wʋɔ vɔblɩ ʋ.
[18] Ɛ pãa mɩ́ pùor ʋ yere nɩ: «Yaanɩ, Zifʋ mɩnɛ nãà a!»
[19] Bɛ mɩ́ tɩ de nɩ bàa-kɛkɛr varɛ nɩ ʋ a zũú, ɛ pʋʋrɛ mʋtaar ƴãwnɛ ʋ, ɛ mɩ́ gbĩ dume a ʋ niŋé gũu tɩ tɔ a tẽw.
[20] Bɛ na wa ɩ ʋ la baar a, bɛ yaa nɩ a kpar-zɩɛ bɛr ʋ, ɛ lɛb de a ʋ bʋ̃-suuri su ʋ. Al pùorí, bɛ tɛr ʋ na yi n, ɛ́ bɛ tɩ kpa ʋ a da-gara zu.
[21] A sojarɩ tɩ fɛr ɩ dɛb kãw, na tɩ yi pu-pʋɔ waar a, ƴãw k'ʋ tuo a Yeezu da-gara. A dɛb ʋl tɩ yi n Sɩɩrɛn tẽw, ɛ a yúor dɩ kɛ Sɩmʋ̃, Alɛsãdɩr nɩ Irifisɩ sãà.
[22] Bɛ tɩ tɛr ɩ a Yeezu cen nɩ zie kãw bɛ na bʋɔlɛ kɛ Gɔlgɔta a, a pɛr lɛ kɛ zu-ŋman zie.
[23] Bɛ tɩ bɔbr a kɛ bɛ kʋ̀ ʋ divɛ̃ na jɛr kãa nyũu a, ɛ cɛ, ʋ bɛ tɩ saw nyũ a ɩ.
[24] Al pùorí, bɛ tɩ kpa ʋ nɩ a da-gara zu, ɛ ŋmɛ gbãw põ a ʋ bʋ̃-suuri. Bɛ ŋmɛ n a gbãw kɛ́ bɛ bãw ʋlɩ bom nɛ ŋa za na na mɩ́ páw a.
[25] A biɓaara gbele pi-waɩ daar a, bɛ tɩ kpa ʋ a da-gara zu.
[26] Bɛ tɩ sɛb ɩ a ʋ kũu pɛr a ŋa: «Zifʋ mɩnɛ nãà.»
[27] Bɛ mɩ̀ tɩ kpa n nyãnyu-nɩ-kʋ́rbɛ ayi da-garɩ zu lãw nɩ ʋ, kãw a ʋ dʋrʋ lowr, ɛ kãw a ʋ gʋba lowr. Da-garɩ ata (15.27). [
[28] Lɛ n'a a Sɛb-sõw ƴɛr-bir ŋa tɩ tu: «Bɛ sɔr ʋ na ƴãw nɩ-faar pʋɔ.»]
[29] A sɔr-tɔlbɛ tɩ tʋʋr ʋ na gɔwrɛ nɩ zu yere: «Alɛ! Fʋ̃ʋ na darɛ a Ŋmɩn-yi-kpɛ̃ɛ lɔbr ɛ lɛb mɩɛr ʋ bibie ata ƴãw a,
[30] siw a da-gara zu faa fʋ tʋɔra!»
[31] A bawr-maal-nɩ-bɛrɛ, nɩ a Naaŋmɩn-Wulu-sɛ-sɛbrbɛ, mɩ̀ tɩ ɩrɛ ʋ na laar a bɛ cara pʋɔ yere nɩ: «Ʋ faa nɩ bɛ mɩnɛ ɛ kʋ̃ tʋ̃ɔ faa ʋ tʋɔra ɩ!
[32] A Naaŋmɩn Nɩ-kabra, a Ɩsɩrayɛl nãà, ʋ siw a da-gara zu a ƴɛrɛ ŋa tɩ nyɛ̃ ɛ saw de a ʋ yele.» A bɛl bɛ na tɩ kpa a da-garɩ zu lãw nɩ ʋ a, mɩ̀ tɩ tʋʋr ʋ na.
[33] A mʋ̃tɔ̃w na wa do põ-zɛ̃-taa a, lige pàw nɩ a tẽ-daa za tɩ ta a zaanʋɔra gbele ata daar.
[34] A gbele ata na wa ta a, a Yeezu ŋmɛ n cɛl kpɛ̃w za yel: «Elɔɩ, Elɔɩ, lema sabaktanɩ!» A pɛr lɛ kɛ: «Ɩ̃ Naaŋmɩn ɩ, ɩ̃ Naaŋmɩn ɩ, bʋ̃ʋ n'ʋ so fʋ zawrɩ mɛ̃ bɛr?»
[35] A nɩbɛ na tɩ be a be a, bɛ mɩnɛ tɩ wõ a na ɛ yere: «Nyɛ̃ ʋ bʋɔlɛ Eli wɛ!»
[36] A bɛ kãw tɩ zɔ na cen tɩ de sapɔ̃ tõ dã-miiru pʋɔ, 'lẽ ƴãw bàa-kɛkɛr ƴãw tur ʋ k'ʋʋ nyũ, ɛ́ yere: «Nyɩ vɛ̃ tɩ nyɛ̃ a lɛ a Eli na na wa nyɔw ʋ ʋ siw a da-gara zu a!»
[37] Ɛ cɛ a Yeezu tɩ lɔb ɩ cɛl kpɛ̃w za ɛ ŋmãa a vʋʋrʋ.
[38] A Ŋmɩn-yi-kpɛ̃ɛ pʋɔ pɛn-yawla tɩ tĩ nɩ a saa zu ɛ ɓar siw tɩ tɔ a pile.
[39] A sojarɩ kʋba nɩ-kpɛ̃ɛ ʋl na tɩ ar a ʋ niŋé a, ɛ nyɛ̃ a lɛ ʋ na ŋmãa a vʋʋrʋ a, ʋ yel a: «Sɩza, a nɩr ŋa tɩ ɩ n Naaŋmɩn Bie!»
[40] Pɔwbɛ bɛ mɩnɛ kãw mɩ̀ tɩ be n be, ar zãá ɛ jɩrɛ: Madala tẽw Marya, nɩ Zakɩ pʋrɩ nɩ Zoze mã Marya, nɩ Salume tɩ pʋɔ nɩ a bɛ pʋɔ;
[41] bɛ tɩ tu n a Yeezu ɛ kaa ʋ zie, a lɛn daar ʋ na tɩ be a Galile a, lãw nɩ pɔw-yaga na tɩ páw ʋ do a Zeruzalɛm a.
[42] A zaanʋɔra tɩ ta na baarɩ, ɛ a na tɩ ɩ a cɔbrʋ bibir a, a pɛr lɛ kɛ a pɩɛnʋ-bibir zãa daarɩ a,
[43] Zuzɛb na yi Arimate tẽw a, ɛ ɩ a ƴɛrʋ-dɩb-lãw nɩ-yúor kãw a, tɩ ta na. Ʋ mɩ́ tɩ gùre nɩ a Naaŋmɩn-Naalʋ. Ʋ tɩ nyɔw nɩ socir ɛ kpɛ a Pɩlatɩ zie tɩ zɛlɩ a Yeezu ƴãgan.
[44] A tɩ ur ɩ a Pɩlatɩ, ʋ na tɩ wõ kɛ a Yeezu kpi n fɔ̃w lɛ a. Ʋ tɩ ƴãw na bɛ bʋɔlɩ a sojarɩ kʋba nɩ-kpɛ̃ɛ wa sowri ʋ kɛ koro za n'a ʋ kpi bɩɩ.
[45] A sojarɩ kʋba nɩ-kpɛ̃ɛ na wa sɔw kʋ̀ ʋ a, ʋ saw na kɛ a Zuzɛb de a Yeezu ƴãgan.
[46] A Zuzɛb tɩ da n pɛn-paala, yaw a Yeezu ƴãgan a da-gara zu pili nɩ, ɛ́ de ʋ ũù bɔw bɛ na tuw piìr pʋɔ a, ɛ bìlì kʋsɛ-kpɛ̃ɛ pàw a bɔw nʋɔr.
[47] Madala tẽw Marya nɩ a Zoze mã Marya tɩ jɩrɛ nɩ a be bɛ na ũù a Yeezu a.