[1] Bʋ̃ʋ pãa ɩ a! Nyɩ nãa saw kʋ̀ m ɩ̃ tõ yãya-tome blã! Ʋ̃ʋ nyɩ saw kʋ̀ m!
[2] Nyuur na yi Naaŋmɩn zie a ɩrɛ mɛ̃ nɩ a nyɩ ƴãw. Dɛb-been yõ tẽtẽ n'ʋ ɩ̃ ƴãw nɩ nyɩ a yúor, k'ɩ̃ɩ tʋ̃ɔ de nyɩ kʋ̀ a Kɩrɩta mɛ̃ pɔwsɩrale na bɛ tɛr dɛwr a.
[3] Ɛ cɛ, mɛ̃ a lɛ a waab na tɩ bɛlɩ a Awa a, dɛ̃bɩ̃ɛ ɩrɛ mɛ̃ na, a nyɩ tɩɛrʋ nãa wa lɩɛbɛ tɩɛr-faar ɛ tawr nyɩ zãanɛ nɩ a Kɩrɩta puor-tub ʋl na bɛ bãw a mɩnɛ kãw a.
[4] Bʋ̃ʋ n'ʋ vɛ̃, nyɩ mɩ́ saw na de nɩ-sãsara lɛ na hiere yere Yeezu-yũo na bɛ ɩ a ʋl tɩ na hieri yel kʋ̀ nyɩ a ɩ, ɛ saw de yã-yũo nɩ wul-yũo na bɛ ɩ a Vʋʋrʋ Sõw nɩ a Yel-nʋ̃ɔ̀ nyɩ na páw a tɩ zie a dem a ɩ.
[5] Ɛ cɛ, ɩ̃ bɛ tɩɛr kɛ a nyɩ nɩ-ton-kazawr bɛ ŋa zuo mɛ̃ nɩ yel kãw za ƴãw ɛ.
[6] Sɩza n'a, ɩ̃ tɔ̃w bɛ bãw ƴɛrʋ ɛ, ɛ cɛ a yele-bãwfʋ lowr a, a bɛ ɩ a lɛ ɩ: bom za ƴãw, yele za pʋɔ, tɩ wul nyɩ na a sãá.
[7] Ɩ̃ na siwri ɩ̃ tʋɔra manɩ a Naaŋmɩn Yel-nʋ̃ɔ̀ kʋ̀ nyɩ mɔlɛ lɛ k'ɩ̃ɩ zɛw nyɩ a, sãwna n'a bɩɩ?
[8] Lãw-yie a mɩnɛ n'a ɩ̃ kpow, ɩ̃ saw na bɛ kaarɛ a ɩ̃ zie k'ɩ̃ɩ tone a nyɩɩm.
[9] Ɛ ɩ̃ na tɩ be a nyɩ zie, a wa fɛrɛ mɛ̃ a, nɩr kãw za bɛ hanɩ a ɩ̃ ƴãw ɛ, a yɛbr na tɩ yi a Masedʋan wa a tɩ kʋ̀ m ɩ a ɩ̃ bʋ̃-bɔbrɩ; a yele za pʋɔ, ɩ̃ bɛ saw nyɩ hanɩ a ɩ̃ ƴãw ɛ, ɛ́ mɩ̀ bɛ be za na saw ɛ.
[10] A Kɩrɩta yel-mɩŋa na be a ɩ̃ pʋɔ a ƴãw, ɩ̃ yere nɩ a ŋa: nɩr za kʋ̃ tʋ̃ɔ ɩ ɩ̃ bɛ nyʋʋr a yel ŋa ƴãw a Akayi ten pʋɔ ɩ.
[11] Ɛ bʋ̃ʋ so ɩ̃ ƴɛr a a ŋa? Ɩ̃ na bɛ nɔnɛ nyɩ a n'a bɩɩ? Naaŋmɩn yõ n'ʋ bãw!
[12] Ɩ̃ na cãa na ɩrɛ a a ŋa ɩ̃ na ɩrɛ a, k'ɩ̃ɩ ɩ a bɛlɩ dem na pɔrɛ kɛ́ bɛ zɛ̃ tɩ na a, ta cãa tɛr pɔb bom ɛ.
[13] A nɩbɛ bɛ ŋa a, nɩ-ton-bɛlɛ bɛlɛ mɩnɛ nɛ bɛ, tõ-tõ-biir na bɛ tɛr yel-mɩŋa a, ɛ bɛlɩ ɩ Kɩrɩta nɩ-toni a.
[14] A a ŋa za dɛ bɛ ɩ nɔ-ɓãan ɛ: a Sɩtaana tɔr za mɩ́ bɛlɩ na ɩ cãa malkɩ.
[15] Lɛ so a Sɩtaana tõ-tõ-biir mɩ̀ na bɛlɩ ɩ yel-mɩŋa tõ-tõ-biir a, yel-pʋrɩ n'ʋ a bɛ zie. A bɛ baarʋ na tu n a lɛ a bɛ ɩ-ɩrɩ na ŋmɛ̃ a.
[16] Ɩ̃ lɛb a yere a yel ŋa: nɩr kãw za taa wa tɩɛr k'ɩ̃ɩ yarɛ na ɩ. Bɩɩ nɩr wa tɩɛrɛ k'ɩ̃ɩ yarɛ na a, nyɩɩm saw k'ɩ̃ɩ yarɛ na, ɩ̃ mɩ̀ tʋ̃ɔ zɛw ɩ̃ tʋɔra blã.
[17] Sɩza n'a, a yele na wa ƴãw mɛ̃ ɩ̃ na zɛwr ɩ̃ tʋɔra a, ɩ̃ bɛ ƴɛrɛ mɛ̃ a lɛ a Sore nãa tɩ bɔbr k'ɩ̃ɩ ƴɛr a ɩ, ɩ̃ ƴɛrɛ na mɛ̃ yãyaar sob a.
[18] Nɩ-yaga na faa pɔrɛ a bɛ nɩsaalʋ yel-vɩɛlɩ ƴãw a, mãa mɩ̀ na pɔrɛ na.
[19] Nyɩɩm na bãw yã a, nyɩ mɩ́ nɔ̃w na saw de a dãbole.
[20] Nyɩ mɩ́ saw na kɛ bɛ ɩrɛ nyɩ mɛ̃ gbãgbaar a, ɛ saw bɛ nɛbr nyɩ, nyɩ mɩ́ saw na bɛ farɛ a nyɩ bome za ɛ pɔrɛ a nyɩ zu, ɓarɛ nɩ nyɩ.
[21] Vĩ ɩrɛ mɛ̃ nɩ a yelu ƴãw: tɩ wul a kɛ tɩ maal a ɩ bãbaalbɛ tɩ zuo! Ɩ̃ ƴɛrɛ na mɛ̃ yãyaar sob a, a bom nɛ ƴãw a nɩbɛ na zɛwr bɛ tʋɔra a, mãa mɩ̀ na tʋ̃ɔ na zɛw ɩ̃ tʋɔra.
[22] Mɛ̃ bɛ taa ɩ Ebire nɩbɛ? A mãa mɩ̀! Bɛ ɩ n Ɩsɩrayɛl bʋʋrɛ yaa? A mãa mɩ̀! Bɛ ɩ n Abraham nɩ-bʋʋrɛ ɛ? A mãa mɩ̀!
[23] Bɛ ɩ n Kɩrɩta tõ-tõ-biir yaa? A ka a, ɩ̃ na ƴɛr ɩ yãya-ƴɛrʋ: ɩ̃ ɩ ʋ na zuo bɛ. A balʋ pʋɔ n'a o, ɩ̃ zuo bɛ na, a gaso pʋɔ kpɛb ƴãw n'a o, ɩ̃ gãw bɛ na, a ŋmɩɛrʋ lowr wa n'a a, bɛ ŋmɛ mɛ̃ na zuo bɛ; gb'a a ŋmɩn za, ɩ̃ tɩ cɛ nɩ blã nãá kpi.
[24] Gb'a anũu n'a a Zifʋ mɩnɛ ƴãw mɛ̃ a fʋba nɛɛ lɩz'a ayi for bir ,
[25] gb'a ata n'a a Ʋrɔm tẽw nɩbɛ fɔb mɛ̃, gb'a-been n'a a nɩbɛ lɔb ɩ mɛ̃ kʋsɛbɛ; gb'a ata n'a a ɩ̃ gbor tu kʋ̃ɔ, ɛ gb'aa been ɩ̃ gã a kʋ̃ɔ-kpɛ̃ɛ pʋɔ bibi-ɓil nɩ tɩ̃ɩsɔw-ɓil.
[26] Gb'aa yaga za, gbɛɛ n'a ɩ̃ cen nɩ a ta-ten, a barʋ kʋ̃ɔ-paalʋ nɩ a nyãnyu-nɩ-kʋ́rbɛ ƴãwnɛ mɛ̃ kũu dɛ̃bɩ̃ɛ, lãw nɩ a ɩ̃ yɛbr na ɩ a ɩ̃ bʋʋrɛ nɩbɛ a, nɩ a zawlɛ bɛl na bɛ ɩ a ɩ̃ bʋʋrɛ nɩbɛ a, a tẽw pʋɔ bɩɩ a wɛ-kar pʋɔ, a kʋ̃ɔ-kpɛ̃ɛ zu bɩɩ a yɛb-bɛlɛ bɛlɛ mɩnɛ sɔgɔ.
[27] Tõ-kpɛn ƴãw mɛ̃ nɩ balʋ nɩ hanʋ; gb'a a ŋa za, ɩ̃ bɛ ũù mimir ɛ; kɔ̃ nɩ kʋ̃ɔ-nyuur kpɛ m a; gb'a a ŋmɩn za ɩ̃ tɛr ɩ mʋta-tuo; ƴawr kpɛ m a, ɩ̃ bɛ tɩ tɛr bʋ̃-suuri ɛ.
[28] Ɩ̃ bɛ ƴɛrɛ a al za na cɛ a ƴɛrʋ ɛ, a yel ʋl na ƴãwnɛ mɛ̃ a tɩɛrʋ bibie za a: a Lãw-yie za kaafʋ tɩɛrʋ.
[29] Ãa n'ʋ ɩ bãbaal, ɩ̃ɩ bɛ lãw nɩ ʋ ɩ a bãbaal? Ãa n'ʋ lɛb pùor a saw-deb pʋɔ, ɛ a bɛ dɩrɛ mɛ̃ mɛ̃ vũu a?
[30] Alɛ wa fɛr k'ɩ̃ɩ zɛwr ɩ̃ tʋɔra a, a ɩ̃ bãbaalʋ ƴãw n'a ɩ̃ na zɛwr ɩ̃ tʋɔra.
[31] A Naaŋmɩn tɩ Sore Yeezu Sãà, na tɛr ƴãwfʋ yome yome za a, bãwnɩ a na k'ɩ̃ɩ bɛ ŋmarɛ ziri ɛ.
[32] A Damasɩ ɩ̃ na tɩ be a, a na-kpɛ̃ɛ lɩɛrɛ ʋl na lɩɛrɩ a nãà Aretasɩ a, tɩ ƴãw na bɛ gu a tẽw kɛ́ bɛ nyɔw mɛ̃.
[33] Ɛ cɛ zãgba pʋɔ n'a bɛ tɩ ƴãw mɛ̃ tur bɛr tokoro vʋ́ɔrɩ́, ɩ̃ lanɩ a dacin siw zɔ cɩ̃ɛ, ʋ bɛ páw mɛ̃ ɩ. A zãgba pʋɔ bɛ na ƴãw a Pol a (11.33).