[1] A cɩɛrʋ nyɩ na cɩɛrɛ ɓanɛ taa a Kɩrɩta-nɩbɛ ƴãw a, nyɩ mɩ̀ tuur a lɛ ɩ̃ na wul a Galasi Lãw-yie a.
[2] Kɔsɩɛra bibir za, bom nɛ ŋa za na tʋ̃ɔ páw a ʋ yir bɛr a, ʋ mɩ́ taw ʋ bin kõkówrí, kɛ̀ bɛ ta gùre k'ɩ̃ɩ wa wa bɛ pãa cɩɛrɛ ɩ.
[3] Mãa wa ta a, ɩ̃ na to n a bɛlɩ dem nyɩ nãá kaa ir a, bɛ tɛr sɛb-tʋɔlɩ cen nɩ a Zeruzalɛm tɩ tɩr a nyɩ cɩɛrʋ libie.
[4] Alɛ wa sɛw k'aa mãa mɩŋa cen a, bɛ na páw mɛ̃ na tɩ cen.
[5] Ɩ̃ na tu na tɔl a Masedʋan wa a nyɩ zie; tu-tɔlʋ tɛwr a ɩ̃ na tu tɔl a be,
[6] ɛ a mɩnɛ kãw, ɩ̃ na kpɛ n a nyɩ zie kɔwrɩ blã; a mɩnɛ kãw mɩ̀ ɩ̃ na be n a be, a zie tɩ yi, kɛ̀ nyɩ sõw mɛ̃ ɩ̃ cãa lo a ɩ̃ sɔr.
[7] Ɩ̃ bɛ bɔbr k'ɩ̃ɩ wa tɔlɛ nyɛ̃ nyɩ nyɛb tɛwr ɛ, ɩ̃ tɩɛrɛ na k'ɩ̃ɩ be a nyɩ zie blã, a Sore wa saw a.
[8] Ɛ cɛ, ɩ̃ na kpɛ n a Efɛɛzɩ tɩ ta a Pãtɩkɔtɩ,
[9] bʋ̃ʋ n'ʋ vɛ̃, ɩ̃ nyɛ̃ na ɩ̃ na tʋ̃ɔ tõ a ɩ̃ tome vla vla za a be, a dɔ̃ dem na saa bɛ dɩ vuo a.
[10] A Timote wa wa a, nyɩ ƴãw fãw tɛr ʋ vla, ʋ ta kpɩɛr a nyɩ zie nɩ dɛ̃bɩ̃ɛ ɩ, ʋ na tone a Sore tome mɛ̃ a mãa a ƴãw.
[11] A na ɩ lɛ a, nɩr za taa wa manɛ k'ʋʋ bɛ tɛr bir ɛ. Nyɩ sõw ʋ ʋ lɛb wa a ɩ̃ zie nɩ ƴã-ɓaarʋ, mãa nɩ a yɛbr gùre ʋ na.
[12] Ɛ a tɩ yɛb Apɔlɔsɩ ʋl a, ɩ̃ kpaal ʋ nɩ gb'aa yaga za k'ʋʋ wa a nyɩ zie ʋlɛ nɩ a yɛbr, ɛ cɛ ʋ bɛ bɔbr towtow k'ʋʋ wa a ƴɛrɛ ŋa ɩ. Ʋlɛ wa nyɛ̃ a vuo a, ʋ na wa na.
[13] Nyɩ bɛr gʋ̃ɔ, nyɩ kpɛmɛ a saw-deb pʋɔ, nyɩ ɩ dɛbr, nyɩ tɛr fãw.
[14] Nyɩ ɩrɛ bom za nɩ nɔ̃wfʋ.
[15] Yɛbr ɩ, ɩ̃ kpaalɛ nyɩ na: nyɩ bãwnɩ a na k'aa Sɩtefanasɩ nɩ a ʋ yir dem nɛ bɛ de niwn lɩɛbɩ a Kɩrɩta-nɩbɛ a Akayi ɛ saw tõ a lãw tome.
[16] Lɛ so, nyɩ sawr a nɩbɛ bɛ ŋa taabɛ nʋɔr, nɩ a bɛlɩ dem za na lãw nɩ bɛ tone ɛ hanɛ a.
[17] A Sɩtefanasɩ, nɩ a Fɔrtinatisi nɩ a Akayikisi waa ɩrɛ mɛ̃ nɩ nʋ̃ɔ̀ yaga. Bɛ lɩɛrɩ nyɩ nɩ a ɩ̃ zie ka.
[18] Bʋ̃ʋ n'ʋ vɛ̃, bɛ ɩ na mãa nɩ a nyɩɩm za bɛr tɩɛrʋ. Lɛ so, nyɩ mɩ́ nɔnɛ a nɩbɛ bɛ ŋa taabɛ yele.
[19] A Azi Lãw-yie puore nyɩ na. Akɩlasɩ nɩ Pɩrɩsɩl nɩ a Lãw-yir na mɩ́ ɓã taa a bɛ yir a, lãw nɩ nɩ a Sore puore nyɩ yaga za.
[20] A yɛbr za puore nyɩ na. Nyɩ nyɔw taa weri pùori taa mɛ̃ yɛbr a.
[21] A mãa Pol, mãa mɩŋa nũu n'ʋ sɛb a puoru ƴɛr-bie.
[22] Nɩr bɛ wa nɔnɛ a Sore a, ʋ ɩ nɩ-ŋmɛ̃-ƴãwna. Marana ta (Tɩ Sore e, wa!)
[23] A Sore Yeezu maalʋ, ʋ be a nyɩ zie.
[24] Ɩ̃ lãw nɩ nɩ a Yeezu Kɩrɩta nɔnɛ nyɩ za.