<2 Corinthians ᓂᓵᐧᐤ ᑲᕒᐃᐣᑎᔭᓇ 12

[1] ᑭᑕ ᑲᑭᐦᒋᒧᔮᐣ ᐋᑕᐃᐧᔭ ᓇᒪᐃᐧᔭ ᓇᐃᓈᑲᐧᐣ; ᒫᑲ ᓂ ᑲ ᐋᑐᑌᐣ ᐅ ᐋᐧᐸᐦᑕᐦᐃᐁᐧᐃᐧᓇ ᒥᓇ ᐅ ᑭᐢᑫᔨᑖᑯᐃᐁᐧᐃᐧᓇ ᑳ ᑎᐯᔨᐦᒋᑫᐟ.

[2] ᓂ ᑭᐢᑫᔨᒫᐤ ᓈᐯᐤ ᐁ ᐃᐧᒉᐋᐧᐟ ᙭ᐊ, ᒥᑖᑕᐟ ᓀᐅᓵᑊ ᐁᑲᐧ ᑕᐦᑐ ᐊᐢᑭ (ᑭᐢᐱᐣ ᐃᐧᔭᐃᐧᕽ, ᓇᒪᐃᐧᔭ ᓂ ᑭᐢᑫᔨᑌᐣ; ᐊᐦᐳ ᐁᑳ ᐁ ᑭᑭᐢᑲᕽ ᐃᐧᔭᐤ, ᓇᒪᐃᐧᔭ ᓂ ᑭᐢᑫᔨᑌᐣ; ᑭᓭᒪᓂᑐ ᑭᐢᑫᔨᑕᑦ), ᐁᑯᑐᐊᐧ ᐁ ᐅᑎᓂᐦᐟ ᐃᐢᐱᒥᕽ ᓂᐢᑖᐧᐤ ᐁ ᐊᑎ ᑭᓯᑯᐊᐧᕽ.

[3] ᐁᑯᓯ ᓂ ᑭᐢᑫᔨᒫᐤ ᐁᐊᐧᑯ ᐊᔨᓯᔨᓂᐤ (ᑭᐢᐱᐣ ᐃᐧᔭᐃᐧᕽ, ᐊᐦᐳ ᐁᑳ ᐁ ᑭᑭᐢᑲᕽ ᐃᐧᔭᐤ, ᓇᒪᐃᐧᔭ ᓂ ᑭᐢᑫᔨᑌᐣ; ᑭᓭᒪᓂᑐ ᑭᐢᑫᔨᑕᑦ),

[4] ᑳ ᑭ ᐃᓯ ᐅᑎᓂᐦᐟ ᐹᕒᐃᑕᐃᓯᕽ, ᐁᑯᓯ ᑳ ᑭ ᐯᐦᑕᕽ ᐁᑳ ᑭᑕ ᑭ ᐱᑭᐢᑫᐧᕽ ᐃᑌᐧᐃᐧᓇ, ᐁᑳ ᑳ ᐃᔨᓇᒫᐦᐟ ᐊᔨᓯᔨᓂᐤ ᑭᑕ ᐃᐧᐦᑕᕽ.

[5] ᐁᑯᑐᐊᐧ ᐃᐧᔭ ᓂ ᑲ ᑲᑭᐦᒋᒧᐣ: ᒫᑲ ᓂᔭ ᑫᐦᒋᐋᐧᐠ ᐅᐦᒋ ᓇᒪᐃᐧᔭ ᓂ ᑲ ᑲᑭᐦᒋᒧᐣ, ᐱᑯ ᓂ ᓀᓱᐃᐧᓯᐃᐧᓂᕽ.

[6] ᒋᑫᒫ ᑭᐢᐱᐣ ᓄᐦᑌ ᑲᑭᐦᒋᒧᔮᓂ, ᓇᒪᐃᐧᔭ ᓂ ᑲ ᑲᑫᐸᑎᓂᑳᐣ; ᒋᑫᒫ ᓂ ᑲ ᑖᐸᐧᐣ: ᒫᑲ ᓂ ᓇᑭᐣ ᑭᔮᑦ, ᐁᑳ ᐊᐃᐧᔭᐠ ᐊᔨᓯᔨᓂᐤ ᐊᐊᐧᓯᒣ ᑭᑕ ᐃᑕᑭᒥᐟ ᐃᔨᑯᕽ ᐊᓂᒪ ᑳ ᐃᓯ ᐋᐧᐸᒥᐟ, ᐊᐦᐳ ᑳ ᐃᓯ ᐯᑕᐃᐧᐟ.

[7] ᐁᑯᓯ ᐅᒪ ᐁ ᑭ ᐃᓯ ᒥᐢᑕᐦᐃ ᑭᐢᑫᔨᑕᒧᐃᑲᐃᐧᔮᐣ; ᐁᐊᐧᑯ ᐅᐦᒋ, ᐁᑳ ᐊᔨᐋᐧᐠ ᑭᑕ ᐃᐢᐯᔨᒥᓱᔮᐣ, ᓂ ᑭ ᒥᔨᑲᐃᐧᐣ ᑭᓯᓯᓄᐃᐧᐣ ᓂ ᐃᐧᔮᓯᕽ, ᐅᐟ ᐃᓯᑎᓴᐋᐧᑲᓇ ᓭᑕᐣ ᑭᑕ ᐸᐸᑲᒪᐅᐟ, ᐁᑳ ᐊᔨᐋᐧᐠ ᑭᑕ ᐃᐢᐯᔨᒥᓱᔮᐣ.

[8] ᐁᐊᐧᑯ ᐅᒪ ᐅᐦᒋ ᓂᐢᑖᐧᐤ ᓂ ᑭ ᑳᑭᓯᒧᑐᑕᐋᐧᐤ ᑳ ᑎᐯᔨᐦᒋᑫᐟ, ᑭᔮᑦ ᑭᑕ ᓇᑲᑎᑯᔮᐣ.

[9] ᐁᑯᓯ ᓂ ᑭ ᐃᑎᐠ, ᓂ ᓂᓱᑲᒫᑫᐃᐧᐣ ᐁᑯᔨᑯᕽ ᑭ ᑌᐱᐸᔨᐃᑯᐣ: ᒋᑫᒫ ᓂ ᒫᐢᑲᐃᐧᓯᐃᐧᐣ ᐁᑯᑕ ᒪᒥᑐᓂᒪᑲᐣ ᓀᓱᐃᐧᓯᐃᐧᓂᕽ. ᓂ ᑲ ᒥᔦᐧᔨᑌᐣ ᒫᑲ ᓇᐊᐧᐨ ᑭᑕ ᑲᑭᐦᒋᒧᔮᐣ ᓂ ᓀᓱᐃᐧ ᓯᐃᐧᓂᕽ, ᐅ ᒪᐢᑲᐃᐧᓯᐃᐧᐣ ᙭ ᑭᑕ ᑭᑭᐢᑳᑯᔮᐣ.

[10] ᐁᐊᐧᑯ ᐅᐦᒋ ᒫᑲ ᓂ ᒥᔦᐧᔨᑌᐣ ᓀᓱᐃᐧᓯᐃᐧᓇ, ᒫᔨᑐᑖᑯᐃᐧᓇ, ᑭᐧᑕᒫᐃᐧᓇ, ᑯᑕᑭᐦᐃᑯᐃᐧᓇ, ᐋᔨᒥᓯᐃᐧᓇ, ᙭ ᐅᐦᒋ: ᒋᑫᒫ ᐁ ᓀᓱᐃᐧᓯᔮᐣ, ᐁᑲᐧ ᑳ ᒪᐢᑲᐃᐧᓯᔮᐣ.

[11] ᓂ ᑭ ᑭᐢᑫᐧᒧᐣ ᒫᑲ: ᑭᔭᐋᐧᐤ ᑳ ᑐᑕᐃᐧᔦᐠ; ᒋᑫᒫ ᑭ ᑲ ᑭ ᒥᔪ ᐋᔨᒧᒥᑖᐋᐧᐤ: ᒋᑫᒫ ᓇᒪᐃᐧᔭ ᓈᐣᑕᐤ ᑫᑲᐧᐩ ᓂᐟ ᐃᓯ ᓄᑌᐸᔨᐣ ᑳ ᐃᓯ ᐊᔮᒋᐠ ᐊᓂᑭ ᑳ ᒫᐊᐧᒋ ᓂᑳᓂᒋᐠ ᐊᐹᐢᑎᓬᐊᐠ, ᐋᑕ ᐁᑳ ᓈᐣᑕᐤ ᐁ ᐃᑕᑭᒋᑳᓱᔮᐣ.

[12] ᑖᐯᐧ ᐊᐹᐢᑎᓬ ᐁ ᐃᓯ ᑭᐢᑭᓇᐋᐧᑌᔨᑖᑯᓯᐟ ᑭ ᐊᑐᐢᑳᒋᑳᑌᐊᐧ ᐃᑕ ᑳ ᐊᔮᔦᐠ ᒥᓯᐁᐧ ᓯᐯᔨᑕᒧᐃᐧᓂᕽ, ᐁ ᑭᐢᑭᓇᐋᐧᑌᔨᑖᑲᐧᑭ ᒥᓇ ᐁ ᒫᒪᐢᑳᑌᔨᑖᑲᐧᑭ ᒥᓇ ᐁ ᓱᑫᔨᑖᑲᐧᑭ ᐊᑐᐢᑫᐃᐧᓇ.

[13] ᒋᑫᒫ ᑖᓂᑕ ᑭᔭᐋᐧᐤ ᓄᑕᐤ ᑳ ᐃᑐᑖᑲᐃᐧᔦᐠ ᐃᔨᑯᕽ ᑯᑕᑲᐠ ᐅᑕᔭᒥᐦᐋᐊᐧᐠ, ᐱᑯ ᐅᒪ ᐁᑐᑫ ᐁᑳ ᓂᔭ ᑫᐦᒋᐋᐧᐠ ᐁ ᑭ ᐅᐦᒋ ᓇᔭᑕᐃᑕᑯᐠ ᑭᑕ ᐅᐦᑎᓇᒪᐃᐧᔦᐠ? ᐳᓀᔨᑕᒪᐃᐧᐠ ᒫᑲ ᑭᔮᑦ ᐅᒪ ᐁ ᑭ ᐃᓯ ᐊᐧᓂᑐᑖᑕᑯᐠ.

[14] ᒫᑎᑲ, ᐁᑲᐧ ᐅᒪ ᓂᐢᑖᐧᐤ ᐁ ᑭᓯ ᐊᐧᐁᐧᔨᔮᐣ ᑭᑕ ᐯ ᓇᑕᐋᐧᐸᒥᑕᑯᐠ; ᐁᑯᓯ ᑫᔮᐱᐨ ᓇᒪᐃᐧᔭ ᑭ ᑲ ᓇᑕᐁᐧᔨᑕᒫᑎᓈᐋᐧᐤ: ᐊᔨᐢ ᑭᔭᐋᐧᐤ ᑳ ᓇᑕᐁᐧᔨᒥᑕᑯᐠ, ᓇᒪᐃᐧᔭ ᑭᐟ ᐊᔮᐃᐧᓂᐋᐧᐊᐧ: ᒋᑫᒫ ᓇᒪᐃᐧᔭ ᐊᐋᐧᓯᓴᐠ ᑭᑕ ᐊᐢᑖᐧᑲᓂᑲᐋᐧᒋᐠ ᐅᓂᑭᐃᑯᐋᐧᐊᐧ, ᒫᑲ ᐊᐋᐧᓯᓴᐠ ᑭᑕ ᐊᐢᑕᐧᑲᓂᑳᑯᒋᐠ ᐅᓂᑭᐃᑯᐋᐧᐊᐧ.

[15] ᐁᑯᓯ ᓂ ᑲ ᒥᔦᐧᔨᑌᐣ ᑭᑕ ᒣᐢᑎᓂᑫᔮᐣ ᒥᓇ ᑭᑕ ᒣᐢᑎᓂᓱᔮᐣ ᑭᐟ ᐊᐦᒑᑯᐋᐧᐊᐧᐠ ᐅᐦᒋ. ᑭᐢᐱᐣ ᐊᔨᐋᐧᐠ ᑭ ᓴᑭᐃᑎᓈᐋᐧᐤ, ᓄᑕᐤ ᒋ ᑭᔭᐋᐧᐤ ᑭ ᓵᑭᐃᓈᐋᐧᐤ?

[16] ᒫᑲ ᑭᔮᑦ ᐁᑯᓯ, ᓇᒪᐃᐧᔭ ᑯᐦᒋ ᓇᔭᑕᐃᑎᓈᐋᐧᐤ ᓂᔭ ᑭᑕ ᐸᒥᐃᔦᐠ; ᒫᑲ, ᐁ ᓇᑲᒋᑖᔮᐣ, ᑭ ᑭ ᐃᔨᓂᓯᐃᐧ ᑳᒋᑎᓂᑎᓈᐋᐧᐤ.

[17] ᓈᐣᑕᐤ ᒋ ᑭ ᑭ ᐅᑎᓯᐊᐧᑳᑎᑎᓈᐋᐧᐤ ᓈᐣᑕᐤ ᐊᐃᐧᔭᐠ ᐅᐦᒋ ᐊᓂᑭ ᑳ ᑭ ᐃᑎᓴᐊᒫᑕᑯᐠ?

[18] ᓂ ᑭ ᐊᔮᑳᐧᒥᒫᐤ ᑕᐃᑕᐢ, ᒥᓇ ᐅᒋᐋᐧᒥᒫᐊᐧ ᓂ ᑭ ᐃᑎᓴᐅᒫᐊᐧ ᑭᑕ ᐃᐧᒉᐃᐧᑯᐟ. ᓈᐣᑕᐤ ᒋ ᑭ ᑭ ᐃᓯ ᐅᑎᓯᐋᐧᑳᑎᑯᐋᐧᐤ ᑕᐃᑕᐢ? ᓇᒪ ᒋ ᐯᔭᐠ ᐊᐦᒑᕽ ᓂ ᑭ ᑭᐢᑭᓄᑕᐃᑯᓈᐣ? ᓇᒪ ᒋ ᐯᔭᐠ ᒣᐢᑲᓇᐤ ᓂ ᑭ ᒥᑎᒫᓈᐣ?

[19] ᐱᓯᓯᐠ ᐅᒪ ᐁ ᑭᐧᑕᐃᐧ ᐃᑎᑯᔮᕽ ᑭ ᐃᑌᔨᒥᓈᐣ. ᑭᓭᒪᓂᑐ ᐁ ᐃᓯ ᐋᐧᐸᒥᑯᔮᕽ ᙭ ᐅᐦᒋ ᑳ ᐱᑭᐢᑫᐧᔮᕽ. ᒫᑲ ᑲᐦᑭᔭᐤ ᑭᑲᐧ, ᓯᔮᑭᐦᐃᑕᑯᐠ, ᑭᔭᐋᐧᐤ ᑭᑕ ᑭᐢᑭᓄᐦᐊᒫᑯᔦᐠ.

[20] ᒋᑫᒫ ᓂᐟ ᐊᐢᑖᓯᐣ, ᑫᑲ ᓈᐣᑕᐤ ᐃᓯ, ᐃᐢᐱ ᑕᑯᓯᓂᔮᓂ, ᑭᑕ ᐃᓯ ᒥᐢᑳᑕᑯᐠ ᐊᓂᒪ ᐁᑳ ᐁ ᐃᓯ ᓇᑕᐁᐧᔨᑕᒫᐣ, ᐁᑯᓯ ᓂᔭ ᒥᓇ ᐁᑳ ᐁ ᐃᓯ ᓇᑕᐁᐧᔨᒥᔦᐠ ᑭᑕ ᐃᑌᔨᒥᔦᐠ; ᑫᑲ ᓈᐣᑕᐤ ᐃᓯ ᑭᑕ ᐃᐦᑕᑲᐧᕽ ᑭᑳᑐᐃᐧᐣ, ᑳᑫᐧᔨᑐᐃᐧᐣ, ᑭᓯᐋᐧᓯᐃᐧᓇ, ᑲᑫᐧ ᐸᐢᑭᔮᑐᐃᐧᓇ, ᐸᑯᓄᒥᑐᐃᐧᓇ, ᑳᑭᒧᒋᐊᔭᒥᐃᐧᓇ, ᑭᐢᑌᔨᒥᓱᐃᐧᓇ, ᒥᑯᐢᑳᑕᑲᒥᑭᓯᐃᐧᓇ;

[21] ᐁᑯᓯ, ᐃᐢᐱ ᒥᓇ ᑕᑯᓯᓂᔮᓂ, ᓂ ᑭᓭᒪᓂᑐᑦ ᑭᑕ ᑕᐸᑌᔨᒧᐃᐟ ᐋᐧᐸᒥᔦᑯ, ᐁᑯᓯ ᑭᑕ ᒥᑖᑌᐢᑕᒪᐊᐧᑭᐠ ᒥᐦᒉᐟ ᐊᓂᑭ ᑳ ᑭ ᒪᒋᑐᑕᑭᐠ ᐊᐊᐧᓯᐢᐱ, ᐁᑳ ᒫᑲ ᐁ ᒥᑯᐢᑳᑌᔨᑕᒥᐃᑯᒋᐠ ᐊᓂᒪ ᐁ ᐃᐧᓀᔨᑖᑲᐧᕽ ᒥᓇ ᐱᓯᑳᐧᑎᓯᐃᐧᐣ ᒥᓇ ᒪᒋᐃᐧᒉᑐᐃᐧᐣ ᑳ ᑭ ᐃᑐᑕᐦᑭᐠ.