[1] Шу себептен мен, Рабби ичюн мабюс, сизлерге ялварам: сиз алгъан чагъырувгъа коре, ляйыкъ алда яшанъыз,
[2] бутюнлей алчакъгонъюлли, йымшакъ ве сабырлы олунъыз, севгинен бири-биринъизге чыданъыз,
[3] озьара тынчлыкъта яшагъанда, Рухнен берильген бирликни сакъламагъа тырышынъыз.
[4] Беден – бир, Рух да – бир. Бир умютке де сиз чагъырылдынъыз.
[5] Рабби – бир, иман – бир, сувгъа батырылып чыкъув – бирдир.
[6] Алла ве эписининъ Бабасы – бир. О, эписинден устюн, эписининъ арасында ве эписининъ ичинде булуна.
[7] Эр биримизге Месихнинъ бахшышына коре эйилик берильди.
[8] Шу себептен айтылгъан ки, О, юксекликке котерильди, эсирлерни эсирге алды, инсанларгъа бахшышлар берди.
[9] Энди «котерильди» сёзю нени бильдире? О, Месих эвель ернинъ алчакъ ерлерине тюшкенини бильдире.
[10] О, тюшти ве Озю эр шейни толдурмакъ ичюн бутюн коклерден юксек котерильди.
[11] О Озю базы адамларны эльчи, базыларны пейгъамбер, базыларны Къуванчлы Хаберни даркъатыджы, базыларны исе иманлылар джемиетине башлыкъ ве оджа этип къойды,
[12] олар азизлерни иман хызметине азырласынлар ве Месихнинъ беденини къурсунлар,
[13] ве, эпимиз иманда ве Алланынъ Огълуны бильгенимизде бирликке кельмегендже ве пишкин бир адам олмагъандже, бойле олур.
[14] Сонъ, бизлер сабийлер киби, олмайыкъ, эр тюрлю огретювлерге берильмейик, далгъалар киби анда-мында атылмайыкъ, адамларнынъ айнеджилигине ве оларнынъ бизни ёлдан урмагъа ялан ниетлерине де берильмейик,
[15] лякин севгинен толып, акъикъатны бильдирейик ве эр бир шейде Онъа ошамагъа тырышайыкъ. О – беденнинъ Башы, Месихтир,
[16] ве Онъа бутюн беден багълы. Беден бирлешип къошула, эр бир къысмы къатты багъларнен багълана, онынъ эр бир азасы озь ишини беджере, ве бутюн беден озюни севгинен къурып осе.
[17] Шунынъ ичюн, мен буны айтам ве Раббиден сизге ялварам: Алланы бильмеген халкълар киби, бош фикирлерге коре энди яшаманъыз.
[18] Оларнынъ акъылларыны къаранлыкъ къаплады; ичиндеки джаиллик ичюн олар Алла берген аяттан айрылып къалдылар, чюнки оларнынъ юреклери пек инаттыр.
[19] Олар дуйгъусыз олып, ахлякъсызлыкъкъа берильгендир ве тюрлю пис ишлерни ачкозьликнен япалар.
[20] Амма буны сизлер Месихтен огренмединъиз,
[21] эгер сиз, керчектен де, Оны эшитип, Ондан огренген олсанъыз, – чюнки акъикъат Исададыр.
[22] Ялан истеклернинъ ичинде гъайып олаяткъан эски адамнынъ эвельки аятыны бир четке алып къоймакъ керексинъиз,
[23] сизинъ акъылларынъыз янъы олмакъ керек,
[24] ве сиз, догърулыкънен ве азиз акъикъатнен Аллагъа коре яратылгъан янъы адамнынъ табиатыны алмакъ керексинъиз.
[25] Шунынъ ичюн, яланны четке ташлап, эр биринъиз озь якъындакилеринъизге догърусыны айтынъыз, чюнки биз бири-биримизге бир беденнинъ азалары оламыз.
[26] Гъазаплангъанда, гуна япманъыз. Кунеш баткъандже, гъазаптан къайтынъыз,
[27] Шейтангъа фырсат берменъиз.
[28] Хырсызлыкъ япкъан адам башкъа хырсызлыкъ япмасын, амма чалышып, озь къолларынен яхшылыкъ япсын ве мухтадж олгъанларнен бир шейнен болюшсин.
[29] Агъзынъыздан ич бир чиркин сёз чыкъмасын. Амма яхшы шейни озь вакътында айтынъыз, динълейиджилерге эйилик берген сёзлерни айтынъыз.
[30] Алланынъ Мукъаддес Рухуны агъырттырманъыз; сизлер къуртулыш куню ичюн шу Рухнынъ муурини алгъансыз.
[31] Эр бир къозгъалув ве ачув, гъазап ве къычырув, ифтира ве эр бир яманлыкъ сизден узакъ олсун.
[32] Лякин бири-биринъизге мераметли ве шефкъатлы олунъыз. Алла сизни Месихте багъышлагъаны киби, сизлер де бир-биринъизни багъышланъыз.