[1] Алланынъ истегинен Иса Месихнинъ эльчиси Павел ве дин къардашымыз Тимотей –
[2] Колоссай шеэриндеки азизлерге ве Месихке инангъан садыкъ агъа-къардашларымызгъа: Алла Бабамыз сизге эйилик ве тынчлыкъ-аманлыкъ берсин!
[3] Сизлер ичюн дува окъугъанымызда, Рабби Иса Месихнинъ Бабасына Аллагъа эр вакъыт шукюр этемиз,
[4] чюнки Иса Месихке иманынъыз ве бутюн азизлерге севгинъиз акъкъында эшиттик.
[5] Иманынъыз ве севгинъиз пейда олдылар, чюнки сиз коклерде сизге азырлангъан шейлерге умют эттинъиз. Бу умютни сизлер акъикъат сёзюнен, яни сизлерге кельген Къуванчлы Хабернен эшиттинъиз.
[6] Бу Хабер бутюн дюньяда даркъалаята ве берекет кетире, сизинъ аранъызда да, сизлер акъикъатта Алланынъ эйилигини эшиткен ве анълагъан куньден башлап, шуны япаята.
[7] Алланынъ эйилигини сиз Эпафрастан огрендинъиз. О, бизим севимли къул-ишдешимиз ве сизинъ ичюн Месихнинъ садыкъ хызметчиси.
[8] Сизинъ Рухтан берильген севгинъиз акъкъында о, бизге хабер этти.
[9] Шунынъ ичюн биз буны эшиткен кунюмизден берли сизлер ичюн токътамайып дува окъуймыз ве, сиз эр бир икметке ве рухий анълавгъа толып, Алланынъ истегини бутюнлей анълагъанынъыз ичюн, ялварамыз.
[10] Буны да истеймиз: Раббиге ярашкъаны киби, яшанъыз; эр бир шейде Онынъ разылыгъыны къыдырынъыз; эр тюрлю хайырлы иште берекет кетиринъиз; Алланы даа чокъча билинъиз;
[11] Онынъ шуретли къудретинен къуветлешип, эр шейге сабырлы ве чыдамлы олунъыз; къуванчнен
[12] Бабагъа шукюр этинъиз. О, Озь азизлерине берген ярыкътаки мираснынъ къысмыны алмагъа сизге ёл берди,
[13] бизни къаранлыкъ укюмдарлыгъындан къуртарды ве севимли Огълунынъ Падишалыгъына алып кирди.
[14] О, бизге Исанынъ ярдымынен къуртулыш берди, гуналарымызны багъышлады.
[15] О – корюнмез Алланынъ къыяфетидир; О, биринджисидир, эр бир яратылгъан шейден буюктир.
[16] Коклердеки ве ердеки, корюнген ве корюнмеген эр бир шейлер: тахтлар, салтанатлар, башлыкълар ве акимиетлер Онда яратылгъан. Эр шей Онынъ ярдымынен ве Онынъ ичюн яратылгъан.
[17] О, эр шейден эвельдир, ве эр шейнинъ эсасыдыр.
[18] О, Озь беденининъ, яни иманлылар джемиетининъ башыдыр. О – башланув, олюлерден тирильгенлерден де биринджидир, ве эр бир шейде биринджилик Онынъкидир.
[19] Алла бутюн толулыкънынъ Онда булунаджагъыны истеди.
[20] Озюнен эр бир шейни Онынъ ярдымынен барыштырмагъа, ердеки ве коклердеки эр бир шейлерге хачта тёкюльген къаны ярдымынен тынчлыкъ-аманлыкъ кетирмеге истеди.
[21] Бир вакъытлары сизлер Аллагъа ябанджы эдинъиз ве яман ишлерни япкъанда, озь акълынъызда Онынъ душманлары эдинъиз,
[22] лякин шимди О, Озь беденини олюмге берип, сизлерни Алланен барыштырды. О, сизлерни азиз, лекесиз ве къабаатсыз этип, Онынъ козю огюне кетиреджек,
[23] эгер сиз иманынъызда къатты ве темелли олсанъыз ве Къуванчлы Хабердеки умюттен юзь чевирмесенъиз. Бу Къуванчлы Хаберни сиз эшиттинъиз; о, коклер астындаки яратылгъан эр бир шейге бильдирильди. Мен, Павел, онынъ хызметчиси олдым.
[24] Мен шимди сизлер ичюн азаплангъанымда, къуванам. Месих Озь бедени ичюн, яни иманлылар джемиети ичюн але даа азаплана. Мен бу азапларны озь беденимде чекип толдурам.
[25] Алла манъа сизни бакъмагъа буюрды, ве мен иманлылар джемиетининъ хызметчиси олдым. Меним ишим Алланынъ Сёзюни бутюнлей бильдирмек олды.
[26] Шу сёз кечкен асырларгъа ве несиллерге сыр эди, шимди исе Алланынъ азизлерине ачылды.
[27] Алла дюнья халкълары ичюн бу сырнынъ зенгинлиги не къадар шуретли олгъаныны азизлерге бильдирмеге разы олды. Бу сыр бойледир: Месих ичинъиздедир, О, сизинъ келеджек шуретинъизнинъ умютидир.
[28] Бу Месихни биз илян этемиз, эр бир адамгъа акъыл огретемиз ве бутюн икметимизнен эр бир адамны тербиелеймиз. Бунынъ макъсады – эр бир адамны Месихте мукеммель этмектир.
[29] Менде къудретли арекет эткен Онынъ кучюни къулланып чалышам ве курешем.